Apocalipsis 5:1-14
5 Tsaypitanami trönucho jamaraykaqpa alawqa kaq makincho rölluta rikarqä. Tsay rölluqa jananpa y rurinpami qelqaraykarqan. Qanchis kutimi cërawan kuchun laqararqan.*
2 Tsaychömi juk munayniyuq *angilta rikarqä. Paymi qayakur kayno nirqan: “¿Pilaraq cërankunata jorqurir rölluta kichaykunman?”
3 Tsayno niptinpis jana patsacho, ni kay patsacho ni patsa rurinchöpis tsay rölluta kichananpaq ni qelqarashqanta rikananpaqpis manami pipis karqantsu.
4 Pipis tsay rölluta kichananpaq ni liyinanpaq mana kaptinmi fiyupa lakikur waqarqä.
5 Tsaymi ishkay chunka chusku (24) mayor runakunapita juknin kayno nimarqan: “Ama waqaytsu. ‘Judá trïbupita yuriq León’* nishqan runami *Satanásta vincishqa.* Paymi munayniyuq kaykan qanchis cërata jorqur rölluta kichananpaq. Payqa rey Davidpita miraqmi kaykan”.*
6 Tsayno nimaptinmi juk Carnishta* * rikarqä. Wanutsishqano karpis trönu nawpanchömi kawaykar ichiraykarqan. Tsaynöpis chusku kawaykaqkunapa chawpincho y ishkay chunka chusku (24) mayor runakunapa chawpinchömi kaykarqan. Qanchis waqrayuq y qanchis nawiyuqmi karqan.* Tsay qanchis nawinkunaqa kaykan Tayta Dios kay patsaman kachamushqan qanchis espïritukunami.
7 Trönucho jamaraykaqpa alawqa kaq makinpitami rölluta Carnish chaskirqan.
8 Chaskirkuptinmi nawpancho kaq chusku kawaykaqkuna y tsaycho kaq ishkay chunka chusku (24) mayor runakunapis nawpanman lätakuykur adorarqan. Paykuna lapanmi arpankunawan karqan. Tsaynöpis qoripita rurashqa tazonwanmi inciensuta tsarararqan. Tsay inciensu karqan Tayta Diosman yärakuqkuna manakushqankunami.*
9 Paykunami mushuq alabanzata cantar Carnishta alabarqan kayno nir:*“Qamlami munayniyuq kaykanki tsay rölluta chaskirkur kichanaykipaq.Qammi runakuna rayku wanushqanki.Yawarnikita jicharmi Tayta Diospaq runakunata rantishqanki.Tsaymi runakunata Tayta Dios salvashqa pï casta kaptinpis, ima idiömata rimaptinpis, may markacho taptinpis y may nacionpita kaptinpis.
10 Tayta Diosnintsipa makincho kananpaq y sirviqnin cürakuna kananpaqmi churashqanki.*Paykunami patsacho mandaq kanqa”.
11 Tsaypitanami rikarqä yupaytapis mana atipaypaq angilkuna Carnishta alabarkaykaqta.* Paykunami trönupa nawpancho, chusku kawaykaqkunapa nawpancho y ishkay chunka chusku (24) mayor runakunapa nawpancho alabar
12 qayakuypa kayno nipäkurqan:“¡Runakuna rayku wanutsishqan Carnishqa* lapanpaq munayniyuqmi kaykan!¡Paymi lapan kamashqankunapapis ämun kaykan!¡Paynöqa manami pipis yachaq kantsu!¡Lapan kawaqkuna payta imaypis alabaykulätsun!”
13 Tsaynöpis mayarqä jana patsacho kaykaqkuna, kay patsacho kaykaqkuna, patsa rurincho kaykaqkuna, lamar rurincho kaykaqkuna y lapanpis Tayta Dios kamashqan kaqkuna kayno nir alabarkaykaqta: “¡Trönucho jamaraykaq Tayta Dios y nawpancho kaykaq Carnish imayyaqpis alabashqa kaykulätsun!”
14 Tsayno alabaptinmi Tayta Diospa nawpancho kaykaq chusku kawaykaqkuna “¡amén!” nipäkurqan. Tsaynöpis ishkay chunka chusku (24) mayor runakuna lätakuykur [imayyaqpis kawaq] Tayta Diosta adorapäkurqan.
Ichic wilacuycuna
^ 5.1 Isa. 29.11; Eze. 2.9-10; Zac. 5.1.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 5.5b Juan 16.33; Apoc. 3.21.
^ 5.5c Isa. 11.1, 10.
^ 5.6a Apocalipsis librucho Carnish nishqanqa Jesucristumi kaykan. Altarcho sacrificiuno kananpaq carnishta unay cürakuna wanutsishqannömi Jesucristo cruzcho wanur Tayta Diospaq sacrificiu karqan.
^ 5.6b Qanchis waqrayuq ninanqa pasaypa munayniyuq ninanmi. Qanchis nawiyuq ninanqa lapanta rikaq y lapanta musyaq ninanmi.
^ 5.8 Sal. 141.2; Apoc. 8.3.
^ 5.9 Sal. 33.3; 98.1; Isa. 42.10.
^ 5.10 Éxo. 19.6; Apoc. 1.6; 20.6.
^ 5.12 Juan 1.29; 1Cor. 5.7.
