KʼUTUNEM 6
¿La kʼo utz jastaq kbʼix chikij ri kaminaqibʼ?
1. ¿Jas riʼ ri utz jastaq che kyaʼ ubʼixik chikij ri kaminaqibʼ?
Jun qʼij, chiʼ kʼo ri Jesús pa ri uwach Ulew, xkam ri rachiʼl ubʼiʼ Lázaro. Ri rachoch ri Lázaro kʼo pa Betania, alaj tinamit che kʼo naqaj che Jerusalén. Chiʼ xopan ri Jesús che rilik, kajibʼ qʼij chik kaminaq ri Lázaro. Ri Jesús e rachilam bʼi ri Marta xuqujeʼ María —e ranabʼ ri Lázaro—, xebʼe che rilik ri ujul ri Lázaro, xuqujeʼ xkimulij kibʼ kʼi winaq chilaʼ. ¿La katkun che uchʼobʼik ri nimalaj kikotemal xkinaʼ ri Marta xuqujeʼ María chiʼ xkilo che Jesús xuwalajisaj lo ri kixibʼal? Chasikʼij uwach Juan 11:21-24, 38-44.
Ri kʼastajibʼal are jun chike ri utzalaj täq jastaq che bʼim pa ri Loqʼalaj Pixabʼ. Ri Marta retaʼm che ri Jehová keʼuwalajisaj na ri e kaminaqibʼ rech kekʼejeʼ chi jumul pa ri uwach Ulew. Chasikʼij uwach Job 14:14, 15.
2. ¿Jas kibʼanom ri kaminaqibʼ?
Ri Ajawaxel xubʼij wariʼ che ri Adán: «At kʼu yaʼ ulew katux chi kʼu na ulew» (GÉNESIS 3:19)
Ri öj winaq öj bʼanom rukʼ «pukʼukʼ ulew» (Génesis 2:7; 3:19). Öj uxlabʼal täj che kʼo qabʼaqil. Öj winaq, xuqujeʼ kʼot kkʼaseʼ kan chaqe chiʼ kojkamik. Chiʼ kkam utzantzaqʼor jun winaq, kchoman ta chik. Rumal laʼ, ri kaminaqibʼ kkinaʼ ta kʼaxkʼolil. Rumal laʼ, chiʼ walajisam chik ri Lázaro, kʼot xutzijoj chirij ri kamikal. Chasikʼij uwach Eclesiastés 9:5, 6, 10.
Kʼo jujun winaq kkibʼij che ri Ajawaxel keʼuya ri winaq pa jun nimalaj qʼaqʼ chiʼ kekamik, wariʼ qastzij täj. Junam rukʼ ri xqetaʼmaj ri kaminaqibʼ kʼot kkichʼobʼo. Rumal laʼ chiʼ kkʼut chirij jun nimalaj qʼaqʼ are ta tijan kbʼix ri qastzij are kuyoqʼ ri Jehová, ri Jehová itzel kuta ri chomanik che kkʼajasax uwach jun winaq pa jun qʼaqʼ. Chasikʼij uwach Jeremías 7:31.
Chawilaʼ ri video ¿Jas kkikʼulmaj ri e winaq chiʼ kekamik?
3. ¿La kojkunik kojchʼaw kukʼ ri kaminaqibʼ?
Ri kaminaqibʼ kekun täj kechʼawik xuqujeʼ kkita täj (Salmo 115:17). Tekʼuriʼ, e kʼo jujun itzel ángeles che kekunik kechʼaw kukʼ ri winaq xuqujeʼ kkibʼano che e areʼ ri kaminaqibʼ (Judas 6). Rumal laʼ, utz täj kril ri Jehová chiʼ jun winaq kraj kchʼaw rukʼ jun kaminaq. Chasikʼij uwach Deuteronomio 18:10, 11.
4. ¿E jachin täq kewalij na?
Sibʼalaj e kʼi kaminaqibʼ kewalij loq rech kekʼejeʼ chi jumul pa ri uwach Ulew. Xuqujeʼ kewalij loq ri xkita ta chirij ri Jehová are xkibʼan itzelal. Chasikʼij uwach Salmo 37:29 xuqujeʼ Hechos 24:15.
Ri kekʼastaj loq kekunik kketaʼmaj chirij ri Ajawaxel, kekojon chirij ri Jesús xuqujeʼ kkikʼut ri kinimanik (Apocalipsis 20:11-13). We kenimanik, kkiriq jun kʼaslemal rukʼ kikotemal che kʼot ukʼisik pa ri uwach Ulew. Chasikʼij uwach Juan 5:28, 29.
5. ¿Jas kukʼut ri kʼastajibʼal chirij ri Jehová?
Ri kʼastajibʼal are jun kʼutbʼal re ri uloqʼoqʼenik xuqujeʼ ri nimalaj rutzilal ri Jehová. Rumal che ri Ajawaxel xutaq lo ri Ukʼojol rech xuya ri ukʼaslemal rumal qech, rech kʼo wajun kʼastajibʼal riʼ. ¿Jachin kawaj at kawil uwach chiʼ kekʼastaj lo ri kaminaqibʼ? Chasikʼij uwach Juan 3:16 xuqujeʼ Romanos 6:23.
