Salmos 132:1-18
Kay salmuqa Jerusalénman aywaqkuna alabananpaqmi kaykan.
132 TAYTA DIOS, yarpaykulay David imano nakashqantapis.
2 Jacob yärakushqan TAYTA DIOS, yarpaykulay David promitishushqaykita.
3 Promitirmi kayno nishurqayki:“Wayïchöpis manami täshaqtsu,punuytapis manami tarishaqtsu,
4 manami yanqalapis punushaqtsu,manami ichiklatapis qepishtarpushaqtsu
5 munayniyuq TAYTA DIOSPAQ sitiuta manaraq tarirqay pay tänanpaq wayita manaraq rurarqa”.
6 Efratacho kaykarmi mayapäkurqä *Pactu Babulpita parlaqta.Jaar pampachömi babulta taripäkurqä.
7 Tsaymi wilanakärirqä kayno nir:“¡Tayta Diospa wayinman aywashun!¡Nawpanman qonqurpakushun!”
8 TAYTA DIOS, tänaykipaq kaqman aywaykalämuy.Munayniyuq babulniki kashqancho taykulay.
9 Sirvishuqniki cürakunapis lapan shonqunwan sirviykuläshunki.Munashqaykino kawaqkunapis kushishqa alabaykuläshunki.
10 Sirvishuqniki David rayku akrashqayki reyta yanapaykulay.*
11 Davidta promitishqaykitaqa imaypis cumplinkimi.Promitirmi kayno nirqayki:“Qampita miraqkunalami imaypis trönuykicho rey kanqapaq.*
12 Tsayno kanqa wilakuynïta y *pactu rurashqäta cumpliptinmi.Tsaynöpami qampita miraqkuna trönuykicho imaypis rey kanqa”.
13 TAYTA DIOSMI *Sión jirkanta akrashqa.Tsaycho tänanpaqmi akrashqa.
14 Tsaymi kayno nirqan:“Kaychömi imaypis täshaq.Kaycho trönü kananpaqmi akrashqä.
15 Kaycho mikuy atska kananpaqmi bendicionnïta churashaq.Waktsakunapis saksashqanyaqmi mikupäkunqa.
16 Cürakunapis respitashqami kapäkunqa.Cäsukamaqkunaqa kushishqami alabapäkamanqa.
17 Kaychömi Davidpita miraqkunata churashaq rey kananpaq.Akrashqä kaptinmi yanapashaq munayniyuq kananpaq.
18 Chikiqninkunataqa penqaymanmi churashaq.Mandaq reymi itsanqa chipchipyaykaq corönan jatishqa kanqa”.
Ichic wilacuycuna
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 132.6-10 1Sam. 7.1-2; 2Crón. 1.4; 6.41-42.
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ Sión Siónqa Jerusaléncho jirkanmi kaykan. Siónchömi Davidpa Markan karqan y templuta sharkatsipäkurqan (Sal. 2.6; 9.11; 132.13). Tsaymi Jerusalén markapa jukaq jutin Sión kaykan (2Crón. 5.2). Bibliachömi Siónta parlapan warmita parlapaqno (Isa. 49.15, 22; Lam. 2.1).
