Wakin estudiashqa nunakunaqa niyan, Teyta Diosnintsik mana kanqantam. Tsënö kaptimpis, Bibliachöqa imëkam rikätsimantsik Teyta Dios kanqanta. Tsëkunapita musyëta munarqa, yachakunqëki höram Bibliachö ninqanman alli yarpachakunëki (1 Juan 5:20; Romänus 12:1). Teyta Dios rasumpa kanqanta musyanapaqqa, këkunapita yachakurishun:

•   Ciëluchö y Patsachö rikanqantsikkunaqa shumaq churashqam këkäyan. Tsëtaqa, ¿manatsuraq pillapis rurashqa? Bibliachöqa nimantsik: “Wayikunaqa kan pipis rurashqa kaptinmi, peru llapan imëkatapis ruraqqa Diosmi” (Hebrëus 3:4). Mëtsika nunakuna y estudiashqa nunakunapis rikäyashqam, Bibliachö ninqanqa rasumpa kaqlla kanqanta. a

•   Llapantsikmi alli y kushishqa kawakuyta munantsik. Tsënö kushishqa kanapaqqa, Teyta Diosta reqinqantsik y pëllata sirwinqantsikmi yanapamantsik. Y tsëqa röpapita, mikuypita y imëkayoq këpitapis mas allim. Teyta Dios tsënö kamamashqantsik kaptinmi, nunakunaqa tsëta rurëta munantsik (Mateu 5:3; Revelacion [Apocalipsis] 4:11). Teyta Diosta reqir y pëllata sirwirmi alli y kushishqaqa kawakushun (Mateu 4:4).

•   Diospa Palabranta mëtsika watakunana qellqayashqa kaptimpis, willakunqankunaqa llapanmi cumplikashqa. Tsënö cumplikanqanqa rikätsimantsik, Diospa Palabranqa ‘nunapa munënimpita’ mana kanqantam (2 Pëdru 1:21).

•   Bibliata qellqaqkunaqa unëpitanam musyayarqan Patsantsik imanö kanqanta, peru estudiashqa nunakunaqa manam musyayarqantsu. Tsëmi creiyarqan Patsaqa elefantipa, törupa o juk animalkunapa jananchö këkanqanta. Tsënö kaptimpis, Teyta Diosqa “imapis mana kaqmanmi patsata warkushqa” ninmi Bibliachöqa (Job 26:7, TNM). Y Patsa “redondu” kanqantapis ninmi (Isaïas 40:22; TNM). Bibliata qellqaqkunaqa manam kikinkunapitatsu Patsa imanö kanqanta qellqayarqan, sinöqa Teyta Dios musyatsiptinmi.

•   Diosman mana creeq nunakunaqa kënömi tapukuyan: “Teyta Dios alli y Llapanta Puëdeq këkaptinqa, ¿imanirtan llakikuykuna y imëka sufrimientukuna kan? ¿Imanirtan religionkunaqa imëka problëmakunaman chätsikuyan?” (Tïtu 1:16). Tsëkunataqa, Teyta Diosllam altsamuyta puëdinqa. Y tsëta musyanqantsikqa, ¿manaku Dios kanqanta mas creinapaq yanapamantsik?