OJER kanoq, jun mayordomo are ri ktaqan pa uwiʼ ri rachoch xuqujeʼ ri jastaq re jun winaq chik.

Are chiʼ ri José, ukʼojol ri Jacob, loqʼom pataninel pa Egipto, xkoj che mayordomo rumal ri rajaw. Wajun egipcio riʼ «xujach ri taqanik pa uqʼabʼ ri José puwiʼ ri rachoch xuqujeʼ ronojel ri jastaq rech» (Gén. 39:2-6). Tekʼuriʼ, are chiʼ José xux jun nimalaj qʼatal tzij pa Egipto xuqujeʼ xukoj jun winaq rech ktaqan pa uwiʼ ri rachoch (Gén. 44:4).

Pa taq uqʼij ri Jesús, ri e winaq che kʼo nimaʼq taq kulew pa ri tinamit kʼo wi ri kachoch, naj che ri kulew. Rumal laʼ kkikoj kan jun winaq rech krilij ri chak kkibʼan ri ajchakibʼ ronojel qʼij.

¿Jas rajawaxik che jun winaq rech kux mayordomo? Jun tzʼibʼanel romano re ri nabʼe siglo, ubʼiʼ Columela, xubʼij che rech kkoj jun winaq che capataz o mayordomo rajawaxik che qas ilom che kʼo nim retaʼmabʼal chrij ri chak. Rajawaxik «kʼo utz taq ubʼantajik», are ta jun winaq che kuya uwiʼ ri taqanik o kubʼan rukʼ itzelal. Columela xuqujeʼ xubʼij: «Ri bʼantajik más nim ubʼanik re jun mayordomo, are che qas kmachʼachʼik xuqujeʼ kraj kretaʼmaj ri retaʼm taj».

Ri uTzij ri Dios kukoj ri kʼutbʼal re ri mayordomo che uqʼalajisaxik ri kbʼan che jujun taq chak pa ri congregación cristiana. Jun kʼutbʼal, ri apóstol Pedro kuya kichuqʼabʼ ri cristianos rech kkikoj ri e jastaq yaʼom chke rumal ri Dios. Areʼ kubʼij: «Chiyalaʼ iwe chijujunal jas ri yoʼm chiwe rumal ri Dios, jeʼ jas utzalaj taq e chajil re ronojel uwach utoqʼobʼ ri Dios» (1 Ped. 4:10).

Ri Jesús xuqujeʼ xukoj ri kʼutbʼal re jun mayordomo are chiʼ xuqʼalajisaj ri kraj kubʼij ri kʼutbʼal che kriqitaj pa Lucas 16:1-8. Xuqujeʼ, ri xutzujuj chke ri utijoxelabʼ che kukoj na jun «jikalaj pataninel, utz uchomanik» o ri sukʼalaj mayordomo, are jun chke ri jastaq re ri profecía che kukʼutu che Qʼatal tzij chik. Ri chak che kubʼan ri mayordomo riʼ, are uyaʼik ri kajwataj che ri kikojonik ri cristianos pa ri kʼisbʼal taq qʼij (Mat. 24:45-47; Luc. 12:42). Sibʼalaj kqamaltyoxij che pa ronojel uwach Ulew ri sukʼalaj mayordomo kuya ri e wuj chqe rech kukowirisaj ri qakojonik.