Jeʼ kʼolik, ri Itzel are jun ángel che xniman ta che ri Dios, ri areʼ are ri ktaqan puwiʼ we uwach Ulew riʼ (Juan 14:30; Efesios 6:11, 12). Ri Biblia kukoj jujun taq bʼiʼaj rech kuqʼalajisaj ri ubʼantajik wajun Itzel riʼ. Chqilampeʼ jujun:

•   Satanás, che kraj kubʼij «Tzujunel» (Job 1:6).

•   Itzel, che kraj kubʼij kumol tzij (Apocalipsis 12:9).

•   Kumatz, che pa ri Biblia kraj kubʼij «Subʼunel» (2 Corintios 11:3).

•   Taqchiʼnel (Mateo 4:3).

•   Bʼanol tzij (Juan 8:44).

Are ta jun símbolo re ri itzelal ni are ta ri itzelal che kʼo pa kanimaʼ ri winaq

 E kʼi winaq kkichomaj che ri Itzel are jun símbolo re ri itzelal o ri kʼax che kkibʼan jujun winaq xuqujeʼ ri Dios. Are kʼu ri Biblia kchʼaw chrij jun tzijonem rukʼ ri Dios y ri Itzel. Ri Dios are sukʼ pa ronojel rumal la’ kʼo ta itzelal pa ranimaʼ (Deuteronomio 32:4; Job 2:1-6). Y ri Biblia kubʼij che ri Itzel xutaqchiʼj ri Jesús che k’o ta umak (Mateo 4:8-10; 1 Juan 3:5). Rumal laʼ kqilo che ri Biblia kubʼij che ri Satanás qastzij kʼolik y che are ta jun símbolo rech ri itzelal.

 E k’i winaq kkikoj taj che ri Itzel qastzij kʼolik, ¿la kqamay wariʼ? Kqamay taj, rumal che ri Biblia kuqʼalajisaj che ri Satanás kubʼan ronojel rech keʼusubʼ ri winaq y rech kbʼan ri kraj ri are’ (2 Tesalonicenses 2:9, 10). Y ri areʼ ukojom pa kijolom ri winaq che qastzij taj kʼolik (2 Corintios 4:4).

Molom tzij: Lucifer are jun chi bʼiʼaj che kbʼix che ri Satanás.

 Ri qastzij: Ri tzij hebrea «Lucifer» pa jujun taq Biblia kraj kubʼij «chʼumil re ri usaqarik» (Isaías 14:12). Wajun tzij ri’ kriqitaj pa jun profecía, y ri contexto kuk’utuʼ che kchʼaw chrij ri uqʼatbʼal tzij Babilonia, che kesax na ukʼixbʼal rumal ri Dios rumal che kubʼan nimal (Isaías 14:4, 13-20). Pa wajun profecía ri’ kbʼix «chʼumil re ri usaqarik» che, are chi’ ri qʼatal taq tzij re Babilonia xsachisax kiwach.

Molom tzij: Ri Itzel tajin kchakun rukʼ ri Dios.

 Ri qastzij: Ri Itzel are ukʼulel ri Dios, are ta rajchak. Ri Satanás xuqujeʼ e ukʼulel ri kepatanin che ri Dios, rumal laʼ keʼuterneʼj y kubʼij molom taq tzij chkij (1 Pedro 5:8; Apocalipsis 12:10).