Mateu 19:1-30
19 Tsë llapanta niskirnam Jesusqa Galilëapita ëwakurqan, y Jordan mayupa* wak tsimpanchö Judëa provinciapa kuchunmanmi charqan.+
2 Mëtsika nunakunam qepanta ëwayarqan, y pëqa llapan qeshyëkaqkunatam alliyätsirqan.
3 Tsënam fariseukunaqa mana alliman chätsita munar pëman witïkur kënö tapuyarqan: “¿Alliku imarëkurllapis juk nuna warmimpita divorciakunman?”.+
4 Tsënam pëqa kënö nirqan: “¿Manaku leyiyashqanki qallananchö nunakunata kamaqqa ollquta y warmita kamanqanta,+
5 y kënö ninqanta: ‘Tsëmi ollquqa papäninta y mamäninta dejanqa, y warminwan juntakanqa, y ishkanmi jukllëllana kayanqa’?+
6 Tsëmi ishkaqnatsu kayan, sinöqa jukllëllana.* Tsënö këkaptinqa, Teyta Dios juntanqantaqa,* ama ni pï rakitsuntsu”.+
7 Tsënam pëkunaqa niyarqan: “Tsëqa, ¿imanirtan Moisesqa mandakurqan divorciu papelnin entreguëkur pï nunapis warmimpita divorciakunampaq?”.+
8 Jesusnam kënö nirqan: “Chukru shonqu kayaptikim Moisesqa warmikikunapita divorciakuyänëkita permitirqan,+ peru qallananchöqa manam tsënötsu karqan.+
9 Noqam qamkunata nï,* pï nunapis warmin mana engañashqa këkaptin* divorciakur jukwan casakoqqa, jukwan oqllanakuy jutsatam* rurëkan”.+
10 Qateqninkunanam, “ollquwan warmi tsënö kayänan këkaptinqa, mana casakuychi mas alliqa kanman” niyarqan.
11 Tsënam pëqa kënö nirqan: “Manam llapankunatsu ninqäta rurëta puëdiyan, sinöqa Teyta Dios yanapanqan kaqkunallam.+
12 Wakinqa tsënö yurishqa karmi casakuyantsu, wakinnam kapashqa karnin casakuyantsu, y wakinnam Teyta Diospa Gobiernunchö masta rurayänanrëkur casakuyantsu. Japallan këta puëdeqqa, japallan kakutsun”.+
13 Tsëpitanam bendicinampaq y pëkunapaq Teyta Diosman mañakunampaq nunakuna wamrakunata Jesusman apayarqan, peru qateqninkunaqa qayapäyarqanmi.+
14 Peru Jesusqa kënömi nirqan: “Ama michäyëtsu wamrakuna noqaman shayämunanta, Teyta Diospa Gobiernunqa pëkunanö kaqkunapaqmi”.+
15 Tsëpitanam wamrakunaman makinta churar bendicïkur tsëpita ëwakurqan.
16 Tsëpitanam juk nuna pëman witïkur, “Maestru, ¿ima allikunatataq ruranä mana wanurna kawakunäpaq?” nir tapurqan.+
17 Tsënam pëqa nirqan: “¿Imanirtan ima alli kanqampaq noqata tapumanki? Jukllëllam alli kaqqa.+ Tsënö kaptimpis, imëyaqpis kawëta munarqa, Teyta Dios mandakunqankunatam imëpis cäsukunëki”.+
18 Pënam, “¿mëqan mandakunqankunata?” nirqan. Jesusnam nirqan: “Manam nuna mayikikunata wanutsiyänëkitsu,+ mana majëkikunawanqa manam oqllanakuyänëkitsu,+ manam suwakuyänëkitsu,+ ama mana kaqtaqa pitapis tumpayankitsu,+
19 papänikikunata y mamänikikunatam kuyar respetayänëki+ y qamkuna kuyakuyanqëkinömi nuna mayikikunatapis kuyayänëki”.+
20 Tsë jövinnam, “tsë llapankunatam cäsukurqö, ¿ima mastataq ruranä?” nirqan.
21 Tsënam Jesusqa kënö nirqan: “Imëkachöpis alli këta munarqa,* ëwar llapan imëkëkita rantikuykur tsë qellëta waktsakunata qarëkuy, tsëqa ciëluchömi imëka väleqkuna kapushunki.+ Tsëpitana qepäta shamur qatimaqnï kë”.+
22 Tsënö niptinnam tsë jövinqa imëkayoq kar llakishqa ëwakurqan.+
23 Tsënam Jesusqa qateqninkunata nirqan: “Noqam qamkunata nï,* rïcu nuna Diospa Gobiernunman yëkunampaqqa manam fäciltsu kanqa.+
24 Yapëmi qamkunata nï,* rïcu nuna Teyta Diospa Gobiernunman yëkunampitaqa, mas fäcilmi awjapa uchkumpa juk camëllu pasarinman”.+
25 Tsëta wiyëkurnam qateqninkunaqa alläpa mantsakar kënö niyarqan: “Tsëqa, ¿pillanaraq salvakuyta puëdinman?”.+
26 Tsënam Jesusqa pëkunata defrenti rikëkur kënö nirqan: “Nunakunapaq mana puëdipaqnö kaptimpis,Teyta Diospaqqa llapampis puëdikanmi”.+
27 Tsënam Pëdruqa kënö contestarqan: “Noqakunaqa llapan imëkäkunata dejëkurmi qamta qatiyarqoq, tsëqa, ¿imataraq chaskiyäshaq?”.+
28 Jesusnam kënö nirqan: “Noqam qamkunata nï,* Teyta Dios llapantapis mushoqta tikratsiptin* y Nunapa Tsurin chipapëkaq gobernar täkunanman jamariptinmi, qamkuna, qatimaqnï kaqkunapis, döci gobernar täkunakunaman jamakuyanki, y Israelpa döci kastankunatam juzgayanki.+
29 Y qatimaqnï kar wayinta, wawqinkunata, paninkunata, papäninta, mamäninta, wamrankunata o chakrankunata dejashqa kaqqa, cien kuti mastam chaskinqa y imëyaqpis kawëtam tarinqa.+
30 Peru atskaq puntachö kaqkunam, qepachö kayanqa; y qepachö kaqkunanam, puntachö kayanqa.+
Nötakuna
^ Kënöpis niyanmi: riupa.
^ O “juknöllana”.
^ O “yüguman churanqantaqa”.
^ Kënöpis niyanmi: pecädutam.
^ Griëgu idiömachö: pornëia. Rikäri “Bibliachö palabrakunata entiendinapaq” neqta.
^ Kënöpis niyanmi: niyaq.
^ O “Llapanta cumplita munarqa”.
^ Kënöpis niyanmi: niyaq.
^ Kënöpis niyanmi: niyaq.
^ Kënöpis niyanmi: niyaq.
^ O “imëkapis yapë kamashqa kaptin”.
