Juan 18:1-40
18 Tayta Diosta manakurirnami Jesúsqa discïpulunkunawan Cedrón raqrapa tsimpanman pasar jatun huertaman yaykapäkurqan.*
2 Tsayman discïpulunkunawan cadala aywashqa kaptinmi Jesústa rantikuq Judas musyarqan tsayman aywashqanta.
3 Tsaymi Jesústa prësu tsaripäkunanpaq atskinkunawan y espädankunawan wardiakunata y atska soldädukunata pushakurkur Judas aywarqan. Tsay wardiakunata y soldädukunatami mandaq cürakuna y *fariseukuna kacharqan.
4 Lapan pasananpaq kaqkunata musyarmi Jesúsqa prësu tsarinanpaq aywaq runakunata tinkupaykur tapurqan kayno nir: “¿Pitataq ashirkaykanki?”
5 Tsawraqa kayno nipäkurqan: “Nazaretpita kaq Jesústami ashirkaykä”.
Tsawraqa Jesús kayno nirqan: “NOQAMI KÄ”.*
(Jesústa rantikuq Judaspis tsaychömi kaykarqan.)
6 “NOQAMI KÄ” niptinmi ankalaypa tunipäkurqan.
7 Tsawraqa yapay tapurqan kayno nir: “¿Pitataq ashirkaykanki?”
Niptinmi yapay nipäkurqan: “Nazaretpita kaq Jesústami”.
8 Tsawraqa Jesús kayno nirqan: “Maynami nishqä: ‘NOQAMI KÄ’. Noqata ashimarqa noqalata prësu tsaripäkamay. Kay runakunataqa ama tsaripäkuytsu”.
9 Tsayno kananpaqmi nawpata manakur Tayta Diosta kayno nirqan: “Makïman churamushqayki runakunata manami mayqantapis oqrashqätsu”.*
10 Tsawraqa Simón Pedro espädanta jorqurir juk runapa alawqa kaq rinrinta roquriykurqan. Tsay runaqa karqan mas mandaq cürapa ashmaynin Malcumi.
11 Tsawraqa Pedruta Jesús kayno nirqan: “¡Espädaykita kutitsiy! Taytä qomashqan cöpata ¿manaku upüman?”* *
Mas mandaq cürapa wayinman Jesústa apashqan
Mateo 26.57-58; Marcos 14.53-54; Lucas 22.54
12 Tsaypitanami capitanninwan soldädukuna y templu täpaq wardiakunapis Jesústa prësu tsarirkur liyapäkurqan.
13 Nirkurnami Caifáspa suedrun Anáspa wayinman apapäkurqan. Tsay wataqa Caifásmi mas mandaq cüra kaykarqan.
14 Paymi autoridä mayinkunata nawpata kayno nirqan: “Lapantsi wanunantsipa trukanqa mas alimi kanman juk runala wanuptin”.*
Jesústa Pedro ñëgashqan
Mateo 26.69-70; Marcos 14.66-68; Lucas 22.55-57
15 Simón Pedrunami juk discïpulu mayinwan Jesúspa qepanta aywapäkurqan. Tsay discïpulumi mas mandaq cürawan reqinakushqa kar sawan rurinman yaykurqan.
16 Pedrunami punkulacho quëdakuykurqan. Tsaymi ruriman yaykuq discïpuluqa punku kichaq warmita ruwakurqan Pedrutapis yaykatsinanpaq.
17 Tsawraqa tsay warmi Pedruta tapurqan kayno nir: “¿Manaku qampis taqay runapa discïpulun kaykanki?”
Tsawraqa Pedro kayno nirqan: “Manami”.
18 Tsaypitanami fiyupa qasaptin ashmaykuna y templu täpaq wardiakunapis ninata ratarkatsir mashakurkaykarqan. Paykunawanmi Pedrupis mashakuykarqan.
Mas mandaq cüra Anás Jesústa tapushqan
Mateo 26.59-66; Marcos 14.55-64; Lucas 22.66-71
19 Tsaypitanami mas mandaq cüra Jesústa tapurqan kayno nir: “¿Pitaq discïpuluykikuna? ¿Imatataq yachatsinki?”
20 Tsawraqa Jesús kayno nirqan: “Noqaqa manami imatapis pakaylapa yachatsishqätsu. *Sinagögakunacho y templuchöpis yachatsishqäta lapan runakunami mayapäkamashqa.
21 ¿Imanirtaq noqata tapumanki? Yachatsishqäta mayamaq runakunata tapumuy. Paykunami musyapäkun imata yachatsishqätapis”.
22 Tsayno niptinmi juk wardia Jesústa laqyaykur kayno nirqan: “¿Tsaynöku mas mandaq cürata contestanki?”
23 Tsawraqa Jesús kayno nirqan: “Mana alita parlashqa kaptïqa tantiyatsimay. Imatapis lutanta mana parlaykaptïqa ¿imanirtaq laqyamanki?”
24 Nirkurnami liyashqalata Anás apatsirqan mas mandaq cüra Caifás kaqman.*
Jesústa Pedro yapay ñëgashqan
Mateo 26.71-75; Marcos 14.69-72; Lucas 22.58-62
25 Simón Pedro mashakuykaptinmi yapay tapupäkurqan kayno nir: “Qampis ¿manaku taqay runapa discïpulun kaykanki?”
Tsawraqa Pedro kayno nirqan: “Manami”.
