Don y warmin Margaretqa a wamran, mashan y willkankuna visitaq ëwayanqampitam kushishqa këkäyarqan. Pëkunaqa ëwakuyänannam karqan, tsëmi Margaretqa willkankunata alläpa gustaptin fidëustawan quësuta ruranan karqan. Pëqa cocinar trabajanampaq estudiashqa karninmi, unëpitana cocinapakur trabajashqa.

Margaretqa llapankuna tëkäyaptinmi, mësa jananman mankata churarirqan. Y mankapa täpanta jorqarirnam alläpa espantashqa quedarirqan, porqui ¡mankachöqa quësullam kanaq! Pëqa fidëusnin winëtam qonqëkurqan. b

Ëka watayoq kar o mëläya yachaq karnimpis, llapantsikmi imallachöpis pantarintsik. Jina mana pensashpam imatapis parlarintsik o mana alli hörachömi imatapis rurarintsik. Peru, ¿imanirtaq mana allikunata rurantsik? ¿Imanötaq tsëkunata rikashwan? ¿Imaraq tsëkunata mana ruranapaq yanapamäshun? Tsë pasakunqankunata allipa rikanqantsikmi, kë tapukïkunata contestanapaq yanapamäshun.

Allita rurashqaqa, alabapämashqa o imantsikllapis qaramashqa kushishqam chaskikuntsik. Peru mana allita ruranqantsikta jukkuna mana cuentata qokuyaptinqa, ¿mana allita rurëkanqantsiktaku nintsik? Tsëta ruranapaqqa humildim kanantsik.

Orgullösu kashqaqa mana alli ruranqantsikta mana kaqpaqmi churarishwan, mana ruranqantsiktam nishwan y wakintapis tumparishwanmi. Peru tsënö portakïqa mana allimanmi chätsikun, porqui tsë problëmaqa itsapis altsakanmantsu o hasta wakin nunakunapis tumpashqa kayanman. Jina tsë höra problëmakunapita librakärishqapis, yarpänantsikmi “cada ünu kikintsikpita Diosta cuentata” qonapaq kaqta (Romänus 14:12).

Mana allita ruranqantsikkunataqa juknöpam Diosqa rikan. Salmus libruchömi ‘alläpa llakipäkoq y alläpa alli’ kanqanta nin. Jina kënöpis ninmi: “Mana allita ruranqantsikkunataqa manam imëpis yarparäkïkanqatsu”. Pëqa alleqmi musyan jutsasapa kanqantsikta y imakunachö pishipanqantsiktapis; awmi, Diosnintsikqa “yarpanmi allpapita rurashqa kanqantsikta” (Salmus 103:8, 9, 14).

Alläpa ankupäkoq o llakipäkoq teyta karmi, Diosnintsikqa mana alli ruranqantsikkunata pënölla rikänata munan (Salmus 130:3). Pëqa mana allita rurashqa o pipis mana allita ruramashqa altsanantsikpaqmi, atska y shumaq consëjukunata Palabran Bibliawan qomantsik.

Wakin nunakunaqa, mana allita parlayanqampita o rurayanqampita jukkunata tumpar y imëpis tsapäkurmi tiempunkunata perdiyan. Tsëta ruranëkipa rantinqa, pitapis parlakïnikiwan llakitsishqa  karninqa disculpakunqëki, problëmata altsanqëki y amïgulla karnin sïguiyanqëkim mas alliqa kanman. Ruranqëkikuna kikikipaq o wakinkunapaq mana alli kaptinqa, kikikiwan piñakunëkipa rantin o pitapis tumpanëkipa rantinmi altsëta procuranëki. Pantanqëkikunapita tsapakurlla kakurqa, mas yarpachakïmanmi chanki y problëmëkikunapis manam altsakanqatsu. Tsëmi mana alli ruranqëkikunapita yachakunëki, raslla altsanëki y tsë pasakunqankunata chipyëpa qonqëkunëki.

