¿Bibliata leirga imanotaj leinquiman gustashunayquipaj y más yanapashunayquipaj? Pichga yanapacuycunata yachacurishun, caycunaga achcajtami yanapashga.

Juc shumaj sitiuta ashiy. Bulla ni pipis mana fastidiashushgayqui sitiuta ashiy. Ali leinayquipaj nawiqui ricashgan y alapa mana shanashgan sitiucho leirga masmi tantianqui.

Mushoj yachacuycunata tarinayquipaj leiy. Bibliaga cielucho caycaj Papäninchipa regalunmi. Chaymi ali yanapashunayquipaj, leishgayqui hora juc wamra taytanpita yachacuyta munashganno canayqui. Mayna wiyacushgayquita o yarpashgayquitapis jucläman churaycuy y quiquin Diosninchi yachachishunayquipaj jaguiy (Salmo 25:4).

Manaraj leirga mañacuy. Bibliachoga Diospa yarpayninmi caycan, chaymi entiendinapäga paytaraj puntata mañacunayqui. Quiquinmi awnimanchi santo espiritunta gomänanchipaj mañacuptinchi (Lucas 11:13). Diospa santo espiritunmi yanapashunqui pay imano yarpashganta tantianayquipaj. Y tiempuwanga “Tayta Dios yarpashqankunatapis” tantianquinami (1 Corintios 2:10).

Tantianayquipaj leiy. Bibliata leirga leiycashgayquiman yarpachacuy. Leiptiqui cayno tapucuy: “¿Imano runa cashga cay Diospa sirvejnin? ¿Imanotaj yachacushgänola ruräman?”.

Imacho yanapashunayquipaj cajta ashiy. Bibliata leiyga gustashunayquipaj, calpachacuy tarinayquipaj ali yachacuycunata cawayniquicho yanapashunayquipaj. Capazchi Diosta masta reguinayquipaj, ali runa canayquipaj, ali maja canayquipaj o maspis. Nircur yanapashunayquipaj yachachicuycunata Bibliacho ashiy. *

Cay pichga consejucunaga yanapashunqui leiyta galaycunayquipaj. Pero, ¿imatataj ruranquiman Bibliata leirga más cushicunayquipaj? Gatejnin caj yachacuycunacho tarinqui más consejucunata.