Juan 19:1-42
19 Tsayno nipäkuptinmi Jesústa Pilato astatsirqan.
2 Soldädukunanami kashapita corönata awaykur Jesúspa umanman jatiparqan. Tsaynöpis granäti cäpatami ayluparqan.*
3 Nirkurnami Jesústa laqyashpan kayno nipäkurqan: “¡Alabashqa katsun Israel runakunapa mandaqnin rey!”
4 Tsaypitanami despächunpita yapay yarqaramur Pilato kayno nirqan: “Tantiyakäriy. Apapäkamushqayki runapa ima jutsantapis manami tarïtsu. Tsaymi jutsaynaq kashqanta tantiyapäkunaykipaq jorqamushaq”.
5 Tsayno nirmi Jesústa jorqamurqan kasha corönan jatishqata y granäti cäpan jatishqata. Tsaymi Pilato kayno nirqan: “¡Rikapäkuy kay runata!”
6 Jesústa rikaykurmi mandaq cürakuna y templu täpaq wardiakunapis qayarar kayno nipäkurqan: “¡Crucificay! ¡Crucificay!”
Tsayno niptinmi Pilato kayno nirqan: “Kikikikuna crucificapäkuy. Noqa manami ima jutsantapis tarïtsu”.
7 Tsayno niptinmi kayno nipäkurqan: “Diospa Tsurin tukuqkunata wanutsipäkunäpaqmi leynïkunacho qelqaraykan. ¡Tsayno kaptinqa tsay runa wanutsishqa katsun!”
8 Tsayno niptinmi Pilato fiyupa mantsakarqan.
9 Tsaymi despächunman kutiykur Jesústa yapay tapurqan kayno nir: “¿Qam maypitataq kaykanki?”
Tsayno tapuptin Jesús manami imatapis parlakurqantsu.
10 Tsaymi Pilato kayno nirqan: “¿Manaku imatapis contestamanki? ¿Manaku musyanki crucificatsinäpaq o kacharinäpaqpis munayniyuq kashqäta?”
11 Tsayno niptinmi Jesús kayno nirqan: “Qampa makikiman Tayta Dios mana churamaptinqa imata ruramänaykipaqpis munayniki manami kanmantsu. Tsaymi makikiman churamaq runa qampita mas jutsayuq kaykan”.
12 Tsayno niptinmi Pilato kachariyta munarqan. Kachariyta munaptinpis Israel runakunapa autoridäninkuna masraqmi kayno nir qaparparqan: “¡Kay runaqa rey tukurmi mandaq *Césarpa contran sharkushqa! ¡Payta kacharirqa qampis Césarpa contranmi kanki!”
13 Tsawraqa Jesústa waqtaman jorqaykatsimur Gábata nishqan alarman aywaykur Pilato jamakurqan. (Hebreo idiömachöqa Gábata nishqanqa “läja rumikunawan rurashqa” ninanmi.)
14 Tsay höraqa karqan pulan junaqnömi. Tsay tardimi Pascua fiestacho jamay junaq qalaykunanpaqna karqan.* Tsaychömi Pilato kayno nirqan: “¡Mandaqniki reyta rikapäkuy!”
15 Tsawraqa fuertipa kayno nipäkurqan: “¡Wanutsun! ¡Wanutsun! ¡Crucificay!”
Tsaymi Pilato kayno nirqan: “¿Mandaq reynikitaku crucificatsishaq?”
Tsawraqa mandaq cürakuna kayno nipäkurqan: “¡Noqakunapa mandamaqnï reyqa Césarlami! ¡Paypita mas juk reyqa manami kantsu!”
16 Tsayno nipäkuptinmi paykuna munashqanno soldädukunata Pilato mandarqan Jesústa crucificananpaq. Tsawraqa Jesústa apakärirqan.
Jesústa crucificashqan
Mateo 27.32-44; Marcos 15.21-32; Lucas 23.26-43
17 Cruzta umruparkurmi Jesústa apapäkurqan Calavëra nishqanman. Hebreo idiömachöqa Calavëra nishqanta Gólgota nipäkunmi.
18 Tsayman chayaykatsirnami Jesústa crucificarqan. Tsaynölami ishkay runakunatapis Jesúspa ishkan lädunman crucificarqan.
