Apocalipsis 7:1-17
7 Tsaypitanami rikarqä chusku *angilkuna kay patsapa chuskun kuchuncho ichirpaykaqta.* Tsay angilkunami wayrata tsapararqan kay patsamanpis ni lamarmanpis ni ima yöramanpis mana wayrämunanpaq.
2 Paykuna munayniyuqmi karqan kay patsatapis lamartapis castigananpaq.
Tsaynöpis rikarqä inti jeqamunan kaqpita imayyaqpis kawaq Tayta Diospa sëllun aptashqa juk ángel aywaykämuqta. Tsay angilmi patsapa kuchunkunacho kaykaq chusku angilkunata qayakur
3 kayno nirqan: “¡Tayta Diosnintsipa sirviqninkunata urkuncho manaraq señalaptïqa* kay patsacho kaqkunata, lamarcho kaqkunata ni yörakunatapis ama ushakätsiyraqtsu!”
4 Tsaypitanami ayka runakunata señalashqantapis mayarqä. Tsay runakuna karqan pachak chusku chunka chusku waranqa (144,000) runakunami. Paykuna karqan lapan Israel trïbu runakunapitami:
5 Judá trïbupitami chunka ishkay waranqa (12,000) karqan.Rubén trïbupitami chunka ishkay waranqa (12,000) karqan.Gad trïbupitami chunka ishkay waranqa (12,000) karqan.
6 Aser trïbupitami chunka ishkay waranqa (12,000) karqan.Neftalí trïbupitami chunka ishkay waranqa (12,000) karqan.Manasés trïbupitami chunka ishkay waranqa (12,000) karqan.
7 Simeón trïbupitami chunka ishkay waranqa (12,000) karqan.Leví trïbupitami chunka ishkay waranqa (12,000) karqan.Isacar trïbupitami chunka ishkay waranqa (12,000) karqan.
8 Zabulón trïbupitami chunka ishkay waranqa (12,000) karqan.José trïbupitami chunka ishkay waranqa (12,000) karqan.Benjamín trïbupitami chunka ishkay waranqa (12,000) karqan.
Tsaytsika runakuna yoraq röpashqa jana patsacho kashqan
9 Tsaypitami rikarqä Tayta Dios jamarashqan trönupa nawpancho y Carnishpa nawpancho yupaytapis mana atipaypaq tsaytsika runakuna palman aptashqa y yoraq röpan jatishqa karkaykaqta. Paykuna karqan maytsay nación runakuna, maytsay trïbu runakuna, maytsay marka runakuna y tukuy idiömata rimaq runakunami.
10 Paykunami qayakuypa kayno nirqan: “¡Trönucho jamaraykaq Tayta Dios y nawpaykicho kaykaq Carnish, qamkunami salvamashqanki!”
11 Tsawraqa Tayta Diospa nawpancho kaykaq chusku kawaykaqkuna, ishkay chunka chusku (24) mayor runakuna y lapan angilkunapis lätakuykur Tayta Diosta alabar
12 kayno nirqan:“¡Amén!¡Tayta Diosnintsi alabashqa kaykulätsun!¡Pay japalanmi lapantapis musyan!¡Imayyaqpis payta agradëcikushun!¡Pay japalanmi lapanpaq munayniyuq kaykan!¡Imayyaqpis payta alabashun!¡Amén!”
13 Tsaymi Tayta Diospa nawpancho kaykaq ishkay chunka chusku (24) mayor runakunapita juknin kayno nir tapumarqan: “Tsay yoraq röpan jatishqa runakuna ¿mayqan runakunataq karkaykan? ¿Maypitataq shapäkamushqa?”
14 Tsayno nimaptinmi kayno nirqä: “Tayta, qammi musyanki”.
Tsayno niptïmi kayno nimarqan: “Paykunaqa pasaypa nakaykunata pasaq runakunami karkaykan.* Yawarninta jichar Carnish wanushqanpitami perdonashqana karkaykan. Carnishpa yawarninwan taqshashqa kaptinmi röpankuna yoraq kaykan.*
15 Tsay runakunaqa Tayta Dios jamarashqan trönun nawpanchömi karkaykan.“Paqasta junaqtami templuncho alabarkaykan.Trönucho jamaraykaq Tayta Diosmi paykunata imaypis rikanqa.
16 Paykunaqa manami imaypis yarqananqatsu ni yakunanqatsu.Intipis paykunata manami rupanqatsu.Shanaypis paykunata manami walyanqatsu.*
17 Tayta Dios jamarashqan trönun nawpancho Carnishmi paykunata mitsinqa.*Imaypis mana yakunänanpaqmi kawatsikuq yakuman pushanqa.*Kikin Tayta Diosmi shoqashpan weqinkunatapis pitsapanqa”.*
Ichic wilacuycuna
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 7.14a Dan. 12.1; Mat. 24.21; Mar. 13.19.
^ 7.14b Juan 1.29; 1Juan 1.7.
^ 7.16 Sal. 121.6; Isa. 49.10.
^ 7.17a Sal. 23.1; Eze. 34.23; Juan 10.1-16.
^ 7.17b Sal. 23.2; Isa. 49.10; Juan 4.10; 7.37.
^ 7.17c Isa. 25.8; Apoc. 21.4.
