1. (1) ¿Imatataq jövinkuna decidiyänan? (2) ¿Imanirtaq jövinkuna mantsakuyanmantsu? (Rikäri kë yachatsikïpa qallananchö këkaq fötuta).

VIÄJITA manaraq yarqurnin puntallapitana llapanta patsätsi mas alli kanqantaqa llapantsikpis musyantsikmi. Jövin, kawënintsikwampis tsënöllam pasakun. Tsëmi kawënikichö imata ruranëkipaq kaqtaqa, jövin këkarninmi patsätsinëki. Peru tsëta rurananqa itsa fäciltsu kanqa. Heather jutiyoq juk cristiänam kënö nin: “Kawënïchö imata ruranäpaq kaqman pensëtaqa alläpam mantsä”. Qampis tsënö sientikurqa, Jehovä kënö ninqanta yarpë: “Ama imatapis mantsëtsu. Ama wakman këman rikachakïtsu, porqui noqam Diosniki kä. Noqam kallpata qoshqëki. Noqam rasumpa yanapashqëki” (Is. 41:10).

2. ¿Imanötaq musyanki kushishqa kawakunëkita Jehovä munanqanta?

² Shamoq tiempuchö imata ruranëkipaq kaqta shumaq patsätsinëkipaqmi Jehoväqa nishunki y kushishqa kawakunëkitam munan (Ecl. 12:1; Mat. 6:20). Tsëtaqa musyanki, shumaq kamanqankunata rikarnin, wiyarnin y mikurninmi. Jina pensari, imanö cuidamanqantsikta y shumaq kawakunapaq yachatsimanqantsikta. Peru consëjunkunata mana wiyakoqkunataqa kënömi nin: “Mana kushitsimanqan kaqtam  akrayarqunki. [...] ¡Rikäyë! Sirwimaqnïkunaqa mikuyanqam, peru qamkunaqa mallaqäyankim [...]. ¡Rikäyë! Sirwimaqnïkunaqa shonqunkunachö alli kayanqampitam kushishqa cantayanqa” (Is. 65:12-14). Awmi, imatapis allita decidirninqa Jehovätam alabantsik (Prov. 27:11).

3. ¿Imata ruranëkipaqtaq Jehoväqa consejashunki?

³ ¿Imatataq Jehovä consejashunki? Këman pensari. Pëmi animalkunata kamarqan mikur, upur y mirarnin kushishqa kawakuyänampaq, peru noqantsiktaqa kamamarquntsik, pëta reqirnin y mana jaqipa sirwirnin kushishqa kawanapaqmi (Sal. 128:1; Mat. 5:3). Bibliaqa nin, Jehoväqa “kuyakoq” y “kushishqa” Dios kanqanta, y nunakunata ‘kikin niraqta’ kamanqantam (2 Cor. 13:11; 1 Tim. 1:11; Gen. 1:27). Tsëmi kushishqa këta munarqa, Jehovä ruranqannöllam ruranëki. Palabranchömi kënö nimantsik: “Imatapis qokïmi imata chaskipitapis mas kushikïtaqa apamun” (Hëch. 20:35). Tsënö ninqan rasumpa kanqantaqa imëllapis rikarqunkichi. Tsëmi Jehoväqa munan imatapis ruranëkipaq patsätsinqëkichö, pëta y nuna mayikita kuyanqëkita rikätsikunëkita (leyi Mateu 22:36-39).

4, 5. ¿Imanirtaq Jesusqa kushishqa karqan?

⁴ Jövinkuna, Jesucristu ruranqannöllam qamkunapis rurëta puëdiyanki. Wamrallaraq këkarninqa, pëpis pukllaqchi y kushikoqchi. Porqui Diospa Palabran ninqannöpis kanmi tiempu ‘asikunapaq y tushurinapaqpis’ (Ecl. 3:4). Peru Jesusqa Diospa Palabrampitapis yachakoqmi, tsënöpam Teytanwan alli amïgu kayarqan. Tsëchi 12 watayoqllaraq këkarnin, ‘alli yachaq kanqanta y llapantapis yachëwan contestanqanta rikarnin’ templuchö yachatsikoqkunaqa alläpa espantakuyarqan (Lüc. 2:42, 46, 47).

⁵ Y poqu nuna tikrarirnimpis, Dios munanqanta rurarninmi Jesusqa kushishqa karqan. Teytanqa munarqan, ‘waktsakunata alli willakïkunata willananta’ y ‘yapë rikäyänampaq kaqta wiskukunata willanantam’ (Lüc. 4:18). Tsëta rurar, ¿imanöraq Jesusqa sientikurqan? Salmus 40:8 textum kënö nin: “Diosllä, munanqëkita rurarmi alläpa kushishqa sientikü”. Awmi, ciëluchö këkaq Teytampita nunakunata yachatsiqa alläpam gustaq (leyi Lücas 10:21). Juk kutichöqa, Diosta imanö adorana kanqantam juk warmita yachatsirqan. Y discïpulunkunatam kënö nirqan: “Mikïnïqa kachamaqnïpa munëninta rurëmi, y ruranäpaq nimanqanta ushëmi” (Juan 4:31-34). Awmi, Diosta y nuna mayinkunata kuyanqanmi Jesustaqa kushitsirqan. Y tsënö ruranqëkim qamtapis kushitsishunki.

