Genesis 2:1-25
2 Tsënömi Teyta Diosqa ciëluta, patsata, y tsëchö llapan kaqkunata kamarqan.+
2 Qanchis kaq junaqpaqqa, llapan ruranampaq kaqtam* Teyta Diosqa ushashqana karqan. Llapan ruranampaq kaqta ushashqana karmi, Teyta Diosqa tsë qanchis kaq junaqchö jamar qallëkurqan.+
3 Tsë junaqpaqmi Teyta Diosqa llapan kamanampaq kaqta y llapan pensanqanta rurar usharqan, tsëmi tsë junaqta bendicirqan y sagrädu kanampaq nirqan, y tsë qanchis kaq junaqchömi Teyta Diosqa jamëkan.
4 Këchö willakunqanqa, ciëluta y patsata Teyta Dios kamanqan tiempuchömi pasarqan. Awmi, kë llapanmi pasarqan ciëluta y patsata Jehovä* Dios kamanqan junaqchö.+
5 Tsë tiempupaqqa, Jehovä Diosqa manam tamyatsimushqaraqtsu karqan, tsëmi patsachöqa ni ima plantapis karqanraqtsu ni winarqanraqtsu. Y manaran ni nunapis karqanraqtsu chakrakunachö trabajanampaq.
6 Tsënö kaptimpis, patsapita pukutë sharkurmi* patsata oqütseq.
7 Jehovä Diosqa allpapitam nunata rurarqan.+ Y kawar qallanampaqmi senqanman pükëkurqan.+ Tsënam tsë ruranqan nunaqa* kawar qallëkurqan.+
8 Jehovä Diosqa Eden jutiyoq sitiuchömi inti o rupay yarqamunan lädupa juk jatun huertata rurarqan.+ Y tsëmanmi kamanqan nunata churarqan.+
9 Jehovä Diosqa kuyanëpaq tukuy cläsi frütayoq plantakunatam patsapita jeqatsimurqan. Y tsë huerta chowpinchömi* kawatsikoq plantata jeqatsimurqan,+ y tsëchömi ima alli kanqanta y ima mana alli kanqanta musyatsikoq plantatapis jeqatsimurqan.+
10 Eden jutiyoq sitiupita yarqamoq mayum* tsë jatun huertata regaq, y tsëpitanam chusku mayukunaman rakikaq.
11 Punta kaq mayupa* jutinqa Pisonmi. Tsë mayuqa Havilä jutiyoq sitiu kuchumpam tumamun, y tsë sitiuchöqa örum kan.
12 Tsë sitiuchö kaq öruqa mas alli kaqmi. Y tsëchöqa bedeliu jutiyoq planta y önici rumikunam kan.
13 Ishkë kaq mayupa jutinqa Guihonmi. Tsë mayuqa* Cus jutiyoq sitiu kuchumpam tumamun.
14 Kima kaq mayupa jutinqa Hidequelmi.*+ Tsë mayuqa* Asiriapita inti o rupay yarqamunan lädupam ëwan.+ Y chusku kaq mayupa jutinqa Eufratismi.+
15 Jehovä Diosqa, Eden huertamanmi kamanqan nunata churarqan, tsë huertata shumaq rikänampaq y imëkata rurar trabajanampaq.+
16 Jehovä Diosqa kënömi nunata nirqan: “Huertachö këkaq plantakunapa frütantaqa pachëki juntanqanyaqmi mikuyta puëdinki.+
17 Peru ima alli kanqanta y ima mana alli kanqanta musyatsikoq plantapa frütantaqa ama mikunkitsu, tsë plantapa frütanta mikurqa, mikunqëki junaqmi wanunki o wañunki”.+
18 Tsëpitanam Jehovä Diosqa nirqan: “Manam allitsu nuna japallanlla këkanqan, yanapaqnin kanampaq yanaqin o wallkin rurashaq”.+
19 Jehovä Diosqa, llapan chukaru animalkunata y volaq* pishqukunatam allpapita rurashqa karqan. Tsëpitanam jutin churanampaq tsë animalkunata nunaman aparqan. Tsënam nunaqa cada animalpaq jutin churarqan, y tsëmi jutinkuna karqan.+
20 Awmi, manshu animalkunapaq, ciëluchö volaq* pishqukunapaq y chukaru animalkunapaqmi jutinkuna churarqan. Tsënö kaptimpis, manam nunapaqa yanaqin o wallkin kanampaq yanapaqnin karqantsu.
21 Tsënam Jehovä Diosqa nunata pasëpa* punukäratsirqan, y punukashqa këkaptinmi, juk costillanta jipiskir qaranta juntarqan.
22 Tsë costillampitam Jehovä Diosqa juk warmita rurarqan, y tsëpitam ollqu kaqman aparqan.+
23 Tsënam Adanqa nirqan:
“Pëqa tullüpita rurashqa,y ëtsäpita rurashqam.
Pëqa ollqupa costillampita rurashqam,+tsëmi Warmi nir reqishqa kanqa”.
24 Tsëmi ollquqa papäninta y mamäninta dejanqa, y warminwan juntakanqa, y ishkanmi jukllëllana kayanqa.*+
25 Nunawan warminqa qalapächum këkäyarqan,+ y tsënö këkarpis manam penqakuyaqtsu.
Nötakuna
^ O “rurëkanqankunatam”.
^ Kë versïculuchömi Diospa jutin puntata yurin (hebreu idiömachöqa kënö letrakunawanmi qellqayaq: יהוה. Tsëqa YHWH letrakunam kayan). Rikäri “Masllata musyanapaq” neqchö A4 kaqta.
^ Kënöpis niyanmi: joqakämurmi.
^ O “almaqa”. Hebreu idiömachöqa “nëfesh” ninmi. Tsëqa “shütaqta kamanqan” ninanmi. Rikäri “Bibliachö palabrakunata entiendinapaq” neqta.
^ Kënöpis niyanmi: pullanninchömi.
^ Kënöpis niyanmi: rium.
^ Kënöpis niyanmi: riupa.
^ Kënöpis niyanmi: riuqa.
^ O “Tigrismi”.
^ Kënöpis niyanmi: riuqa.
^ Kënöpis niyanmi: päreq; vuëlaq.
^ Kënöpis niyanmi: päreq; vuëlaq.
^ Kënöpis niyanmi: jankat.
^ O “juk cuerpullana kayanqa”.
