Proverbios 9:1-18
9 Tantiyakuyshi wayinta ali sharkatsirqan.Kamaränanpaqshi qanchis tushakunata laqlaykur jawirqan.
2 Nirkurnashi uywakunata pishtarkur ali alilata yanukurqan.Tsaynöshi ali vïnuta rurarkur mikuytapis mësaman sirvirqan.
3 Sirvirkurnashi ashmayninkunata kacharqan marka janaqanman aywaykur qayakunanpaq.
4 Qayakurshi kayno nirqan: “¡Mana tantiyakuq mözukuna y jipashkuna!¡Fiestaman shapäkamuy!”Mana yarpachakuqkunatapis kayno nirshi qayakurqan:
5 “Yanukushqä mikuyta mikunaykipaq y rurashqä vïnuta upunaykipaq fiestaman shapäkamuy.
6 Mana ali ruraykunata kachapäkuy.Kacharirqa alimi kawankipaq.Tantiyakuq runano shumaq kawapäkuy”.
Tantiyakuq y mana tantiyakuq runa imano kashqanpis
7 Urkus* runaqa corrigiptikipis ashlishunkimi.Lutanta ruraykashqanta niptikipis olqüpäshunkimi.
8 Awilan ashmashqa runaqa anyapaptikipis chikishunkimi.Tantiyakuq runami itsanqa anyapaptikipis kuyashunki.
9 Tantiyakuq runaqa tantiyatsiptiki masmi tantiyakunqa.Ali runaqa yachatsiptiki masmi yachakunqa.
10 Tantiyakuq kaytaqa qalaykunki TAYTA DIOSTA *mantsakurmi.*Santu Tayta Diosta *reqiqkunaqa mas yachaqmi kaykan.*
11 Yachaq karqa atska watami kawankipaq.
12 Tantiyakuq karqa mas tantiyakuqmi rikakunkipaq.Awilan ashmashqa karqa mana ali rikashqami kankipaq.
Mana tantiyakuq kayta juiciuynaq warmiman tinkutsishqan
13 Mana tantiyakuq kayqa tulu shimi*, juiciuynaq y toqshun tsakishqa warminömi kaykan.
14 Wayi punkunman karpis o marka janaqanman karpis jamakun
15 tsaypa pasaq ali kawaqkunata inkitar kayno ninanpaq:
16 “¡Mana tantiyakuq mözukuna y jipashkuna!¡Kayman shapäkamuy!”Tsaynölami mana yarpachakuqkunatapis kayno nir qayan:
17 “Suwakuy yakuqa masmi mishkin.Mikuypis pakaylapa mikuptintsiqa maypis mikuypaqmi kaykan”.
18 Tsayno nishqanta chaskipaqkunaqa manami musyapäkuntsu wanunanpaq kashqanta.
Ichic wilacuycuna
^ 9.7 Wakin runakunaqa respëtuynaq nipäkun.
^ mantsakuy, Diosta mantsakuy Tayta Diosta mantsakurqa tantiyantsi kuyakuq y perdonakuq karpis jutsa rurayta mana kachariqkunata castigashqantami (Éxo. 34.6; Heb. 10.31). Tayta Dios munayniyuq kashqanta rikar Israel runakunapis payta mantsakurqanmi (Éxo. 14.31; Jos. 4.24; 1Sam. 12.18). Tsaymi Tayta Diosta mantsakur payta adorar cäsukuntsi (Deut. 5.29; 10.12-13; Jos. 24.14) y runa mayintsiwan ali kawantsi (Lev. 25.17, 36, 43). Tayta Diosqa payta mantsakuqkunapa amïgunmi kaykan (Sal. 25.14).
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ 9.10 Job 28.28; Sal. 111.10; Prov. 1.7.
^ 9.13 Wakin runakunaqa wilapishtëra nipäkun.
