CHIʼ qʼaxinaq chi oxibʼ qʼij che kaminaq ri Cristo, jujun chike ri ixoqibʼ che e rajtijoxelabʼ xebʼe che rilik ri jul tekʼuriʼ xkilo che jaqal chik. Esam chi ri abʼaj chuchiʼ, xuqujeʼ kʼot chi kʼo chupam.

Tekʼuriʼ xkil kebʼ ángeles. Jun chike ri ángeles xubʼij: «Ri ix kitzukuj ri Jesús aj Nazaret, [...] xkʼastaj kʼu bʼik ri areʼ» (Marcos 16:6). Ri ixoqibʼ, xebʼe panim che ubʼixik chike ri apóstoles. Pa ri bʼe xkiriq ri Jesús, xubʼij waʼ chike: «Mixeʼj iwibʼ. Jix. Chiyaʼ utzijol chike ri wachalal, rech kebʼe pa Galilea. Chilaʼ kʼut kinkil wi na» (Mateo 28:10).

Chiʼ xeqʼax ri qʼij, kebʼ chike ri ajtijoxelabʼ xeʼel bʼi pa Jerusalén xebʼe pa Emaús, jun winaq che kkichʼobʼ ta uwach xchʼaw kukʼ xuqujeʼ xutaʼ chike jas ri kkitzijoj. Are ri Jesús, are kʼu ri e areʼ kkichʼobʼ taj we are ri Jesús rumal che jun chi wi ri ubʼantajik. Rumal laʼ rukʼ bʼis xkibʼij che tajin kechʼaw chirij ri Jesús, ri achi xubʼij chike ronojel ri kubʼij ri Utzij ri Dios chirij ri Mesías. Ri Jesús xubʼan pa ri ukʼaslemal ronojel ri bʼim kan chirij ri Mesías. * Chiʼ xkilo che are ri Cristo tajin kchʼaw kukʼ, che are jun uxlabʼal chik, xsach chkiwach.

Ri kebʼ ajtijoxelabʼ xetzalij Jerusalén xuqujeʼ xebʼe kukʼ ri apóstoles, che kimulim kibʼ pa jun ja xuqujeʼ kitzʼapim uchiʼ. Chiʼ ri ajtijoxelabʼ tajin kkitzijoj ri xkʼulmatajik, konojel ri e kʼo chilaʼ xkixibʼij kibʼ chiʼ ri Jesús xukʼut chi ribʼ chkiwach. Xubʼij wariʼ chike: «¿Jasche kʼo kiʼebʼlan kʼuʼxaj pa ri iwanimaʼ?», xuqujeʼ xubʼij: «Jeʼ xtzʼibʼax kan waʼ chi ri Cristo kuriq na kʼax, chi kakam na, chi kakʼastaj na chkixoʼl ri kaminaqibʼ churox qʼij» (Lucas 24:38, 46).

Pa 40 qʼij, kʼi mul xilitaj uwach ri Jesús. Pa jun qʼij, más che 500 winaq xkil uwach. Weneʼ chiʼ xuya kan ri jun chak riʼ chike ri rajtijoxelabʼ: «Jix, chibʼanaʼ tijoxelabʼ chke ri winaq pa konojel ri tinimit cho ri uwach ulew [...]. Chebʼitijoj che unimaxik ronojel jas ri xixintaq wi» (Mateo 28:19, 20).

Ri kʼisbʼal qʼij che xkʼojiʼ kukʼ ri sukʼ apóstoles xubʼij chike: «Aretaq kʼu chpe ri Ruxlabʼal ri Dios piwiʼ, kikʼam na kuʼinem kixel kʼu na bʼik che uyaʼik qʼalajisanik chwij, [...] pa taq ri tinimit ri sibʼalaj naj e kʼo wi cho ronojel ri uwach ulew» (Hechos 1:8). Tekʼuriʼ xpaqiʼ pa ri kaj, jun sutzʼ xuchʼuq chkiwach konojel.

(Esam chupam ri capítulo 28 rech Mateo, ri capítulo 16 rech Marcos, ri capítulo 24 rech Lucas, ri capítulo 20 xuqujeʼ 21 rech Juan xuqujeʼ 1 Corintios 15:5, 6.)