Apocalipsis 17:1-18
17 Tsaypitanami cöpata jichamuq qanchis *angilkunapita juk ángel aywaykamur kayno nimarqan: “Aku aywashun yaku* janancho jamaraykaq *wayrapakuq warmita Tayta Dios imano castigashqantapis rikatsinäpaq.
2 Tsay warmiwanqa mana penqakuypami reykuna kakushqa. Mana ali costumbrinkunaqa shinkatsikuq vïnunömi kaykan. Tsay vïnuta upurmi kay patsacho runakuna shinkarqan”.
3 Tsaypitanami revelacioncho chunyaq jirkaman ángel pushamarqan. Tsaychömi rikarqä juk warmi mantsariypaq puka uywata muntaraykaqta. Tsay uywa karqan qanchis umayuq y chunka waqrayuqmi. Uywapa jananchömi Tayta Diospa contran qelqaraykarqan.*
4 Warmipa röpanmi karqan granäti y puka püru tëlapita. Qoriwan, kuyaylapaq rumikunawan y perlaskunawan adornashqami kaykarqan. Tsararashqan qori cöpachömi winararqan lapan jutsa rurashqankuna. Tsayqa pasaypa melanaypaqmi karqan.
5 Urkunchömi runakuna mana musyashqan jutin qelqaraykarqan kayno nir:“BABILONIA JATUN MARKAMI KAYKÄ.WAYRAPAKUQ WARMIKUNAPA MAMANMI KAYKÄ.JUTSA RURAQKUNAPA MAMANMI KAYKÄ”.*
6 Tsaypita rikärishqächönami tantiyarqä Jesucristuman yärakuqkunata wanutsir yawarninta upushqanwan tsay warmi shinkashqa kaykaqta. Tsayta rikaykur pasaypa mantsakurmi ima ruraytapis mana kamäpakurqätsu.
7 Tsaymi ángel kayno nimarqan: “¿Imanirtaq mantsakashqa kaykanki? Kanan tantiyatsishayki tsay warmipita y muntaraykashqan qanchis umayuq chunka waqrayuq uywapita.
8 Tsay rikashqayki uywaqa nawpata kawashqa karpis kananqa manami kawannatsu. Tsayno karpis wanwanyaykaqpitami yarqamunqa.* Nirkurmi ushakanqa. Shamuqta rikarmi runakuna fiyupa mantsakashqa rikakärinqa. Tsay runakunapa jutinkuna manami Libru de la Vïdacho* qelqarantsu. Tsay libruta Tayta Dios qelqarqan kay patsata kamashqan witsanmi.
9 “Tantiyakuq kaqqa shumaq tantiyakutsun. Tsay uywapa qanchis umankuna kaykan wayrapakuq warmi jamarashqan qanchis jirkankunami.*
10 Tsaynöpis tsay umankuna kaykan mandaq qanchis reykunami. Tsay qanchis reykunapitaqa pitsqa reykuna maynami ushakashqa. Kananqa juknami mandaq kaykan. Qanchis kaq rey yurimurnami walka tiempula mandanqa.
11 Nawpata kawaq puka uywaqa pusaq kaq reymi kanqa. Qanchis kaq reykunanömi kanqa. Nirkur paypis ushakanqami.
12 “Chunka waqrakunata rikashqaykiqa chunka reykunami kaykan.* Paykunaqa manaraqmi mandayta qalaykunraqtsu. Juk tiempulapaqmi mandaq kayta chaskinqa mantsakuypaq uywawan juntu mandananpaq.
13 Mandarnami tsay chunka reykuna wilanakur munayninta uywata qonqa.
14 Tsaymi tsay uywawan Carnishpa contran sharkur pelyapäkunqa. Contran sharkuptinpis lapan mandaqkunapa y reykunapa mandaqnin karmi* paykunata Carnish vincinqa. Carnishwan juntumi kanqa qayashqan, akrashqan y imaypis cäsukuq runakunaqa”.
15 Nirkurnami ángel kayno nimarqan: “Wayrapakuq warmi jamarashqan yakuqa kaykan maytsay marka runakuna, maytsay nación runakuna y tukuy idiömata rimaq runakunami.
16 Rikashqayki chunka waqrakuna y mantsariypaq uywapis tsay wayrapakuq warmita fiyupami chikipäkunqa. Tsaymi lapan imaykantapis apakur qarapächulata kachaykunqa. Tsaypitanami aytsanta mikupäkunqa y putsuq kaqtanami rupatsipäkunqa.
17 Tsaypita Tayta Dios yarpayta qoshqannölami tsay chunka waqrakuna wilanakur uywata munayninta qonqa. Tsaymi tsay uywa munayniyuq kanqa Tayta Dios nishqannöla lapanpis cumplikänanyaq.
18 “Rikashqayki warmiqa jatunkaray markami kaykan. Tsay markaqa kay patsacho kaykaq reykunatami munaynincho tsararaykan”.
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 17.1 Apoc. 17.15.
^ wayrapakuq warmi Wayrapakuq warmiqa pägupaq rayku jukwan jukwan kakuq warmimi kaykan. Tsayno warmikunata Tayta Dios imaypis mana perdonananpaq kashqanta runakuna yarpaptinpis Jesucristuqa nirqan jutsankunata kacharir Tayta Dios munashqanno kawarqa perdonashqa kananpaq kashqantami (Mat. 21.31-32; Heb. 11.31).
^ 17.3 Apoc. 13.1; 19.19-20.
^ 17.5 Wayrapakuq warmikunapa maman kashqanta nirqa lapan wayrapakuq warmikunapitapis mas wayrapakuq kashqantami nirqan. Jutsa ruraqkunapa maman kashqanta nirqa lapan jutsa ruraqkunapitapis mas jutsa ruraq kashqantami nirqan.
^ 17.8a Dan. 7.7; Apoc. 11.7.
^ 17.8b Sal. 69.28; Apoc. 3.5; 13.8.
^ 17.9 Tsay qanchis jirkankunachömi Roma marka kaykan.
^ 17.14 Deut. 10.17; Apoc. 19.16.
