Ri Ajawaxel xubʼan jun tinamit chike ri ralkʼwal ri Abrahán xuqujeʼ xuya kʼi utaqonik chike. Wajun tinamit riʼ, xukoj Israel che ubʼiʼ, rajawaxik che kkichajij ri qastzij qʼijilanik xuqujeʼ ri utzij ri Ajawaxel (Salmo 147:19, 20). Rumal wariʼ, konojel ri winaq kketaʼmaj chirij ri Ajawaxel. Chasikʼij uwach Génesis 22:18.

Ri Ajawaxel xeʼuchaʼ ri israelitas rech kkibʼan ri e utestigos. Ri kikʼaslemal ri ojer israelitas xukʼutu che unimaxik ri utaqonik ri Ajawaxel kubʼano che utz kel ri jastaq (Deuteronomio 4:6). Rumal kech e areʼ, nikʼaj chik winaq kekunik kketaʼmaj uwach ri qastzij Ajawaxel. Chasikʼij uwach Isaías 43:10, 12.

Chiʼ ri Israel, ri tinamit che chaʼom, xniman täj, Jehová xukʼex rukʼ ri congregación cristiana (Mateo 21:43; 23:37, 38). Rumal laʼ kimik, ri e utestigos ri Jehová are ri e qastzij cristianos, are ta ri israelitas. Chasikʼij uwach Hechos 15:14, 17.

Jesús xumulij ri rajtijoxelabʼ rech kkitzijoj ri utzalaj täq tzij xuqujeʼ kekitoʼ ri winaq rech kketaʼmaj chirij ri Ajawaxel cho ronojel uwach Ulew (Mateo 10:7, 11; 24:14; 28:19, 20). Kimik, pa täq ri kʼisbʼal täq qʼij, wajun chak riʼ tijan kkʼisik. Pa wa täq qʼij riʼ, Jehová tijan keʼumulij e kʼi winaq rech ronojel tinamit rech keʼok pa ri qastzij kojonik (Apocalipsis 7:9, 10). Rumal ubʼanom jun ri kichomanik chirij ri Ajawaxel, ri cristianos kekunik kkiya tobʼanik chike nikʼaj chik. Xuqujeʼ, konojel junam ri kʼutunik rech ri Loqʼalaj Pixabʼ kyaʼ chike pa ri riqbʼal ibʼ. Chasikʼij uwach Hebreos 10:24, 25.

Wajun chak riʼ xumaj lo pa täq ri junabʼ 1870. Jun alaj jupuq winaq xkimaj retaʼmaxik ri qastzij rech ri Loqʼalaj Pixabʼ che ojer sachom kanoq. Ketaʼm che ri Jesús xuya che ri congregación cristiana che kutzijoj ri utzalaj täq jastaq, rumal laʼ xkimaj ri ubʼixik ri utzalaj täq jastaq rech ri Ajawbʼal pa kʼi tinamit. Pa ri junabʼ 1931 xkoj testigos rech Jehová che kibʼiʼ. Chasikʼij uwach Hechos 1:8; 2:1, 4, 11, xuqujeʼ 5:42.

Pa täq ri kiqʼij ri apóstoles, ri congregación cristiana rech jalajoj tinamit rech ri uwach Ulew xyaʼ tobʼanik chike rumal ri jupuq ajkʼamal bʼe, che kkichʼobʼo che are ri Jesús ri ajkʼamal bʼe puwiʼ ri congregación (Hechos 16:4, 5). Xuqujeʼ, ri testigos rech Jehová ketoʼ kimik rumal ri Jupuq Ajkʼamal bʼe rech ronojel uwach Ulew che e kojonelabʼ che kʼo nim ketaʼmabʼal, rech kkil ri sucursales cho ronojel uwach Ulew. Jujun chike ri chak kbʼan chupam, are uqʼaxaxik ri wuj pa nikʼaj chik chʼabʼal, kbʼan ri wuj xuqujeʼ kjach ri wuj che esam chupam ri Loqʼalaj Pixabʼ pa más che 600 chʼabʼal. Kkikoj ri Loqʼalaj Pixabʼ, che ukʼutik xuqujeʼ che ukubʼsaxik kikʼuʼx ri más che 100.000 congregaciones, chupam ri congregaciones e kʼo achijabʼ che qas kekun che kichajexik rukʼ loqʼoqʼenik ri utinamit ri Ajawaxel. Chasikʼij uwach 1 Pedro 5:2, 3.

Ri testigos rech Jehová qas utz kkibʼan che rilik ri kbʼan che utzijoxik ri utzalaj täq jastaq rech ri Loqʼalaj Pixabʼ xuqujeʼ kitoʼik ri winaq rech kkibʼan ajtijoxelabʼ. Junam kukʼ ri apóstoles, kkitzijoj ri utz täq jastaq cho täq ja (Hechos 20:20). Xuqujeʼ kkikʼut ri kubʼij ri Loqʼalaj Pixabʼ chkiwach ri kkaj kketaʼmaj ri qastzij. Tekʼuriʼ, xaq xiw ta e jupuq winaq; are e jun familia achijabʼ xuqujeʼ ixoqibʼ che qas kkiloqʼoqʼej kibʼ xuqujeʼ kechajix rumal ri Qatat che kʼo pa ri kaj (2 Tesalonicenses 1:3). Ri jupuq rajpatanel ri Ajawaxel kkikoj kichoqʼabʼ rech kkiya kikotemal che xuqujeʼ kekitoʼ ri e winaq, rumal wariʼ kubʼan chike che e jun familia che kʼo kikotemal chkixoʼl. Chasikʼij uwach Salmo 33:12 xuqujeʼ Hechos 20:35.