Hechos 4:1-37
4 Pedro y Juan wilakuykaptinmi cürakuna, *saduceukuna y templu täpaq wardiakunapa capitannin chayapäkurqan.
2 Jesucristo kawarimushqanno wanuqkuna kawarimunanpaq kashqanta yachatsiptinmi fiyupa rabyapäkurqan.
3 Prësu tsariykurmi tardina kaptin waraynin* tutayaq carcilman wichqaykurqan.
4 Tsayno kaptinpis Pedro y Juan wilakushqanta mayar atskaqmi criyipäkurqan. Tsay criyiqkuna karqan pitsqa waranqanömi (5,000).
5 Patsa wararkuptinnami Jerusaléncho juntakarqan Israel runakunapa autoridäninkuna, mayor runakuna y ley yachatsiqkunapis.
6 Paykunawanmi juntakarqan mas mandaq cüra Anáspis, Caifáspis, Juanpis, Alejandrupis y Anáspa wakin aylunkunapis.
7 Nirkurmi Pedruta y Juanta carcilpita jorqarkatsimur tapupäkurqan kayno nir: “¿Ima munaynikiwantaq y pipa jutinchötaq kaykunata rurapäkushqanki?”
8 Tsawraqa Espíritu Santupa munayninwanmi Pedro kayno nirqan: “Autoridäkuna y Israel mayor runakuna,
9 ¿paralïticu runata aliyätsishqäpitaku tapupäkamanki?
10 Qamkunapis y lapan Israel runakunapis, mayapäkamay. Nazaretpita kaq Jesúspa jutinchömi kay runata aliyätsishqä. Payta crucificaypa wanutsishqa kaptikipis Tayta Diosmi kawaritsimushqa.
11 ‘Kay rumiqa manami alitsu’ nir wayi sharkatsiqkuna jitariqnömi payta wanutsipäkushqanki. Tsayno kaptinpis wayi esquïna cimientucho churaraykaq ruminömi kaykan.*
12 Jesucristulami salvamaqnintsi kaykan. Paypita mas jukqa salvamänantsipaq manami pipis kantsu”.
13 Pedro y Juan shumaq mana estudiashqa kaykarpis mana mantsakuypa wilakuptinmi autoridäkuna espantashqa rikakurqan. Tsaymi Jesúspa discïpulunkuna kashqanta tantiyapäkurqan.
14 Aliyätsishqan runa tsaycho ichiraykaqta rikarmi ima niytapis mana kamäpakärirqantsu.
15 Tsawraqa juntaraykashqanpita Pedruta y Juanta waqtaman jorqarkatsirmi kikinpura kayno wilanakärirqan:
16 “¿Imatataq kay runakunata rurashun? Tsay runata aliyätsishqanta Jerusaléncho taq lapan runakunami musyapäkun. Tsaytaqa manami ñëgashwantsu.
17 Itsanqa wilakushqan maytsaymanpis mana chayananpaq shumaq anyapäshun Jesúspa jutincho pitapis manana wilakunanpaq”.
18 Tsayno wilanakurkurmi waqtapita qayaykatsimur nirqan Jesúspa jutincho imaypis mana wilakunanpaq ni mana yachatsinanpaq.
19 Tsawraqa Pedro y Juan kayno nipäkurqan: “Shumaq tantiyakäriy, taytakuna. ¿Aliku kanman Tayta Diosta cäsukunäpa trukan qamkunata cäsukäriptï?
20 Rikashqäta y mayashqätaqa manami upälakärïmantsu”.
21 Paralïticu runata aliyätsishqanpita lapan runakuna Tayta Diosta alabaptinmi autoridäkuna mana castigarqannatsu. Tsaypa trukanqa anyaparkurmi kacharirqan.
22 Jesúspa munayninwan aliyaq runaqa chusku chunka (40) watayuqpita masnami karqan.
Tayta Diosta manakärishqan
23 Carcilpita yarqurirnami Pedro y Juanqa yärakuq mayinkunaman kutiykur wilaparqan mandaq cürakuna y Israel mayor runakuna imata nishqantapis.
24 Tsayno wilapaptinmi lapanpis Tayta Diosta manakur kayno nipäkurqan: “Tayta Dios, qammi kamashqanki jana patsata, kay patsata, lamarta y lapan imaykatapis.*
25 Espíritu Santu tantiyatsiptinmi sirvishuqniki David kayno nirqan:“¿Imanirtaq runakuna Diospa contran sharkapäkun?¿Imanirtaq manakaqkunata yarpapäkun?
