Armagedon guërrachöqa, Dioswan kë Patsachö gobiernukunam pelyayanqa. Tsë gobiernukuna y yanapaqninkunaqa, Diospa autoridäninta mana respetarmi pëpa contran churakäyan (Salmus 2:2). Tsëmi Armagedon guërrachöqa gobiernukunata Dios ushakätsinqa (Daniel 2:44).

 Armagedon palabrataqa Har–Magedon nirpis qellqayanmi. Bibliachöqa juk kutillam tsë palabraqa yurin, Revelacion o Apocalipsis libruchö. Bibliachömi willakun entëru Patsachö gobernaqkunaqa, “Llapanta Puëdeq Teyta Dios nunakunata juzganan tiempuchö guërraman” juntakäyänampaq kaqta. Tsë guërraqa hebreu idiömachö Har–Magedon niyanqan sitiuchömi kanqa (Apocalipsis 16:14, 16).

 ¿Armagedon guërrachöqa pikunatan pelyayanqa? Jesuswan ciëluchö angelkunam Diospa chikeqninkunata ushakätsiyanqa (Apocalipsis 19:11-16, 19-21). Pëkunam Diospa Gobiernumpa contran kaqkunata y Diosta despreciaqkunata ushakätsiyanqa (Ezequiel 39:7).

 ¿Armagedon guërraqa juk sitiullachötsuraq kanqa? Manam. Armagedon guërraqa entëru Patsachömi kanqa, manam juk sitiullachötsu (Jeremïas 25:32-34; Ezequiel 39:17-20).

 Armagedon palabraqa (hebreu idiömachöqa Har Meghiddohn), “Meguidö jirka ninanmi”. Meguidö markaqa unë israelïtakuna kayanqan sitiuchömi karqan. Unë pasakunqanta willakoqkunam niyan, tsë sitiuchöqa mëtsika guërrakuna kanqanta. Y Bibliachöpis wakin guërrakunapaqqa willakunmi (Juëces 5:19, 20; 2 Rëyes 9:27; 23:29). Tsënö kaptimpis, Meguidöchöqa manam juk jatun jirka kantsu, tsëmi Armagedonqa juk sitiutsu. Meguidö sitiuqa Jezreel pampachömi këkan. Armagedon guërrachö Diospa chikeqninkuna pelyaq ëwarqa, alläpa takshalla kaptinmi, tsë sitiuchöqa juntakëta puëdiyanmantsu. Armagedon guërrachöqa, entëru Patsachö puëdeq gobiernukunam Diospa gobiernumpa contran pelyayanqa.

 ¿Armagedon guërrachöqa imatan pasanqa? Tsë guërrachö Teyta Dios poderninta imanö utilizänampaq kaqtaqa manam musyantsiktsu. Peru unë tiempuchö ruranqannöchi runtu tamyata, terremötukunata, atska yakuta, nina tamyata, azufrita, räyukunata y muyakoq o shukukoq qeshyakunata utilizanqa (Job 38:22, 23; Ezequiel 38:19, 22; Habacuc 3:10, 11; Zacarïas 14:12). Tsë guërrachöqa pantanakurmi Diospa wakin chikeqninkunaqa, kikinkunapura wanutsinakuyanqa. Peru tsëpitaqa cuentatam qokuyanqa, kikin Teyta Dioswan guërrachö këkäyanqanta (Ezequiel 38:21, 23; Zacarïas 14:13).

 ¿Armagedon guërrachötsuraq kë Patsa ushakanqa? Manam. Kë Patsataqa Teyta Dios kamashqa nunakuna imëyaqpis kawakuyänampaqmi (Salmus 37:29; 96:10; Eclesiastes 1:4). Armagedon guërrachöqa manam llapankunatsu ushakäyanqa. Diosta mana dejëpa sirweq ‘mëtsikaq nunakunam’, Armagedon guërrachöqa salvakuyanqa (Apocalipsis 7:9, 14; Salmus 37:34).

 ¿Manaku Bibliachöqa “kë patsa” o kë mundu Armagedonchö ushakänampaq kaqta nin? Wakin versïculukunachö mundu nirqa Patsapaqmi parlëkan. Tsënö kaptimpis, mundu nirqa Diosta mana cäsukoq nunakunapaqpis parlëkanmi (1 Juan 2:15-17). Pëkunapaqmi Bibliachöqa, “kë patsa” o kë mundu Armagedonchö ushakänampaq kaqta nin (Mateu 24:3, Teyta Diospa Willakïnin).

 ¿Imëtan Armagedon guërraqa kanqa? “Alläpa sufrimientu” ushëkaptinmi, Armagedon guërraqa kanqa. Tsëpaqmi Jesus kënö nirqan: “Tsëkuna imë junaq y imë höra pasanampaq kaqtaqa manam ni pï musyantsu, ni ciëluchö angelkuna ni Tsuripis, sinöqa kikin Teytallam” (Mateu 24:21, 36). Tsënö kaptimpis, Bibliachömi willakun Armagedon guërraqa Jesus këkämunqan witsanchö kanampaq kaqta. Y Jesus këkämunqan witsanqa, 1914 watam qallarqan (Mateu 24:37-39).