26 Maylantanami mas mandaq cürapa ashmayninpis kayno nirqan: “Qamta paywan kaykaqtami huertacho rikashqä”.
(Tsayno niq runapa aylunpa rinrintami Pedro roqurirqan.)
27 Tsawraqa Pedro yapay ñëgarqan. Tsay hörami gällu cantarkurqan.
Pilatuman Jesústa prësu apashqan
Mateo 27.1-2, 11-14; Marcos 15.1-5; Lucas 23.1-5
28 Patsa waraykaptinnami Caifáspa wayinpita Roma gobernadorpa despächunman Jesústa apapäkurqan. Israel autoridäkunaqa tsay despächuman yaykuyta manami munapäkurqantsu. Paykuna yarparqan tsayman yaykurqa *impüru rikakushpan *Pascua mikuykunata mana mikupäkunanpaq kashqantami.
29 Tsawraqa despächunpita yarqurir *Pilato tapurqan kayno nir: “¿Ima jutsanpitataq kay runata apapäkamushqanki?”
30 Tsawraqa kayno nipäkurqan: “Jutsayuq kaptinmi apamushqä. Jutsaynaq kaptinqa manami apamümantsu karqan”.
31 Tsawraqa Pilato kayno nirqan: “Leynikikuna nishqanno juzganaykipaq apakäriy”.
Tsayno niptinmi Israel runakunapa autoridäninkuna kayno nipäkurqan: “Noqakuna pitapis wanutsinäpaq manami munayniyuqtsu karkaykä”.
32 Tsayno nirmi cruzcho wanunanpaq Jesús nishqanta cumplipäkurqan.*
33 Tsawraqa despächunman Pilato kutiykur Jesústa qayaykur tapurqan kayno nir: “¿Rasunpaku Israel runakunapa mandaqnin rey kaykanki?”
34 Tsaymi Jesús kayno nirqan: “¿Kikikipa yarpaynilaykipitaku o runakuna nishushqaykipitaku tsayno tapuykämanki?”
35 Tsayno niptinmi Pilato kayno nirqan: “Noqa manami Israel runatsu kä tsaykunata musyanäpaqqa. Marka mayikikunawan mandaq cürakunami prësu apamushushqanki. ¿Imatataq rurashqanki prësu apamushunaykipaq?”
36 Tsawraqa Jesús kayno nirqan: “Noqa manami kay patsacho mandaqtsu kaykä. Kay patsacho mandaq kaptïqa prësu tsarimaqkunawan discïpulükuna pelyapäkunmanmi karqan”.
37 Tsayno niptinmi Pilato kayno tapurqan: “Tsayno nirqa ¿rasunpaku rey kaykanki?”
Tsawraqa Jesús kayno nirqan: “Rasun kaqtami niykanki. Rasun kaqta wilakunäpaqmi kay patsacho yurishqä y tsaypaqmi kay patsaman shamushqä. Pipis rasun kaqta musyayta munarqa wilakushqäkunata chaskikunmi”.
38 Tsayno niptinmi Pilato kayno nirqan: “¡Imaraq tsay rasun kaqqa kakunpis!”
Jesústa crucificananpaq Pilato mandashqan
Mateo 27.15-31; Marcos 15.6-20; Lucas 23.13-25
Jesústa tapurkushpanmi despächunpita *Pilato yapay yarqurir Israel runakunata kayno nirqan: “Noqa manami kay runapa ima jutsantapis tarïtsu.
39 Qamkuna musyankimi *Pascua fiestacho cada wata juk prësuta kacharishqäta. ¿Munapäkunkiku Israel runakunapa mandaqnin reyta kacharinäta?”
40 Tsayno niptin lapan kayno nipäkurqan: “¡Jesústaqa ama kachariytsu! ¡Barrabásta kachariyqa!”
Barrabás karqan Romacho mas mandaq reypa contran sharkuqmi.
Ichic wilacuycuna
^ 18.1 Mat. 26.36; Mar. 14.32.
^ fariseo runa Fariseukunaqa Moisés qelqashqan leykunata lapantami yachakärirqan. Tsay leykuna jananmanmi mas leykunata y costumbrikunata yapapäkurqan (Mar. 7.1-4). Tsaykunata yachaykarpis runa mayinta manami kuyarqantsu (Mat. 16.5-12; 23.1-36).
^ 18.5 Noqami Kä nirqa Jesucristo tantiyatsirqan kikin Dios kashqantami. Tsaypita masta musyanaykipaq liyinki Éxo. 3.14; Juan 10.30-33.
^ 18.9 Juan 17.12.
^ 18.11 Tayta Diospa cöpanqa mana cäsukuq runakunata castigashqanmi kaykan. Tsaymi tsay cöpata upunanpaq Jesús nirqa Diosta mana cäsukuq runakunapa trukan castigashqa kananpaq kashqanta nirqan.
^ 18.14 Juan 11.49-50.
^ sinagöga Sinagögaqa Israel runakuna juntakänan wayimi karqan. Tsaymanmi juntakäriq Tayta Diosta manakärinanpaq, Moisés qelqashqan leykunata yachakärinanpaq, sesionkunata rurapäkunanpaq y wamrakuna liyiyta yachakärinanpaq (Mar. 1.21; Juan 9.34; Hech. 15.21).
^ 18.24 Anás mas mandaq cüra kaptinpis Roma runakuna payta qarqurirmi mashan Caifásta churarqan mas mandaq cüra kananpaq.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ 18.32 Juan 3.14; 12.32.
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
