Chawilaʼ ri akʼal pa ri wachbʼal. ¿Paʼ qʼalaj che xa utukel kʼolik xuqujeʼ uxem ribʼ? ¿La kʼo jumul sibʼalaj axibʼim awibʼ at?... Qonojel kʼo jumul qaxibʼim qibʼ. Ri Biblia kchʼaw chkij rajpatanelabʼ ri Jehová che xkixibʼij kibʼ xuqujeʼ xkinaʼo che xaq kitukel e kʼolik, pa neʼ qas kkiloqʼoqʼej ri Jehová. Jun chke are Elías. Chqetaʼmaj chrij.

Elías xkʼojiʼ ojer pa ri tinamit Israel, chiʼ majaʼ kalax ri Jesús pa ri uwach Ulew. Pa taq ri uqʼij ri Elías, ri ajawinel rech Israel xuqujeʼ ri rixoqil kkiloqʼoqʼej ta ri Jehová, ri qastzij Dios. Ri ajawinel Acab ubʼiʼ, ri rixoqil Jezabel ubʼiʼ, ri e areʼ kkiqʼijilaj ri Baal, che xa jun tyox. Rumal laʼ kʼi chke ri winaq rech ri tinamit Israel xuqujeʼ kkiqʼijilaj ri Baal. Ri Jezabel sibʼalaj itzel xuqujeʼ kraj keʼukamisaj konojel ri kkiya uqʼij ri Jehová. Rumal che ri Elías kuqʼijilaj ri Jehová, ¡ri Jezabel xuqujeʼ kraj kukamisaj! ¿Jas rajawaxik kubʼan ri Elías? ¿Jas kabʼan riʼ wet at, at Elías?...

 ¡Ri Elías xel bʼi pa ri tinamit! Xanimaj bʼik, xbʼe pa ri chaqiʼj ulew xuqujeʼ xukʼuʼ ribʼ (o xrowaj ribʼ) pa jun jul. ¿Jasche xukʼuʼ ribʼ ri Elías?... Rumal che xuxibʼij ribʼ. Are kʼu rajawaxik taj kuxej ribʼ. ¿Jasche rajawaxik taj kuxibʼij ribʼ? Rumal che areʼ retaʼm che ri Dios kutoʼ. Toʼm chi jujun mul. Jun kʼutbʼal, kʼo jumul ri Elías xubʼan jun uchʼawem che ri Dios, ri Dios xuta ri uchʼawem xuya lo qʼaqʼ pa ri kaj. ¿La kabʼij at che rukʼ waʼ ri Jehová xukʼutu che kʼo nim uchuqʼabʼ? Je qastzij kʼo nim uchuqʼabʼ. ¡Ri Elías qas kkunik kukubʼsaj ukʼuʼx chrij!

Chiʼ Elías kʼo pa ri jul, ri Jehová xutaʼ che: «¿Jas kabʼan waral?». Ri Elías xubʼij: «Ojer e kʼo más winaq katkipatanij, are kʼu kimik xaq xiw chi in. Xuqujeʼ kinxej wibʼ che kinkamisaxik». Ri Elías xuchomaj che konojel ri kkipatanej ri Dios xekamik. Are kʼu ri Jehová xubʼij waʼ che: «Xaq xiw ta at. E kʼo na siete mil winaq che kinkiqʼijilaj. Maxibʼij awibʼ, kinya jun achak». Chiʼ ri Dios xubʼij waʼ, ¿jas xunaʼ ri Elías?... ¡Qastzij wi che sibʼalaj xkikotik!

Chatchoman chrij ri xukʼulmaj ri Elías. ¿Jas kqetaʼmaj chrij?... Che kʼo jujun mul kqaxibʼij qibʼ xuqujeʼ kqanaʼ che xaq qatukel. Are taq kaxej awibʼ, ¿jas utz kachomaj? Utz kachomaj che xaq ta atukel at kʼolik, rumal che e kʼo awachiʼl che kkiloqʼoqʼej ri Jehová xuqujeʼ katkiloqʼoqʼej. Masach chawe che Jehová nim ri uchuqʼabʼ xuqujeʼ kraj katutoʼ. ¿La kojkikot rukʼ ri xqetaʼmaj?...