Allqükunata gallëtankuna qarayan
ESTÄDUS UNÏDUSCHÖ këkaq Oregonchömi, Nick jutiyoq nuna täran. Pëmi kënö nin: “2014 wata qallëmi, allqükunata pasyatsir qallëkurqä. Y tsëchömi, publicacionninkunata churayänan carrïtunkunawan Jehoväpa testïgunkuna imëpis këkäyaq. Pëkunaqa alli vistishqa y pïmëtapis tsëpa pasaqkunata kushishqa saludarmi këkäyaq.
Testïgukunaqa, manam nunakunallatatsu shumaq tratayaq, sinöqa allqükunatawanmi. Juk junaqmi, tsë carrïtupa lädunchö Elaine jutiyoq juk warmi këkarqan, y pëmi ishkan allqükunata gallëtankuna qararirqan. Tsë junaqpitam, gallëtakunata qarayanqan esquïnaman chëkäyaptï, allqükunaqa imëpis sutayämaq.
Tsënömi mas killakuna pasarqan. Allqükunaqa, gallëtankuna qarayaptinmi kushishqa këkäyarqan, y noqanam, Testïgukuna Bibliapita wallkallata parlapäyämanqanwan kushishqa këkarqä. Peru noqaqa, manam pëkunawan alläpaqa parlëta munarqätsu. Setenta watapitapis masyoqnam karqä y Testïgukuna imata creiyanqantaqa manam allillaqa musyarqätsu. Protestanti religionpa iglesiankunachö mana allikunata rikashqa karmi, Bibliata japallä estudianqä mas alli kanampaq kaqta pensarqa.
Tsë witsankunapaqqa, publicacionninkunata churarätsiyanqan carrïtunkunatawanmi markäpa juk sitiunkunachöpis Testïgukunata rikar qallëkurqä. Pëkunapis shumaq tratakoqmi kayarqan. Imatapis tapukuptï Biblia ninqanwan contestayämaptinmi, pëkunaman mas confiar qallëkurqä.
Juk junaqmi, Elaine kënö tapumarqan: ‘¿Animalkunaqa Diospa qarënintsuraq kayan? Tsënam, ‘awmi’ nirqä. Tsëpitam Isaïas 11:6 a 9 ninqanta leyiramurqan. Tsëpitaqa, jukläyapanam pëkunata rikar qallëkurqä. Tsënö kaptimpis, manam publicacionninkunata apëtaqa munarqäraqtsu.
Qateqnin kaq junaqkunaqa, Elainewan y nunan Brentwanmi, Bibliachö këkaq shumaq yachatsikuykunapita wallka minütukunallachö parlayarqä. Cristu ruranqannö rurë ima ninan kanqanta alli entiendinäpaqmi, Mateupita Hëchusyaq Bibliata leyinäpaq niyämarqan. Y tsëtam rurarqä. Tsëpita wallka tiempullachömi, Brentwan y Elainewan Bibliata estudianäpaq decidirqä. Tsëqa, 2016 wata pullanmannömi karqan.
Cada semänam, Bibliata estudiayänäpaq y Diospita Yachatsikuyänan wayichö reunionkunam ëwanäpaq kushishqa shuyaraq kä. Bibliapita yachakuykanqäpitam, alläpa kushikurqä y agradecikurqä. Tsëpita juk watapita ichik mastam bautizakurirqä. Kananqa, setenta y nuëvi watayoqnam kä y Diospita rasumpa kaqta yachakuykanqätam següru këkä. Jehoväqa, entëru Patsachö pëta sirweq nunakunawan juk familianölla kanäpaq akramarnïmi bendicimashqa”.