19 Tsaypitanami juk letrëruta qelqarkur cruzpa puntanman *Pilato laqatsirqan. Tsay letrëruchömi kayno nirqan: “Nazaretpita kaq Jesús, Israel runakunapa mandaqnin rey”.
20 Jerusalénpa cercalancho crucificashqa kaptinmi atska Israel runakuna liyipäkurqan tsay letrëruta. Tsay letrëruqa hebreo, latín y griego idiömakunachömi qelqararqan.
21 Tsaymi mandaq cürakuna Pilatuta kayno nipäkurqan: “ ‘Israel runakunapa mandaqnin rey’ nirqa ama qelqarätsuntsu. Tsaypa trukanqa kayno nir qelqarätsun: ‘Israel runakunapa mandaqnin rey kashqantami kay runaqa nirqan’ ”.
22 Tsayno niptinmi Pilato kayno nirqan: “Qelqatsishqäqa qelqashqanami kaykan”.
23 Crucificaykurnami Jesúspa röpankunata chusku soldädukuna aypunakurqan. Rurin kaq tünican costüraynaq kaptinmi
24 kayno nipäkurqan: “Kaytaqa ama rachishuntsu. Tsaypa trukanqa suertita jitashun mayqantsipis apakunantsipaq”.
Tsayno rurarmi Tayta Diospa palabran kayno nishqanta cumplirqan: “Röpätapis rakipänakushqami. Mayqanpis apakunanpaqmi suertita jitapäkushqa”.* Tsay nishqannölami soldädukuna rurapäkurqan.
25 Crucificaraykashqan kaqchömi kaykarqan Jesúspa maman, mamanpa nanan, Cleofaspa warmin María y María Magdalenapis.
26 Mamanta y kuyashqan discïpulun nawpancho kaykaqta rikärirmi Jesús kayno nirqan: “Mamä, paynami wawayki kanqa”.
27 Nirkurnami kuyashqan discïpuluntapis kayno nirqan: “Kananqa mamaykitano rikaykulanki”.
Tsayno nishqanpita patsami wayinman pusharkur mamantano rikarqan.
Jesús wanushqan
Mateo 27.45-56; Marcos 15.33-41; Lucas 23.44-49
28 Lapanpis cumplishqana kashqanta musyarmi Tayta Diospa palabran cumplikänanpaq Jesús kayno nirqan: “¡Yakulaw!”*
29 Tsaychömi puyñu junta pochquq vïnu kaykarqan. Tsaymi *hisöpu jachaman esponjata watarkur tsay pochquq vïnuman ushmarkatsir Jesús shoqunanpaq shiminman jatiparqan.
30 Tsay vïnuta yawarkurmi Jesús kayno nirqan: “Lapantanami cumplishqä”.
Tsayno nirkushpanmi wanurqan.
Jesústa tuksishqan
31 *Pascuacho jamay junaq qalaykunanpaqna kaptinmi* Israel runakunapa autoridäninkuna munarqantsu jamay junaqcho pipis crucificaränanta. (Pascuacho jamay junaqqa pasaypa *sagrädumi karqan.) Tsawraqa Pilatuta manakurqan cruzcho wanuyta nakaykaqkunapa chankankunata pakirkur cruzpita jorqunanpaq.*
32 Manakushqanta awniptinmi soldädukuna aywaykur Jesúswan crucificaraykaq runakunapa chankankunata pakirqan.
33 Jesús wanushqana kaykaqta rikarmi paypa chankankunataqa mana pakirqannatsu.
34 Tsaypa trukanqa juk soldädumi lanzawan lapsha pachanpa tuksirqan. Tsaymi yawarwan yaku jukla yarqamurqan.
35 Lapan tsaykunatami rikarqä. Tsawraqa imano kashqantapis qelqaykä salvamaqnintsi Cristo kashqanta qamkunapis criyipäkunaykipaqmi. Lapan qelqashqäkunaqa rasun kaqmi kaykan.
36 Tayta Diospa palabranpis kaynömi niykan: “Manami ni juk tululantapis pakinqatsu”.*
Lapan tsaykuna pasarqan Tayta Diospa palabran cumplikänanpaqmi.
37 Tsaynölami Tayta Diospa palabran kayno niykan: “Tuksishqantami rikapäkunqa”.*
Jesústa pampashqan
Mateo 27.57-61; Marcos 15.42-47; Lucas 23.50-56
38 Tsaypitami Arimatea markapita José jutiyuq runa Pilatuta ruwakur kayno nirqan: “Jesúspa ayanta pampaq apanäpaq kachapaykalämay”.
