Ojer kanoq, ri Dios xutaʼ chke ri israelitas che kkiya ri diezmo a o ri ulajujil ri kkichʼako ronojel taq junabʼ rech kkiya che ri Dios. Xubʼij chke: «Chi junabʼ [...], ri ix rajawaxik kitas ri ulajujil [o diezmo] ri uwachinik ronojel ri itikoʼn» (Deuteronomio 14:22).

 Ri uyaʼik ri diezmo kʼo chupam ri taqanik che xyaʼ che ri Moisés, wajun jupuq taqanik riʼ are xuya ri Dios che ri tinamit Israel. Rumal che ri oj cristianos oj kʼo ta chi chuxeʼ wajun taqanik riʼ, rajawaxik ta chik kqaya ri diezmo (Colosenses 2:13, 14). Xaneʼ chqajujunal ri oj cristianos kqaya ri kojkunik, ri Biblia kubʼij: «Chijujunal bʼaʼ chiyaʼ jas ri kpe pa iwanimaʼ, man rukʼ ta bʼis, mawi rumal ta rech chi xata kkoj chuqʼabʼ chiwe. Ri Dios kʼut kuloqʼoqʼej ri kyaʼn rukʼ kikotemal». Rumal laʼ chqajujunal ri oj cristianos kqaya ri kojkunik kqayaʼo (2 Corintios 9:7).

•  Ri diezmo pa ri Biblia: Antiguo Testamento

•  Ri diezmo pa ri Biblia: Nuevo Testamento

 Ri diezmo kʼi mul kriqitaj pa ri Antiguo Testamento. Ri ukʼiyal wariʼ, che ktzijon chrij ri diezmo are kriqitaj pa ri taqanik che xyaʼ che ri tinamit Israel (ri Taqanik che xyaʼ che ri Moisés), are kʼu ri Biblia kchʼaw jujun taq mul chrij ri diezmo are chiʼ majaʼ kyaʼ ri taqanik che ri tinamit Israel.

Are chiʼ majaʼ kʼo ri taqanik che xyaʼ che ri Moisés

 Ri nabʼe winaq che xuya ri diezmo are ri Abrán (Abrahán). (Génesis 14:18-20; Hebreos 7:4). Ri diezmo che xuya ri Abrán, are jun sipanik che xuya che ri ajawinel y ajkojol tobʼal toqʼobʼ re Salem. Pa ri Biblia kubʼij taj che ri Abrahán y ri ralkʼwal xkiya chi jumul ri diezmo.

 Ri ukabʼ winaq che xuya ri diezmo are ri Jacob, ri uwiʼ umam ri Abrahán. Ri Jacob xutzujuj che ri Dios che kuya kʼu na «ri lajujil che ronojel» ri jastaq che kʼo rukʼ we ktewchiʼx rumal ri Jehová (Génesis 28:20-22). Junam che kkibʼij e jujun winaq che kʼo ketaʼmabʼal chrij ri Biblia, weneʼ ri diezmo che xuya ri Jacob are e chikop. Are chiʼ xuya ri diezmo xutaqchiʼj ta ri ufamilia rech je kkibʼano.

Are chiʼ kʼo chi ri taqanik che xyaʼ che ri Moisés

 Ri israelitas qas rajawaxik kkiya ri diezmo che are kkoj che uyaʼik uqʼij ri Dios.

•   Ri diezmo are ri kyaʼ chke ri levitas che tajin kepatanin pa ri rachoch ri Dios y chke ri ajkojol tobʼal toqʼobʼ rumal che kʼo ta kulew (Números 18:20, 21). Xuqujeʼ ri tinamit Israel xkiya ri diezmo chke ri levitas che are ta e kojol tobʼal toqʼobʼ y ri levitas riʼ kkesaj ri ulajujil che ri jastaq che kʼo kukʼ rech kkiya che ri ajkojol tobʼal toqʼobʼ (Números 18:26-29).

•   Weneʼ kʼo chi jun ukabʼ diezmo che xyaʼ ronojel junabʼ, y wariʼ xaq xuwi ta chke ri levitas xyaʼ wi xaneʼ xyaʼ chke nikʼaj chi winaq (Deuteronomio 14:22, 23). Ri israelitas xkikoj ri kisipanik riʼ are chiʼ kkibʼan ri kinimaqʼij. Xuqujeʼ kʼo jujun taq junabʼ che ri sipanik riʼ xyaʼ chke ri winaq che sibʼalaj e mebʼaʼ (Deuteronomio 14:28, 29; 26:12).