Wakinkuna imallachöpis pantariyaptinqa, fäcilmi pëkunawan piñakurkïqa. Peru tsëta ruranëkipa rantinqa, Jesus kënö consejakunqanta cäsukunëkim mas alliqa kanman: “Imanömi nunakuna tratayäshunëkita munayanki, tsënölla qamkunapis pëkunata tratayë” (Mateu 7:12). Mana allita rurashqa wakinkuna ankupämashqa y ruranqantsikta chipyëpa qonqëkuyaptinqa, alläpam agradecikuntsik. Tsëqa, ¿imanirtaq kallpachakunkitsu wakinkunata tsënölla tratanëkipaq? (Efesius 4:32).

Pantanqantsikkunaqa alli pensëkur mana ruranqantsikpita, rasumpa kaqta mana musyanqantsikpita o alkäbulla mana këkanqantsikpita kanqantam, juk diccionariuqa nin. Llapantsikmi musyantsik imë höra karpis tsëkuna pasamänapaq kaqtaqa. Tsënö kaptimpis, Diospa Palabran ninqanta cäsukushqaqa mana alli rurëkunapitam cuidakushun.

Proverbius 18:13 textuchömi kënö nin: “Pipis manaraq wiyarnin ima asuntupaqpis raslla contestarqa, upa kanqantam rikätsikun y penqakïchömi ushan”. Këchö ninqannöpis, imanö pasakunqanta shumaq wiyanqantsik y imatapis manaraq nir alleq pensanqantsikqa, llutankunata mana parlanapaq y raslla mana piñakunapaqmi yanapamäshun. Awmi, imatapis alleq musyanapaq shumaq wiyakushqaqa, imatapis alli pensëkur ruranapaqmi yanapamäshun.

Romänus 12:18 textuchönam kënö nin: “Puëdirninqa, y qamkunapita kaptinqa, llapan nunakunawan yamë kawakuyë”. Imëpis yamë y juknölla kawakuyänëkipaq yanapakïta procurë. Jukkunawan trabajarqa pëkunatapis cuentaman churë y respetë. Jinamampis, alli rurayanqampita shumaq parlapäri. Tsënö rurarninqa, ima ninakushqa karpis rasmi perdonanakuyanki. Y problëmaman charpis, mana piñatsinakushpam shumaq altsariyanki.

Mana allita ruranqëkikunapita yachakïta procurë. Ama ruranqëkikunapita y imata ninqëkikunapita tsapäkïta tïrëtsu; tsëpa rantinqa, tsë ruranqëkikunapita yachakï mas alli nuna kanëkipaq. Itsapis këkunachö mas alliyëta procurankiman pacienciayoq këchö, alli shonquyoq këchö, peqata alli tsarëchö, yachanëpaq këchö, yamë këchö y kuyakoq këchö (Gälatas 5:22, 23). Mana allita ruranqëkipitaqa, yapëchö imata mana ruranëkipaq kaqtam yachakunki. Ruranqëkikunaman yarparäkurllaqa ama kakïtsu, peru mana allikunata rurarllaqa ama sïguitsu. Imallapitapis piñatsinakï kaptinqa, brömanakurinqantsikmi yanapamäshun.

Mana alli rurëkunata Dios rikanqannö rikashqaqa, alleqmi musyashun tsë cäsu pasakuptin imata ruranapaq kaqta. Wakinkunawanmi yamë kashun y kikintsikpis allim sientikushun. Mana allikunata ruranqantsikpita yachakurqa mas yachaqmi, y yachanëpaqmi kashun. Jinamampis, manam alläpaqa llakikushunnatsu y mana cambianapaq kaqtaqa manam pensashuntsu. Wakinkunapis allikunata rurayänampaq kallpachakïkäyanqanta cuentata qokushqaqa, pëkunawanmi mas amïgu kashun. Y masqa yanapamäshun, Diosnintsiknö kuyakoq y perdonakoq kanapaqmi (Colosensis 3:13).

¿Imataq pasakurqan Margaret pantanqanwan? ¿Tsërëkurku piñakuyarqan? Manam. Piñakuyänampaq rantinmi, llapankuna Margaret pantanqampita asikuyarqan y kushishqam mana fidëusyoqllatapis mikuyarqan. Watakuna pasariptimpis, willkankunaqa awilanta pasanqantam wamrakunata willayarqan, y awilunkunawan kushishqa kayanqantam yarpäyan. Awmi, tsë pasakunqanqa manam alläpa mana alli rurëtsu karqan.