Apocalipsis 9:1-21
9 Tsaypitanami pitsqa kaq *ángel *cornëtata tukamuptin rikarqä patsaman qoylar shikwamuqta. Tsay qoylarmi chaskirqan *supaykuna wichqarpaykashqan wanwanyaykaq patsapa shiminpa llävinpa wawanta.
2 Patsapa shiminta kichariptinmi jatun hornupita qoshtay yarqamuqnöraq qoshtay yarqamurqan.* Tsay qoshtay intita tsapakurkuptinmi patsa tsakakäkurqan.
3 Tsay qoshtaypitanami kay patsaman juntaqpaq chukluskuna yarqupäkamurqan.* Tsay chukluskunami alacranno pasaypa venënuyuq karqan.
4 Paykunatami nirqan qewata ni yörata mana ushakätsinanpaq. Tsaypa trukanqa nirqan Tayta Diospa sëllunwan urkuncho mana señalaraq runakunalata nakatsinanpaqmi.*
5 Tsaynöpis nirqan runakunata nakatsirpis mana wanutsinanpaqmi. Wanutsinanpa trukanqa pitsqa killa nanaywan nakatsinanpaqmi nirqan. Tsaymi alacrán picaptin nakashqannöraq nanaywan nakapäkurqan.
6 Tsay witsanqa runakuna pasaypa nakar wanuyta munarpis manami imanöpapis wanunqatsu. Wanuyta ashirpis manami tarinqatsu.*
7 Tsay chukluskuna karqan guërraman aywananpaq kamarishqa cawallukunanömi.* Umancho qori corönan jatishqanömi karqan. Qaqlanpis runapa qaqlannömi karqan.
8 Aqtsankunanami warmipa aqtsanno y kirunkunanami leonpa kirunno karqan.*
9 Cuerpunkunaqa läta chalëcushqanömi karqan. Päriptin älankuna sapsapyashqanpis mayakarqan carrëtan qarachashqa cawallukuna guërraman aywaqnöraqmi.*
10 Chupannami alacranpa chupanno awja punta karqan. Chupanwan uliptinmi runakuna pitsqa killa qeshyar nakapäkurqan.
11 Tsay chukluskunapa mandaqnin karqan wanwanyaykaq raqracho angilmi. Tsay angilpa jutinmi hebreo idiömacho Abadón y griego idiömacho Apolión.*
12 Tsay punta kaq nakay pasariptinpis ishkay nakaykunaraqmi chayamunanpaq kaykan.
Soqta kaq ángel cornëtata tukamushqan
13 Soqta kaq *ángel *cornëtata tukamuptinmi mayarqä Tayta Diospa nawpancho kaykaq qori *altarpa chuskun waqran* chawpinpita parlamuqta.
14 Tsaychömi tsay cornëta tukamuq angilta kayno nirqan: “Éufrates mayu kuchuncho wataraykaq chusku angilkunata paskamuy”.
15 Paskariykamuptinmi tsay chusku angilkuna mayu kuchunpita aywarqan kay patsacho cäsi pulan runakunata wanutsinanpaq. Tsay angilkuna kamarikushqa karqan tsay höra, tsay junaq, tsay killa, tsay wata runakunata wanutsiq yarqupäkunanpaqmi.
16 Kayno niqtami mayarqä: “¡Tsay angilkunawanmi ishkay pachak millón (200,000,000) soldädukuna cawallunkuna muntashqa aywarkaykan!”
17 Soldädukunapa chalëcunkunami karqan ninano puka, zafiruno azul y azufrino qarwash. Cawallunkunapa umanmi karqan leonpa umanno. Shiminpitami yarqamurqan ninapis, qoshtaypis y azufripis. Tsaynömi soldädukunata y cawallunkunata revelacioncho rikarqä.
18 Shiminpita yarqamuq azufri, nina y qoshtaymi kay patsacho cäsi pulan runakunata ushakätsirqan.
19 Manami shiminpita yarqamuqkunalawantsu runakunata cawallukuna wanutsirqan, sinöqa culebra niraq umayuq chupankunawanpis ulirmi wanutsirqan.
20 Tsayno kaptinpis mana wanuq runakunaqa jutsa ruraykunata manami kacharirqantsu. Tsaypa trukanqa *supaykunata y ïdulukunatami imaypis adorapäkurqan. Tsay ïdulukunaqa qoripita, qellaypita, broncipita, rumipita y qerupita rurashqa karmi mana rikantsu ni mayantsu ni purintsu.*
21 Tsaynöpis manami kacharirqantsu wanutsikuq kayta, brüju kayta, *fornicación jutsata y suwakuytapis.*
Ichic wilacuycuna
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ 9.2 Gén. 19.28.
^ 9.3 Éxo. 10.12-15.
^ 9.11 Abadón y Apolión jutikunaqa ushakätsiq ninanmi.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 9.13 Éxo. 30.1-3.
^ supay Supaykunaqa Tayta Diosta mana cäsukuq angilkunami kaykan. Paykunami Satanás mandashqanta rurar runakunata qeshyatsin, löcuyätsin, chikinakatsin y yarpayninta pantakätsin Tayta Diospa ali wilakuyninta mana tantiyapäkunanpaq (Mat. 12.43-45; Mar. 1.23-26; Luc. 8.2). Masta musyanaykipaq liyinki Satanáspita tantiyatsikuyta.
^ 9.20 Sal. 115.4-7; 135.15-17; Dan. 5.23.
^ fornicación jutsa Fornicación jutsaqa kaykan majalanwan kakunanpa trukan jukwan kakushqan, mana ashinakuylapa kakushqan, uywakunawan kakushqan, olqupura kakushqan, warmipura kakushqan, wayrapakuq warmiwan kakushqan, aylunwan kakushqan y jukwan jukwan lutala kakushqanpis (Lev. 18.6-23; 1Cor. 5.1; 6.12-20; Efe. 5.5).
^ 9.20-21 Éxo. 8.15, 19.