 ¿Jas kbʼan che utojik ri diezmo? Ronojel taq junabʼ ri israelitas kkitas ri ulajujil che ri uwachinik ri kulew (Levítico 27:30). Are kʼu we kkitoj ri diezmo rukʼ pwaq rajawaxik kkiya 20% pa uwiʼ (Levítico 27:31). Xuqujeʼ rajawaxik kkiya «jun chke ri kilajujil awaj chke ri wakax» o chke ri chij (Levítico 27:32).

 Rech kkesaj ri ulajujil che ri chikop, rajawaxik kkajilaj y ri ulajuj chikop are kkikoj che ri diezmo. Ri taqanik che xyaʼ chke kubʼij che kekun taj kkikoj ri chikop we e tzʼaqat taj o kkikʼex rukʼ jun chik. Xuqujeʼ kubʼij che kekun taj kkitoj ri diezmo riʼ rukʼ pwaq (Levítico 27:32, 33). Are kʼu ri ukabʼ diezmo che are kyaʼ pa ri nimaqʼij che kbʼan ronojel taq junabʼ wariʼ kekunik kkitoj rukʼ pwaq. Wariʼ are utz chke ri israelitas che naj kepe wi che keʼopan pa ri nimaqʼij (Deuteronomio 14:25, 26).

 ¿Jampaʼ kkiya ri israelita ri diezmo? Rajawaxik kkiya ronojel taq junabʼ (Deuteronomio 14:22). Are kʼu pa ri uwuq junabʼ (septimo año) kkiya taj. Ri junabʼ riʼ are sabático, junabʼ re uxlanem, ri israelitas kkitik ta uwach ri kulew (Levítico 25:4, 5). Rumal che jeʼ kbʼantaj pa ri junabʼ riʼ kkiya ta ri diezmo rumal che kʼo ta kkiyak che ri kulew. Xuqujeʼ, churox y chuwaq junabʼ (sexto año) re ri uwuq junabʼ riʼ ri israelitas kkiya ri ukabʼ diezmo chke ri e mebʼayibʼ y chke ri e levitas (Deuteronomio 14:28, 29).

 ¿Jas kʼajisabʼal wachaj kyaʼik rumal che ktoj ta ri diezmo? Ri taqanik che xyaʼ che ri Moisés kubʼij ta chrij jun kʼajisabʼal wachaj. Xaneʼ kkitoj ri diezmo rumal che kkaj. Ri israelitas rajawaxik kkikʼutu che kkinimaj ronojel ri taqanik y jeriʼ kekunik kkitaʼ che ri Dios che keʼutewchij (Deuteronomio 26:12-15). We ktoj ta ri diezmo, chuwach ri Dios jetaneʼ junam rukʼ jun elaqʼ (Malaquías 3:8, 9).

 ¿La are ri diezmo jun nimalaj eqaʼn chke ri israelitas? No. Ri Dios xubʼij che we ri israelitas kkiya ri diezmo ri Dios keʼutewchij na y amaqʼel kuya ri kajwataj chke (Malaquías 3:10). Are kʼu, we kkiya taj kkiriq kʼax. Ri Jehová keʼutewchiʼj taj rumal che kkiya ta ri diezmo, ri ajkojol tobʼal toqʼobʼ y ri levitas utz ta chi kkibʼan che ri kichak, y kuya ta chi utzilal che ri tinamit (Nehemías 13:10; Malaquías 3:7).

 Pa taq ri uqʼij ri Jesús, kʼa tajin ktoj na ri diezmo. Are kʼu chiʼ xkamik ktoj ta chik.

Pa taq ri uqʼij ri Jesús

 Jun chʼaqap re ri Biblia che kbʼix Nuevo Testamento che kukʼutu are chiʼ ri Jesús xkʼojiʼ cho ri uwach Ulew, ri israelitas kʼa tajin kkitoj na ri diezmo. Ri areʼ retaʼm che rajawaxik kkibʼan wariʼ. Are kʼu xeʼuyaj ri kʼamal taq bʼe re ri kojonem rumal che sibʼalaj kʼi kkitaʼ chke ri winaq chrij ri diezmo y tajin ta kkiya chke ri winaq «ri nimalaj ubʼantajik pa ri Pixabʼ: are ri sukʼil, are ri loqʼoqʼebʼal k’u’x e are ri ku’l k’u’x» (Mateo 23:23, Ri Tyoxlaj Wuj).

Are chiʼ kaminaq chi ri Jesús

 Rukʼ ri ukamikal ri Jesús xubʼano che rajawaxik ta chik kyaʼ ri diezmo. Y che rajawaxik ta chik knimax ri taqanik che xyaʼ che ri Moisés, xuqujeʼ knimax ta chi ri taqanik che ktaʼ «ri ulajujil ronojel pa kiqʼabʼ ri winaq» (Hebreos 7:5, 18; Efesios 2:13-15; Colosenses 2:13, 14).