Job 31:1-40
31 “Shonqulächömi yarpachakurqä pï jipashtapis mana rikapänäpaq ni mana munapänäpaq.
2 Mana ali kawaptintsiqa ali kawayta qomänantsipa trukan nakaykunalatami Tayta Dios kachamunqa.
3 Jutsata ruraptintsiqa premiuta qomänantsipa trukan castigamäshunmi.
4 Tayta Diosqa imata rurashqätapis rikaykämanmi.Payqa musyaykanmi imano kawashqätapis.
5 “Lutankunataqa manami rurashqätsu.Pitapis manami lulapashqätsu.
6 Balanzanwan pësaqno Tayta Dios juzgamätsun.Tsaynöpami musyanqa jutsaynaq kashqäta.
7 Mana alikunataqa manami imatapis rurashqätsu.Pipa imantapis manami munapashqätsu ni suwapashqätsu.
8 Tsaykunata rurashqa kaptïqa murushqätapis juk runakunana mikukutsun.Plantashqätapis sapipita lukiritsun.
9 “Warmikunata munapashqa kaptïqa o runayuq warmita engañashqa kaptïqa
10 warmïpis jukpa warmin kakutsun.Jäpa runakunapis warmïwan täkutsun.
11 Tsayno karqa pasaypa penqaypaqchari käman.Tsayno kaptïqa castigamanqachari.
12 Tsayno shanaripakushqa karqa wanuymanpis chayämanchi.Lapan imaykäkunapis ushakanmanchari.
13 “Ashmaynïkuna warmipis olqupis quejakamaptin imaypis cäsuqmi kä.
14 Mana cäsushqa karqa ¿imataraq ruräman Tayta Dios juzgamaptin?Imano kashqätapis tapumaptin ¿imataraq nïman?
15 Noqa yurinäpaq kamakätsishqannölami ashmaynïkuna yurinanpaqpis Tayta Dios kamakätsishqa.Noqata kamamashqannölami paykunatapis kamashqa.
16 “Waktsakuna manakamaptinqa imaypis melqaparkuqmi kä.Viüdakunatapis mikunanpaq apariparkuqmi kä.
17 Kikilä mikunäpa trukanqa waktsakunatapis qaraqmi kä.
18 Mözu kashqäpita patsami waktsakunapa taytanno kashqä.Wamra kashqäpita patsami viüdakunata yanapashqä.
19 Röpaynaq kar qasätsikuptinpis o imalanpis pitukunanpaq mana kaptinpis kamaripaqmi kä.
20 Uyshäkunapa milwanta awatsir jatipaptïmi pasaypa kushikur agradëcikamaq.
21 “Munayniyuq kashpäpis manami waktsakunata autoridäkunawan castigatsiqtsu kä.
22 Tsayno castigatsishqa kaptïqa rikräkuna pakir yarqukätsun.
23 Noqaqa imaypis Tayta Diospa castïgunta mantsakushqämi.Pay castigamaptinqa manami imanöpapis salvakümantsu.
24 “Qorimanqa manami yärakushqätsu.Ni rïcu kashqämanpis manami atiënikushqätsu.*
25 Mayjina rïcu karpis manami orgullösutsu kä.
26 “Inti chipchipyar jeqamuptinpis ni killa junaqnöraq atsikyämuptinpis manami tsaykunata adorashqätsu.
27 Tsaykunata adorar manami makïta mutsashqätsu ni pakaylapapis adorashqätsu.*
28 Tsayno ruraptïqa Tayta Dios castigamanmanchari karqan.Munayniyuq Tayta Diostapis ñëgämanchari karqan.
29 “Chikimaqnïkunata desgracia pasaptinpis manami kushiparqätsu ni paqchiparqätsu.*
30 Paykunataqa manami imaypis maldicionashqätsu.Wanunanpaqpis manami manakushqätsu.
31 “Wayïcho kaqkunaqa lapanpis saksashqanyaqmi mikupäkuq.
32 Jäpa runa chayamuptinqa manami cällicho kachaykuqtsu kä.Tsaypa trukanqa wayïchömi patsatsiq kä.
33 “Wakin runa jutsa rurashqanta ñëgaptinpis noqaqa manami ñëgaqtsu kä.Mana alita rurashqäkunatapis manami amuraqtsu kä.
34 Jutsata rurashqäpita runakuna y aylükuna jamurpämänan kaptinpis perdontami manakuq kä.
35 “¡Alimi kanman defiendikushqäta Tayta Dios mayamaptin!Jutsaynaq kashqätaqa juk papilman qelqarkurpis firmämanmi.Lapanpaq munayniyuq Tayta Diospis jutsaynaq kashqäta qelqatsun.
36 Tsay qelqashqantami umrukurkur y corönatanöraq umäman jatikurkur mana penqakuypa purïman.
37 Mana penqakuypa Tayta Diospa nawpanman aywaykurmi lapan rurashqäta wilapäman.
38 “Chakräkuna noqapita manami jaqayantsu ni castigamänanpaq Tayta Diosta qayakuntsu.Chakrächo rawaykunapis manami Tayta Diosta waqapantsu.*
39 Pipa mikuynintapis manami dembaldilaqa mikushqätsu.Arupakuq runakunata mana pägaypa manami imaypis arutsishqätsu.
40 Tsayno rurashqa kaptïqa trïgu wayunanpa trukan kashakunalana winamutsun.Cebäda wayunanpa trukanpis mana ali jachakunalana jeqamutsun”.Tsayno nirmi Job parlayta usharqan.
Ichic wilacuycuna
^ 31.24 Sal. 49.6; 52.6-7.
^ 31.26-27 Deut. 4.19.
^ 31.29 Prov. 24.17.
^ 31.38 Éxo. 23.10-11; Lev. 18.25, 28; 19.19; Núm. 35.33-34.
