Job 1:1-22
1 Uz partichömi juk runa tarqan Job jutiyuq.* Payqa lapan shonqunwan alita rurar Tayta Diosta *mantsakurmi kawarqan. Manami ima jutsatapis rurarqantsu.
2 Tsurinkunami karqan kimsa warmi y qanchis olqu.
3 Uyshankunami karqan qanchis waranqa (7,000), *camëllunkunami karqan kimsa waranqa (3,000), törunkunami karqan pitsqa pachak (500), bürrunkunami karqan pitsqa pachak (500) y ashmayninkunapis atskami karqan. Tashqan kaqchöqa lapanpitapis mas rïcu y respitashqami karqan.
4 Jobpa olqu tsurinkunami tumanakuypa qayatsinakur wayinkunaman juntakaykur mikupäkuq. Tsaymanmi kimsan paninkunatapis qayatsiq mikur upur qoyäpäkunanpaq.
5 Tsawraqa mikuyta usharkuptinnami Jobqa tsurinkunata qayatsirqan paykunapaq Tayta Diosta perdonta manakunanpaq. Tutala sharkurkurmi tsurinkunapa jutincho sacrificiuta rupatsirqan kayno nishpan: “Capazchari tsurïkunaqa jutsatapis rurashqa. Tsaynöpis capazchari Tayta Diospa contranpis shonquncho yarpapäkushqa”.
6 Juk kutimi TAYTA DIOSPA nawpanman *angilkuna chayapäkurqan. Tsaymanmi *Satanáspis chayarqan.*
7 Tsaymi Satanásta TAYTA DIOS kayno tapurqan: “¿Maypitataq shamushqanki?”
Tsaymi kayno nirqan: “Intëru patsata rikapakur purimushqäpitami shamushqä”.
8 Tsawraqa TAYTA DIOS kayno nirqan: “Sirvimaqnï Job noqa munashqäno kawashqanta ¿rikashqankiku? Paynöqa manami pipis kantsu ali ruraq, munashqäno kawaq, ali sirvimaq y jutsatapis mana ruraq”.
9 Tsayno niptinmi Satanás kayno nirqan: “Manami dembaldilatsu Jobqa sirvishunki.
10 Pipis yatananta mana munarmi aylunkunata y imaykankunatapis tsapaykanki. Tsaynöpis murushqankunamanmi bendicionta churaykanki. Tsaymi lapan runakunapitapis mas atska uywayuq kaykan.
11 Kanan maski imaykantapis qechuy. Qechuptikiqa contraykimi imaykatapis rimanqa”.
12 Tsawraqa Satanásta TAYTA DIOS kayno nirqan: “Lapan imaykantapis makikimanmi kachaykü. Kikinta itsanqa yataylapis ama yataykuytsu”.
Tsayno niptinmi TAYTA DIOSPA nawpanpita yarqur Satanás aywakurqan.
13 Tsaypitanami juk kuticho Jobpa lapan tsurinkuna mikur y upur karkaykarqan mayor wawqinpa wayincho.
14 Tsayno karkaykaptinmi juk ashmaynin Job kaqman chayaykur kayno nir wilarqan: “Töruykikunawan arurkaykaptïmi y bürruykikunata tsaycho mitsirkaykaptin
15 elaqpita sabeo runakuna ashmaynikikunata espädawan wanurkatsir uywaykikunata apakärishqa. Noqalami qeshpimushqä wilanäpaq”.
16 Tsayno wilapaykaptinmi juk ashmayninpis chayaykur kayno nir Jobta wilarqan: “Räyumi lapan uyshaykikunata y mitsikuqnikikunatapis chipyaq wanutsishqa. Noqalami qeshpimushqä wilanäpaq”.
17 Manaraq wilayta ushaptinmi juk ashmayninpis chayaykur Jobta kayno nir wilarqan: “Kimsa punta caldeo runakuna shamurmi lapan camëlluykikunata apakärishqa. Nirkurmi ashmaynikikunatapis espädawan wanutsipäkushqa. Noqalami qeshpimushqä wilanäpaq”.
18 Tsayno wilapaykaptinmi juk ashmaypis chayaykur kayno nirqan: “Olqu tsurikikuna y warmi tsurikikuna mayor tsurikipa wayincho mikur upur fiestata rurarkaykaptinmi
19 shukukuy wayra chunyaq jirkapita shamur wayita juchutsir lapan tsurikikunata wanutsishqa. Noqalami qeshpimushqä wilanäpaq”.
20 Tsawraqa Job pasaypa lakikushpan röpanta rachirqan y aqtsantapis rutukurqan. Nirkurmi pampaman lätakuykur Tayta Diosta adorashpan
21 kayno nirqan:“Mamäpa pachanpita qarapächula yurishqänölami wanurpis qarapächula aywakushaq.TAYTA DIOSMI lapantapis kamaripämashqa.Tsaynölami lapantapis qechumashqa.TAYTA DIOS alabashqa kaykulätsun”.
22 Tsaykuna pasaptinpis Jobqa manami jutsata rurarqantsu ni Tayta Diospa contran rimarqantsu.
Ichic wilacuycuna
^ 1.1 Stg. 5.11.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ camëllu Camëlluqa jatunkaray uywami kaykan. Camëllukunataqa ashmapäkun maypapis aywar cargakunanpaq y muntakunanpaqmi. Tsaynöpis camëllupa milwanta putskarkurmi awapäkuq. Camëllupa milwanpitami Bautizaq Juanpa röpanpis karqan (Mat. 3.4; Mar. 10.25).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 1.6-12 1Crón. 21.1; Zac. 3.1; Apoc. 12.10.
