Mateo 25:1-46
25 “Tayta Dios *mandaykashqan imano kashqantapis wilapäshayki. Chunka jipashkunashi atskinkunata apakurkur shuyarpaq aywarqan casarakuq mözu chayamuptin fiestaman yaykunanpaq.
2 Pitsqa kaq jipashkunashi ali yarpayniyuq karqan. Pitsqa kaqnashi yarpayniynaq karqan.
3 Yarpayniynaq kaqkunaqa manashi atskinkunaman yapananpaq aceitita apapäkurqantsu.
4 Ali yarpayniyuq kaq jipashkunashi itsanqa atskikunanpaq aceitita aparqan.
5 Casaraq mözu jukla mana chayaptinshi tsay jipashkuna shuyarpaykashqalancho punukäkurqan.
6 “Pulan paqasnashi juk runa qayakurqan kayno nir: ‘¡Casarakuq mözu aywaykämunnami! ¡Chaskikunaykipaq yarqupäkamuy!’
7 Tsayshi lapan jipashkuna sharkur atskinkunata ratatsirqan.
8 Atskin upikaptinshi yarpayniynaq jipashkunaqa ali yarpayniyuq kaqkunata manakurqan kayno nir: ‘Atski upikaykannami. Aceitikita qaraykalämay*’.
9 Tsayno niptinshi ali yarpayniyuq kaqkuna kayno nirqan: ‘Mana pishïpämänantsipaq ayway aceiti rantikuqkunapita jukla rantipäkamuy’.
10 “Aceiti rantiq aywashqanyaqshi casaraq mözu chayarqan. Tsayshi kamarikushqa shuyarpaykaq jipashkunawan fiestaman yaykurqäriptin punku wichqakäkurqan.
11 Tsaypitanashi aceiti rantiq aywaq jipashkunaqa kutiykur tarirqan punku wichqaraykaqta. Tsayshi qayakurqan kayno nir: ‘¡Tayta, tayta! ¡Punkuta kichapaykalämay!’
12 Tsayno qayakuptinshi casarakuq mözu ruripita kayno nimurqan: ‘Qamkunataqa manami reqïtsu. ¡Piraq kakunkipis!’ ”*
13 Tsayno wilaparkurmi Jesús kayno nirqan: “¡Qamkunapis mayaq mayaqla karkaykay! Manami musyapäkunkitsu imay junaq ni imay höra [*Runapa Tsurin kutimunanpaq kashqantapis]”.
Ashmayninkunata patronnin qellayta kachapashqan
Lucas 19.11-27
14 “Tayta Dios *mandaykashqan imano kashqantapis wilapäshayki. Juk runashi karupa aywakunanpaq ashmayninkunata qayaykur qellayninta arutsinanpaq kachaparqan.
15 Habilidäninkuna imano kashqantapis tantiyaykurshi jukta pitsqa talentu* qellayta kachaparqan, jukninta ishkay talentu qellayta kachaparqan y juknintanashi juk talentu qellayta kachaparqan. Nirkurnashi karu markapa aywakurqan.
16 Pitsqa talentu qellayta chaskiq kaqqa negociuta rurarshi pitsqa talentu masta miratsirqan.
17 Ishkay talentu qellayta chaskiq kaqpis negociuta rurar ishkay talentu mas qellaytashi miratsirqan.
18 Juk talentu qellayta chaskiq kaqshi itsanqa pampata uchkuykur pakaykurqan.
19 “Patronnin unayta kutiykurnashi qellayninta kachapashqanpita cuentata manarqan.
20 Tsayshi pitsqa talentu qellayta chaskiq kaqqa pitsqa talentu mas qellayta entregar kayno nirqan: ‘Tayta, pitsqa talentu qellayta kachapämashqaykiwan pitsqa talentu mastami miratsishqä’.
21 “Tsayno niptinshi patronnin kayno nirqan: ‘Ali ashmaymi qam kanki. Walkalapitapis qellayta miratsishqaykipitami mas mandaq kanaykipaq churashayki. Wayïman yaykamuy fiestata rurar kushikunantsipaq’.
22 “Tsaynölashi ishkay talentu qellayta chaskiq kaqpis kayno nirqan: ‘Tayta, ishkay talentu qellayta kachapämashqaykiwan ishkay talentu mastami gänashqä’.
23 “Niptinshi patronnin kayno nirqan: ‘Ali ashmaymi kanki. Walkalapitapis shumaq miratsishqaykipitami mas mandaq kanaykipaq churashayki. Wayïman yaykamuy fiestata rurar kushikunantsipaq’.
24 “Juk talentu qellayta chaskiq ashmayninshi itsanqa kayno nirqan: ‘Noqa musyämi mana kuyapäkuq kashqaykita, tayta. Qamqa mana murushqaykipitami cosechanki. Mana uryashqaykipitami shuntanki.
25 Tsayno kaptikimi mantsakur qellaynikita pampaykurqä. Kä qellayniki, tayta. Kashqalantami apamushqä’.
26 “Niptinnashi patronnin kayno nirqan: ‘¡Qamqa mana yärakuypaq qela ashmaymi kanki! Mana murushqäpita cosechashqäta musyaykar y mana uryashqäpita shuntashqäta musyaykarqa
27 qellaynïta banculamanpis churaykunkiman karqan kutimur wawantinta shuntanäpaq’.
