Apocalipsis 12:1-17
12 Tsënam jatun señal ciëluchö rikakurqan: juk warmim+ intiwan o rupaywan vistishqa këkarqan, y killatam chakin jawanchö këkätsirqan, y peqanchömi o umanchömi döci estrëllakunayoq corönata katsirqan.
2 Tsë warmiqa qeshyaqmi këkarqan, y wamran yurinampaqna kaptinmi, nanatsikur y alläpa sufrir qaparikachar* këkarqan.
3 Juk señal masmi ciëluchö rikakurqan: qanchis peqayoq o umayoq y chunka waqrayoq nina color mantsëpaq jatun culebram yurirkamurqan,+ y peqankunachömi qanchis corönakuna karqan;
4 y kima kaq parti estrëllakunata+ chupanwan qaracharkurmi patsaman jitarkamurqan.+ Y yuririptinlla warmipa wamranta mikukurkunampaqmi, tsë mantsëpaq jatun culebraqa, wamran yurinampaqna këkaq warmipa+ puntanchö shëkar* quedakurqan.
5 Tsë warmiqa ollqu wamratam qeshpikurqan,+ pëmi llapan nacionkunata fiërrupita tukruwan gobernanqa.*+ Tsënam wamraqa Teyta Diosman y gobernar täkunanman apashqa karqan.
6 Y warmiqa tsunyaq sitiuchö Teyta Dios alistapunqan sitiunmanmi qeshpir ëwakurqan, y tsëchömi mil doscientus sesenta junaq mikunan qarayänan karqan.+
7 Tsënam ciëluchö guërra qallëkurqan. Miguelwan*+ angelninkunam mantsëpaq jatun culebrawan pelyayarqan, y mantsëpaq jatun culebrawan angelninkunapis pëkunawanmi pelyayarqan,
8 peru manam vencita puëdiyarqantsu,* y manam pëkunapaq ciëluchö sitiu karqannatsu.
9 Tsëmi mantsëpaq jatun culebraqa,+ awmi, entëru patsata engañëkaq*+ Diablu+ y Satanas+ niyanqan unë kaq culebraqa,+ uraman jitashqa karqan. Pëtaqa patsamanmi jitarkayämurqan, y angelninkunatapis pëtawan juntum jitarkayämurqan.+
10 Y ciëluchö fuertipa kënö neqtam wiyarqä:
“¡Diosnintsikmi nunakunata salvashqa!+ ¡Alläpa puëdeq kanqanmi cläru rikäkushqa! ¡Gobiernunmi patsakärishqa!+ ¡Cristunmi autoridä kar qallëkushqa! Kananmi Diosnintsikpa puntanchö+ paqasta junaqta wawqintsikkunata acusaqta jitarkuyashqa.
11 Orqu* Üshapa yawarninrëkur+ y willakuyanqan noticiakunarëkurmi+ pëkunaqa venciyarqan,+ y wanuy janankunachöna këkaptimpis, manam vïdankunata* väleqpaq churayarqantsu.*+
12 Tsëmi ¡kushikuyë ciëlukuna, y tsëchö kawaqkuna! Peru ¡allaw patsa y lamar!+ Wallka tiempullana kananta musyarmi, Diabluqa alläpa cölerashqa qamkunaman urämushqa”.+
13 Patsaman jitashqa kanqanta rikëkurnam,+ tsë mantsëpaq jatun culebraqa ollqu wamrata qeshpikushqa warmita qatikachar qallëkurqan.+
14 Peru tsë warmiqa tsunyaqchö këkaq sitiunman volar* ëwanampaqmi, jatun pichakpa* ishkan älankunata chaskirqan,+ tsëchömi culebrapa rikënimpita karuchö, juk tiempupa y tiempukunapa y pullan tiempupa,*+ mikunan chaskinqa.+
15 Y warmipa qepanta ëwar warmita wanuratsinampaqmi, tsë culebrapa shimimpita mayunöraq* yaku yarqamurqan.
16 Peru patsam tsë warmita yanapaq shamurqan. Patsaqa shiminta kichëkurmi mantsëpaq jatun culebrapa shimimpita yarqoq mayuta* tragakurkurqan.
17 Tsënam tsë mantsëpaq jatun culebraqa warmiwan alläpa cölerakur, tsë warmipa quedaq kastankunawan guërrata ruraq ëwakurqan.+ Pëkunaqa Teyta Dios mandakunqantam cäsukuyan, y Jesuspita willakuyänampaqmi carguta chaskiyashqa.+
Nötakuna
^ Kënöpis niyanmi: qayarëkachar.
^ Kënöpis niyanmi: ichirëkar.
^ Griëgu idiömachöqa “mitsinqa” ninmi.
^ Tsë jutiqa, “¿pitan Teyta Diosnöqa?” ninanmi.
^ O capazchi “peru pëqa [tsënö nirqa, mantsëpaq jatun culebrapaqmi parlëkan] vencishqam karqan”.
^ O “pantëkätseq; mana alliman chëkätseq”.
^ Kënöpis niyanmi: Mächu.
^ Griëgu idiömachöqa “almankunata” ninmi. Rikäri “Bibliachö palabrakunata entiendinapaq” neqta.
^ O “kuyayarqantsu”.
^ Kënöpis niyanmi: pärir; vuëlar.
^ Kënöpis niyanmi: ankapa; pichakapa.
^ Tsënö nirqa, kima tiempu pullampaqmi parlëkan.
^ Kënöpis niyanmi: riunöraq.
^ Kënöpis niyanmi: riuta.