26 Tayta Diospa y akrashqan Cristupa contran sharkunanpaqmikay patsacho reykuna y autoridäkuna juntakaykur wilanakärin”.*
27 “David nishqannölami Herodespis,* *Poncio Pilatupis,* mana Israel runakunapis y Israel runakunapis kay Jerusaléncho juntakarqan *santu sirvishuqniki* Jesúspa* contran sharkunanpaq. Paytami salvakuq Cristo kananpaq churashqanki.
28 Tsayno kananpaq unaypita nishqaykinölami lapantapis rurapäkurqan.
29 “Autoridäkuna anyapämashqanta mayashqankimi, Tayta Dios. Kanan yanapaykalämay wilakuynikita mana mantsakuypa wilakärinäpaq.
30 Santu sirvishuqniki Jesúspa jutincho tukuy milagrukunata rurapäkunäpaq y qeshyaqkunatapis munaynikiwan aliyätsinäpaq yanapaykalämay”.
31 Tayta Diosta manakuyta usharkuptinmi juntarpaykashqan wayi siksikyarqan. Tsaymi Espíritu Santupa munayninwan Tayta Diospa wilakuyninta mana mantsakuypa wilakärirqan.
Jesúsman yärakuqkuna yanapanakushqan
32 Jesucristuman yärakuqkuna lapanpis tsay yarpaylami karqan. Tsaymi imatapis kikinkunapaq churakunanpa trukanqa nistashqan tupu rakipänakäriq.*
33 Señor Jesucristo kawarimushqanta mana mantsakuypami *apostolkuna wilakäriq. Lapan yärakuqkunatami Tayta Dios shumaq yanaparqan.
34 Tsaymi paykunaqa mayqanpis mana muchurqantsu. Chakrankunata wayinkunata rantikuykurmi tsay qellayta
35 apostolkunaman apapäkuq. Paykunanami waktsakunata nistashqanman tupu aypupäkuq.
36 Tsaynölami rurarqan José jutiyuq runapis. Payqa Chipre islapita Leví trïbu runami karqan. Paypa kuyay jutintami apostolkuna churaparqan Bernabé kananpaq. Tsay jutiqa “kuyapäkuq runa” ninanmi.
37 Bernabépis chakranta rantikuykurmi qellayta apostolkunaman aparqan.
Ichic wilacuycuna
^ saduceo runa Saduceo runakunaqa yarpapäkurqan Moisés qelqashqankunala Tayta Diospa yachatsikuynin kashqantami. Paykunaqa manami criyirqantsu runakuna wanushqanpita kawarimunanpaq kashqanta ni alman kashqanta ni angilkuna kashqantapis. Saduceukunaqa mas rïcu runakunami karqan. Fariseo runakunapitaqa mas munayniyuqmi karqan (Luc. 20.27-40).
^ 4.3 Wakin runakunaqa warantin nipäkun.
^ 4.11 Sal. 118.22.
^ 4.24 Éxo. 20.11; Neh. 9.6; Sal. 146.6.
^ 4.25-26 Sal. 2.1-2.
^ 4.27a Luc. 23.7-11.
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ 4.27 Tsay palabraqa griëgucho sirvishuqniki y wamrayki ninanmi. Tsaynölami 4.30-chöpis kaykan.
^ 4.27c Isa. 52.13; Fil. 2.7.
^ 4.32 Hech. 2.44-45.
^ apóstol Apóstol ninanqa “wilakunanpaq kachashqan runa” ninanmi. Apostolkunataqa Jesucristumi kacharqan maytsaymanpis aywar wilakuyninta wilakunanpaq. Tsay apostolkunaqa karqan chunka ishkaymi. Jesucristo wanushqanpita kawarirkamurmi Pablutapis yuriparkur churarqan apóstol kananpaq (Mar. 3.14; Luc. 6.13-16; 1Cor. 9.1-2). Apostolkunatami Jesucristo nirqan Espíritu Santu shamur lapanta yachatsinanpaq kashqanta y Jesucristo yachatsishqanta yarpätsinanpaq kashqanta (Juan 14.25-26; 16.12-15). Tsaynöpami Jesucristupa apostolninkuna y paykuna autorizashqan runakuna Mushuq Testamentuta qelqapäkurqan.
