Chiʼ kalax jun alaj neʼ pa neʼ kuya kikotemal xuqujeʼ kubʼano che ri nan tat kekosik rumal che kʼateʼ nabʼe kalkʼwal. Weneʼ ichomam ta ri tiempo xuqujeʼ ri chuqʼabʼ che kukʼam bʼi rilik jun alaj neʼ. Rumal che sibʼalaj kʼo kibʼano xuqujeʼ kkʼextaj ri kinaʼo kubʼano che weneʼ kixchʼojinik. Rumal laʼ rajawaxik che ix kebʼ kikʼex jujun jastaq rech kixok il che ri alaj neʼ xuqujeʼ kichajij ri ikʼulanem. ¿Jas kubʼan ri pixabʼ rech ri Utzij ri Dios che itoʼik chuwach ri e kʼax riʼ?

RI KUBʼIJ RI BIBLIA: «Ri kʼo loqʼoqʼebʼal ukʼuʼx are riʼ kuqʼiʼ ri kʼax, chʼuchʼuj [...], man kutzukuj ta ri utz che chbʼil ribʼ, man kape ta royowal» (1 Corintios 13:4, 5). Rumal che ri ixoq kʼateʼ nabʼe ral, are kraj che amaqʼel kril ri kajwataj che ri alaj neʼ. Tekʼuriʼ, weneʼ wariʼ kubʼano che ri awachajil kunaʼo che kaxutuj kanoq, rumal laʼ masach chawe che xuqujeʼ areʼ rajawaxik katok il che. Rukʼ paciencia xuqujeʼ rukʼ utzilal, katkunik kakʼut chuwach ri awachajil che kajwataj ri utobʼanik chawe xuqujeʼ nim kawil wi che katutoʼ che uchajixik ri alaj neʼ.

«Xuqujeʼ ri ix achajilaxelabʼ chixjeqel kukʼ ri e wixoqilabʼ rukʼ noʼjibʼal.» (1 Pedro 3:7.) We at, at ri tat, rajawaxik che kachʼobʼo che ri awixoqil kukoj utiempo xuqujeʼ ri uchuqʼabʼ che rilik ri alaj neʼ, rumal laʼ weneʼ kunaʼo che are jun nimalaj chak, kkosik xuqujeʼ sibʼalaj kbʼisonik rumal che kʼi chi ri kubʼano. Weneʼ kʼo jujun taq mul kpe royowal awukʼ, chanim taj kpe awoyowal rukʼ, rumal che «are utz riʼ ri jun winaq che natam kpe royowal» chuwach jun achi che sibʼalaj nim ubʼanik (Proverbios 16:32,TW). Chakojoʼ anojibʼal xuqujeʼ chaya che ri awixoqil ri kajwataj che (Proverbios 14:29).

RI KATKUNIK KABʼANO:

• We at, at ri tat: Chatoʼ ri awixoqil che rilik ri alaj neʼ, pa neʼ chaqʼabʼ. Chawesaj atiempo rech katkʼojiʼ rukʼ ri awixoqil xuqujeʼ rukʼ ri awalkʼwal

• We at, at ri nan: Chiʼ ri awachajil kubʼij chawe che kraj katutoʼ, chayaʼ che, che katutoʼ. We kkun ta che rilik ri akʼal, kayoqʼ taj, chakʼutuʼ chuwach rukʼ utzilal

RI KUBʼIJ RI BIBLIA: «Ri e kiʼebʼ kebʼux na xa jun winaq» (Génesis 2:24). Pa neʼ kʼo chi iwalkʼwal, masach chawe che at xuqujeʼ ri akʼulaj ix «xa jun winaq». Chikojoʼ ichuqʼabʼ rech qas kiwaj iwibʼ.

Ixoq, chamaltyoxij che ri awachajil che katutoʼ. Ri atzij «kakiyaʼ kʼu utzil» we katmaltyoxinik (Proverbios 12:18). Achi, chabʼij che ri awixoqil che sibʼalaj kaloqʼoqʼej xuqujeʼ che nim kawil wi, xuqujeʼ che sibʼalaj nim kawil ri kubʼan che atoʼik pa ri familia (Proverbios 31:10, 28).

«Kʼo jun mutzukuj ri utz che chbʼil ribʼ, xaneʼ chutzukuj ri utz che ri jun chik» (1 Corintios 10:24). Amaqʼel chabʼanaʼ ri qas utz che ri akʼulaj xuqujeʼ nim chawilaʼ wi ri kubʼano. Chitasaʼ iqʼij rech kixchʼawik xuqujeʼ kitatabʼej iwibʼ. We kachomaj katqʼoyiʼ rukʼ ri akʼulaj, xaq xiw ta kachomaj awibʼ. Chatchoman chrij ri kajwataj che ri akʼulaj. Ri Biblia kubʼij: «Miyaʼ kan ri uriqik iwibʼ we man ichomam ix kebʼ» (1 Corintios 7:3-5). Rumal laʼ qas chixchʼaw chrij wariʼ. We kʼo apaciencia xuqujeʼ kachʼobʼ ri jastaq ri kuchomaj ri akʼulaj, wariʼ kunimarisaj ri iwachilanik.

RI KATKUNIK KABʼANO:

• Masach chawe che are rajawaxik katkʼojiʼ atukel rukʼ ri akʼulaj

• Chikʼutuʼ che kiloqʼoqʼej iwibʼ rukʼ jastaq, junam rukʼ utzʼibʼaxik jupaj tzij o jun alaj sipanik

RI KUBʼIJ RI BIBLIA: «Awetaʼm kʼut chi aretaq at chʼutin na xawetaʼmaj ri tastalik taq Tzʼibʼatalik, ri kakuʼin chuyaʼik anoʼj chrij ri akolik» (2 Timoteo 3:15). Chichomaj ri kibʼan che utijoxik ri iwalkʼwal. Chichomaj chrij ri kkunik kretaʼmaj, xuqujeʼ pa neʼ majaʼ kalaxik, sibʼalaj kʼo kretaʼmaj. Jun kʼutbʼal re, chiʼ majaʼ kalaxik kuchʼobʼ chi ri achʼabʼal xuqujeʼ kuchʼobʼ chi ri kanaʼo. Chiʼ kʼateʼ kalaxik utz chasikʼij uwach wuj pa ujolom rech, pa neʼ kuchʼobʼ ta ri tzij, kubʼano che chiʼ kkʼiyik utz krilo kusikʼij uwach wuj.

Kichomaj taj che rumal che ri akʼal sibʼalaj nitzʼ na kkun taj kretaʼmaj chrij ri Dios. Chibʼanaʼ ichʼawem che ri Jehová rukʼ (Deuteronomio 11:19). Chiʼ kixetzʼan rukʼ, chixchʼaw rukʼ chrij ri jastaq che ubʼanom ri Dios (Salmo 78:3, 4). Chiʼ kkʼiyik, ri akʼal krilo che sibʼalaj kiloqʼoqʼej ri Jehová xuqujeʼ areʼ kretaʼmaj uloqʼoqʼexik.

RI KATKUNIK KABʼANO:

• Chataʼ anojibʼal che ri Jehová pa chʼawem rech katijoj ri awalkʼwal

• Chakamulij ri tzij xuqujeʼ ri chomanik che sibʼalaj nim ubʼanik rech chanim kretaʼmaj ri alaj akʼal