28 “Nirkurnashi tsaycho kaykaq runakunata kayno nirqan: ‘¡Tsararashqan qellaynïta qechurir qoykuy chunka talentu qellay tsararaqta!
29 Yärakuypaq kaqtaqa mastami kamaripäshaq. Mana yärakuypaq kaqtami itsanqa tsararashqalantapis qechushaq.*
30 Kay yarpayniynaq ashmayta yanawyaykaq tsakayman jitarpamuy. Tsaychömi fiyupa waqar kiruntapis uchunqa’ ”.*
Juiciu final junaqcho imano kananpaq kashqanpis
31 “*Runapa Tsurin chipchipyaykar *santu *angilninkunawan shamurmi* chipchipyaykaq trönunman jamaykunqa.*
32 Tsay junaqmi maytsay nacionpitapis lapan runakuna nawpanman juntakanqa. Tsaychömi mitsikuq runa uyshakunata cabrakunapita rakishqanno runakunata rakinqa.
33 Uyshakunatami alawqanman rakinqa y cabrakunatanami itsuqninman rakinqa.
34 “Alawqancho kaykaqkunatami kayno ninqa: ‘Qamkunataqa pasaypami Taytä kuyapäkushunki. Tayta Dios *mandaykashqanman yaykunaykipaq shapäkamuy. Kay patsata manaraq kamarmi mandashqantaqa qamkunapaq Taytä kamarishqa.
35 Qamkunaqa mikanaptïpis qaramashqankimi. Yakunaptïpis yakuta makyamashqankimi. Jäpa kaptïpis patsatsimashqankimi.
36 Qarala kaykaptïpis röpata kamaripämashqankimi. Qeshyaptïpis jampimashqankimi. Carcilcho wichqaraptïpis watukamashqankimi’.*
37 “Tsayno niptinmi tsay ali ruraqkuna kayno nir tapunqa: ‘Tayta, ¿imaytaq mikanaptiki qarashqä? ¿Imaytaq yakunaptiki yakuta makyashqä?
38 ¿Imaytaq jäpa kaptiki patsatsishqä? ¿Imaytaq qarala kaptiki röpata kamaripashqä?
39 ¿Imaytaq qeshyaptiki o carcilcho wichqaraptiki watukuq shamushqä?’
40 Tsayno niptinmi rey kayno ninqa: ‘Rasunpami kayno nï: Pitapis tsayno nakaqkunata kuyaparqa noqatami kuyapämashqanki’.*
41 “Nirkurmi itsuqnincho kaykaq runakunata kayno ninqa: ‘¡Maldicionädukuna, nawpäpita witikäriy! ¡Diablupaq y angilninkunapaq kamarishqa imaypis mana upiq ninaman aywapäkuy!
42 Qamkunaqa mikanaptïpis manami qaramashqankitsu. Yakunaptïpis manami yakuta makyamashqankitsu.
43 Jäpa kaykaptïpis manami patsatsimashqankitsu. Qarala kaykaptïpis manami röpata kamaripämashqankitsu. Qeshyaptïpis ni carcilcho wichqaraptïpis manami watukamashqankitsu’.
44 “Tsayno niptinmi itsuqnincho kaq runakunapis kayno nir tapunqa: ‘Tayta, ¿imaytaq qam mikanaykaqta, yakunaykaqta, jäpa kaykaqta, qaralata, qeshyaykaqta, carcilcho wichqaraykaqta rikaykar mana yanapashqätsu?’
45 Tsawraqa paykunata kayno ninqa: ‘Rasunpami kayno nï: Pitapis tsayno nakaqkunata mana kuyaparmi noqata mana kuyapämashqankitsu’ ”.*
46 Tsayno wilaparkushpanmi Jesús kayno nirqan: “Tsay mana kuyapäkuq runakunaqa imayyaqpis castigashqami kanqa. Tayta Dios munashqanno kuyapäkuq runakunami itsanqa mana ushakaq kawayta taripäkunqa”.*
Ichic wilacuycuna
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 25.8 Wakin runakunaqa regalaykalämay nipäkun.
^ 25.11-12 Luc. 13.25.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 25.15 Juk talentu karqan juk runa ishkay chunka (20) wata arur gänashqannömi.
^ 25.29 Mat. 13.12; Mar. 4.25; Luc. 8.18.
^ 25.30 Mat. 8.12; 22.13; Luc. 13.28.
^ Runapa Tsurin Runapa Tsurinpaq parlarqa Jesucristo kikinpaqmi parlarqan (Juan 9.35-37). Tsaynöpami tantiyatsirqan Daniel 7.13-14-cho qelqaraykashqanno Runapa Tsurin kashqanta, kutimunanpaq kashqanta (Mat. 13.41-42; 24.27, 30, 44; 25.31) y lapanpaq munayniyuq kashqanta (Mar. 2.10; 2.28).
^ 25.31b Mat. 19.28.
^ 25.31a Mat. 16.27.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ mandaykashqan, Tayta Dios mandaykashqan Tayta Dios mandaykashqan nishqanqa Tayta Dios shamur fiyu runakunata ushakätsinanpaq y ali kawayta apamunanpaq kashqantami niykan (Isa. 13.9-10; 65.17-25; Joel 1.14-16; Zac. 14.9). Tayta Dios mandaykashqantami Israel runakuna atska wata shuyarqan (Mar. 15.43).
^ 25.45 1Cor. 8.12.
