Ri winaq che kubʼan jun aborto tajin kukamisaj jun neʼ che majaʼ kkojik. Paneʼ ri Biblia kchʼaw ta chrij ri aborto are kʼu kʼo versículo chupam che kukʼut chqawach ri kuchomaj ri Dios chrij ri ukʼaslemal jun winaq, xuqujeʼ chrij jun neʼ che majaʼ kkʼojiʼk.

 Ri kʼaslemal are jun sipanik che uyaʼom ri Dios (Génesis 9:6; Salmo 36:9). Ronojel ri kʼaslemal nim ubʼanik chuwach ri Dios, xuqujeʼ ri ukʼaslemal jun alaj neʼ che kʼa kʼo na chupam ri unan. Rumal laʼ are chi jun ixoq chubʼanik kubʼano kutzaq jun neʼ(abortar) che majaʼ kkʼojiʼk, tajin kubʼan jun kamisanik.

 Ri taqanik che xuya ri Jehová chke ri israelitas kubʼij wariʼ: «We e kʼo kebʼ achijabʼ che tajin kkichʼay kibʼ kkibʼan apan kʼax che jun ixoq ri yawabʼ winaq chik y kkʼojiʼ ri ral chiʼ majaʼ kopan uqʼij are kʼu kʼo ta jun kkamik, ri ajmak kutoj na che ri rachajil ri ixoq ronojel ri kʼax che xuriqo. Rajawaxik kutoj ronojel ri kkitaʼ ri qʼatal taq tzij. We kʼo jun xkamik rajawaxik kyaʼ na ri kʼaslemal che ukʼaxel kʼaslemal» (Éxodo 21:22, 23, La Biblia. Traducción del Nuevo Mundo). a

•  ¿Jampaʼ kmajtaj ri ukʼaslemal jun winaq?

•  ¿La kkuy umak jun winaq rumal ri Dios we nabʼe kanoq xubʼan jun aborto?

•  ¿La utz kbʼan ri aborto we ri ukʼaslemal ri nan y ri ukʼaslemal ri uneʼ kʼo pa kʼax?

 Chuwach ri Dios ri ukʼaslemal jun winaq kmajtajik are chiʼ ri ixoq kkanaj yawabʼ winaq. Pa ri uTzij ri Dios, ri Biblia, are chiʼ kchʼaw chrij jun neʼ che majaʼ kalaxik ri areʼ krilo junam rukʼ jun kʼaslemal. Chqilampeʼ jujun taq kʼutbʼal che kkʼut chqawach che ri Dios jalan ta kril ri ukʼaslemal jun neʼ che kʼa kʼo na chupam ri unan rukʼ ri jun neʼ che ya xalaxik.

•   Rukʼ ri utobʼanik ri uxlabʼixel, ri David xubʼij che ri Dios: «Ri bʼaqʼwach la xril ri nucuerpo are taq ktajin kkʼiyik» (Salmo 139:16). Rumal laʼ ri Dios xril ri David junam rukʼ jun winaq are chiʼ majaʼ kkʼojiʼk.

•   Chqilaʼ jun chi kʼutbʼal. Ri Dios kʼo chi jun chak che kuya che ri qʼaxal tzij Jeremías are chiʼ majaʼ kalaxik. Ri Dios xubʼij: «kʼa majoq chyoq ri akʼaslemal, at nuchaʼom chi uloq; kʼa majoq chatalaxoq, at nutasom chik; nukʼaqom chik chawij chi katux qʼaxal nutzij chke ri nimaʼq taq tinamit» (Jeremías 1:5).

•   Ri Lucas, che are kunanel y are jun chke ri xetzʼibʼan ri Biblia, xuqujeʼ xukoj ri tzij griega are chiʼ xchʼaw chrij jun alaj neʼ che majaʼ kalaxik junam rukʼ jun neʼ che ya xalaxik (Lucas 1:41; 2:12, 16).

 Jeʼ kukuyu, ri Dios kukuy kimak ri winaq che nabʼe kanoq xkibʼan jun aborto. We kkikʼex ri kichomanik y kkil ri kʼaslemal junam rukʼ ri Dios, kʼo ta chi jun rumal che kebʼisonik. Ri Biblia kubʼij:«Ri Ajawaxel chʼuchʼuj xuqujeʼ kel ukʼuʼx [...]. Ri qamak unajtajisam chqe, jachaʼ unajtajisam ri elebʼal qʼij rukʼ ri uqajebʼal qʼij» (Salmo 103:8-12). b Ri Jehová kukuy kimak ri e winaq che ojer kanoq xkibʼan jun makaj, junam rukʼ ri aborto (Salmo 86:5).

 Junam che kubʼij ri Biblia chrij ri ukʼaslemal jun alaj neʼ che majaʼ kalaxik, utz taj kbʼan ri aborto paneʼ ri ukʼaslemal ri nan o ri uneʼ kʼo pa kʼax.

 Y ¿Jas kkʼulmatajik we are chiʼ tajin kkʼojiʼ ri akʼal kkʼulmataj jun kʼax y etaʼmatal taj jachin chke kakʼasiʼ kanoq? We je kkʼulmatajik, are ri ufamiliares keʼilowik jachin kkaj kkitoʼo.