Job 12:1-25
12 Tsayno niptinmi Job kayno nirqan:
2 “¡Achyä qamkunalanachaq yachaq kaykunkiqa!¡Qamkuna wanuptikiqa pipis yachaq kanmannaraqku!
3 Noqapis qamkunanölaqa tantiyämi.Qamkuna nishqaykikunataqa pïmaypis musyanmi.
4 “Noqaqa manami jutsata rurartsu kawarqä.Manakushqäta Tayta Dios mayamarqanmi.Tsayno kaptinpis kananqa amïgükuna asipämanmi.
5 Kikinkuna mana nakarmi nakaptï manakaqman churaman.Shakyätsimänanpa trukanqa qayapämashpanmi jaqayätsiman.
6 “Suwakunaqa ¿imanirtaq nakananpa trukan mas rïcuyan?Tayta Diosta rabyanätsiqkunapis ¿imanirtaq mana mantsakuypa kawapäkun?Paykunaqa yarpapäkun imano kawaptinpis Tayta Dios imaypis yanapashqantami.
7 “Jirka uywakunata y pishqukunata tapukäriy.Paykunami wilashunki.
8 Kay patsata y lamarcho pescädukunata tapukäriy.Paykunami tantiyatsishunki.
9 TAYTA DIOS kamashqankuna ¿manaku lapan tantiyatsimantsi imaykapis paypitaraq kashqanta?
10 Paypa makinchömi lapan kamashqankunapis kaykan.Paypa munayninchömi lapan runakunapis kaykan.
11 “Qalluntsiwan mikuypa gustunta mayashqantsinömi imata rimashqantapis mayar tantiyantsi rasun kaqta o manakaqkunata rimaykashqanta.*
12 “Mayor runakuna musyaq y yachaq kaptinpisy awkin runakuna tantiyakuq kaptinpis
13 Tayta Diosqa mas yachaq y munayniyuqmi kaykan.Paypitami yachaytapis y tantiyakuytapis chaskintsi.
14 Pay juchutsiptinqa manami pipis sharkatsiyta kamäpakuntsu.Carcilman runata wichqaptinqa manami pipis jorquyta kamäpakuntsu.
15 Pay mana tamyatsimuptinqa lapan qewapis tsakinmi.Fiyupa tamyatsimuptinqa loqlapis aywanmi.
16 Munayniyuqmi y tantiyakuqmi payqa kaykan.Musyanmi pï engañakuq kashqanta y pï engañashqa kashqantapis.
17 “Tayta Diosmi ali yätsikuqkunatapis mana tantiyakuq kananpaq upatakätsin.Juezkunatapis paymi upatakätsin.
18 Reykunatapis rey kaykashqanpita jorqurmi liyashqata prësu apatsin.
19 Cürakunatapis cüra kashqanpitami jorqun.Autoridäkunatapis autoridä kashqanpitami jorqun.
20 Shumaq yätsikuqkunatapis mana yätsinanpaqmi qonqaykatsin.Mayor runakunapa yarpaynintapis upatakätsinmi.
21 Respitashqa autoridäkunata manakaqman churapäkunanpaqmi kamakätsin.Kalpayuqkunatapis kalpaynaq kananpaqmi kamakätsin.
22 “Pipis mana musyashqanta Tayta Diosmi musyan.Paypaqqa yanawyaykaq tsakaypis junaqnömi kaykan.*
23 Paymi nacionkunata jatunyätsin y ushakätsin.Runakunata maytsaypa qarqurkurpis yapaymi shuntan.
24 Mandaqkunapa yarpayninkunatapis qonqaykatsinmi.Nirkurmi chunyaq jirkacho pantakashqa purinanpaq kamakätsin.*
25 Tsaymi tsakaychöno tapra tapra puripäkun.Shinkashqa runakunanömi tsanka tsanka puripäkun”.