Josépis Jesúspa discïpulunmi karqan. Itsanqa Israel autoridäkunata mantsakushpanmi musyatsikurqantsu. Manakushqanta *Pilato awniptinmi Jesúspa ayanta pampaq apakurqan.
39 Tsaymanmi Nicodemupis aywarqan kimsa arröbano mïrra y áloe takushqata* apakurkur. Nawpatami Nicodemo tsakaylapa Jesúswan parlaq aywarqan.*
40 Israel runakunapa costumbrin kashqannömi José y Nicodemo tsay apashqankunata säbanasman winapaylapa Jesúspa ayanta piturqan.
41 Jesústa crucificashqan nawpanchömi karqan juk huerta. Tsaychömi karqan pitapis manaraq pampashqan mushuq sepultüra.*
42 Jamay junaq qalaykunanpaqna kaptinmi tsay sepultüralamanna Jesústa pampapäkurqan.
Ichic wilacuycuna
^ 19.2 Granäti cäpataqa reykunalami jatikuq.
^ César Césarqa manami runapa jutintsu karqan, sinöqa Roma nacioncho mandaq rey ninanmi. Césarqa Romapita patsami atska nacionkunata mandarqan. Jesucristo yurishqan witsan mandaq kaykarqan Augusto Césarmi (Luc. 2.1). Paymi Herodesta churarqan Israel nacioncho rey kananpaq. Augusto Césartami trukarqan Tiberio César. Tiberio César mandaq karqan Bautizaq Juan wilakunan witsanmi (Luc. 3.1). Tiberio Césartanami trukarqan Calígula César. Paytanami trukarqan Claudio César. Claudio César mandaq kaykaptinmi apóstol Pablo wilakur purirqan (Hech. 11.28; 18.1). Claudio Césartanami trukarqan Nerón César. Nerón César mandaq kaykaptinmi apóstol Pablo Romacho wanurqan (Juan 19.12).
^ 19.14 Israel runakunapaqqa mushuq junaq qalaykurqan las seis tardimi.
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ 19.24 Sal. 22.18.
^ 19.28 Sal. 69.21.
^ hisöpu Hisöpuqa muñä jachanömi kaykan. Israel runakuna impüru kashqanpita püru kananpaqmi hisöpu jachata yawarman ushmarkatsir tsaqtsupaq (Éxo. 12.22; Núm. 19.18; Sal. 51.7; Heb. 9.19).
^ Pascua fiesta Pascua fiestata Israel runakuna rurapäkun Tayta Dios Egiptupita jorqamushqanta yarpapäkurmi. Moisés qelqashqan leykunacho nishqannölami lapan olqu kaqkuna chunka ishkay watayuqpita janaman tsay fiestaman aywapäkuq. Warmikunapis tsay fiestaman aywapäkuqmi (Éxo. 12.1-28; Deut. 16.1-8; Mar. 14.12; 1Cor. 5.7).
^ 19.31b Crucificaraykaqpa chankankunata pakipäkuq jukla wanunanpaqmi. Pakirkuptinnami jämayta kachananpaq kalpakuyta mana kamäpakushpan jämaytsaypa wanuq.
^ sagrädu Liyinki santupita tantiyatsikuyta.
^ 19.31a Pascuaqa qalaykurqan las seis tardimi.
^ 19.36 Éxo. 12.46; Núm. 9.12; Sal. 34.20.
^ 19.37 Zac. 12.10.
^ Pilato, Poncio Pilato Poncio Pilatuqa Judea provinciachömi mandaq karqan. Tsaycho mandaq kananpaqmi Romacho mandaq César churarqan. Mandaq karmi munayniyuq karqan Césarpa contran sharkuqkunata wanutsinanpaq. Tsaymi Israel autoridäkuna Pilatumanraq Jesucristuta apapäkurqan crucificaypa wanutsinanpaq (Hech. 4.27; 1Tim. 6.13).
^ 19.39 Mïrra karqan yörapa weqinmi. Áloepis karqan juk yörami. Tsaykunatami Israel runakuna tsakirkatsir ñutqu aqapäkuq. Tsaytami ayaman winaq mana asyänanpaq.
^ 19.39 Juan 3.1-2.
^ 19.41 Mat. 27.60.