6. Imatapis rurëta pensëkanqëkita juk poqu cristiänuta willarinqëkiqa, ¿imanirtaq alli kanman?

⁶ Mëtsikaq cristiänukunam jövinllaraq këkarnin precursor këman chäyarqan, tsëqa pëkunata alläpam kushitsirqan. ¿Imanirtaq imatapis rurëta pensëkanqëkita mëqanllatapis willarinkitsu? Porqui Proverbius 15:22 textum kënö nin: “Atskaq consejakoqkuna kaptinqa imëkapis allim yarqun”. Llapan tiempïkiwan Jehoväta sirwinqëkichö yachakunqëkikunaqa, llapan kawënikichö imanö yanapashunëkipaq kaqtam pëkunaqa niyäshunki. Jesusqa ciëluchö këkarninmi Teytampita mëtsikata yachakurqan. Y kë Patsachö nunakunata yachatsirnimpis sïguirqanllam yachakurnin. Awmi, Diospa yachatsikïnin nunakunapa shonqunman chanqanta rikanqan y pruëbakunapa pasar alli tsarakunqanmi alläpa kushitsirqan (leyi Isaïas 50:4 *; Heb. 5:8; 12:2). ¿Imanirtaq llapan tiempïkiwan Diosta sirwinqëkiqa kushitsishunki? Rikärishun.

7. ¿Imanirtaq mëtsikaq jövinkunataqa nunakunata Bibliapita yachatsi gustan?

⁷ Qateqninkuna tikrayänampaq nunakunata  yachatseq ëwanapaqmi Jesusqa cristiänukunata nimantsik (Mat. 28:19, 20). Kawënikichö tsëta ruranëkipaq decidirninqa, alläpa kushishqam kanki y Diostam alabanki. Peru wakin rurëkunachö pasanqannöllam, alli yachatsikoq kanëkipaqpis tiemputaraq wananki. Timothy jutiyoq juk cristiänum kënö nirqan: “Llapan tiempüwan Jehoväta sirwiqa alläpam gustaman, porqui tsënömi kuyanqäta rikätsita puëdï. Peru qallananchöqa manam Bibliapita yachatsinäpaq pitapis tarirqätsu. Tiempuwanqa juk sitiutam ëwakurqä, tsëchöqa juk killallachömi atskaq nunakunata yachatsir qallëkurqä. Y jukqa reunionkunamanmi ëwar qallëkurqan. Tsëpitanam, Soltërukuna Bibliapita Yachakuyänampaq Escuëlaman * ëwarqä, y tsëpitaqa juk markapanam mandayämarqan. Tsëchöqa chuskoq nunakunatam Bibliapita yachatsir qallëkurqä. Nunakunata Bibliapita yachatsiqa alläpam gustaman, porqui kawëninkunachö cambiayänampaq santu espïritu imanö yanapanqantam rikä” (1 Tes. 2:19).

8. ¿Wakin jövinkunaqa imatataq rurayashqa mas nunakunata yachatsiyänampaq?

⁸ Wakin jövinkunaqa juk idiömakuna parlëtam yachakuyashqa. Tantiyarinapaq, Estädus Unïduspita Jacob jutiyoq juk cristiänum kënö nir qellqarqan: “7 watayoqllaraq këkaptïmi, escuëlachö estudiaq mayïkunaqa Vietnam nacionpita atskaq kayarqan. Jehoväpita pëkunata yachatsita munarmi, tiempuwanqa idiömankunata yachakur qallëkurqä. Masqa idiömankunata yachakurqä, ingles idiömachö Täpakoq revistata vietnamita idiömachö Täpakoqwan igualatsirninmi. Jina amänullachö këkaq vietnamita idiömata parlaq congregacionpita wawqikunawanmi amïguta rurarqä. 18 watayoq këkarnam precursor tikrarirqä. Tiempuwannam Soltërukuna Bibliapita Yachakuyänampaq Escuëlaman ëwarqä. Tsëchö yachakunqäqa vietnamita grüpuchö sirwinqächömi kanan yanapaman. Precursornömi sirwï y japallämi anciänupis kä. Mëtsikaq vietnamitakunam espantakuyan idiömankunata yachakunqäpita. Wayinkunamanmi invitayäman y mëtsikaqtam Bibliapita yachatsï y wakinkunaqa bautizakuyashqanam” (igualaratsi Hëchus 2:7, 8 textuwan).

9. Diospita yachatsikunqëkiqa, ¿imakunatataq mas yachatsishunki?

⁹ Diospita nunakunata yachatsiqa, maskunatam yachatsishunki. Alli trabajador këta, wakinkunawan alli parlëta, següru sientikïta y wakinkunata shumaq tratëtam yachakunki (Prov. 21:5; 2 Tim. 2:24). Jina Diospita yachatsikurqä kushishqam kanki, porqui Bibliapitam mas yachakunki. Jinamampis yachakunki Jehoväpa markanchö imanö mas yanapakïtam (1 Cor. 3:9).

10. ¿Imanirtaq kushishqa sientikunkiman täranqëki sitiuchö Diospita wiyëta mana munayaptimpis?

¹⁰ Y täranqëki markachö Diospita wiyëta mana munayaptimpis, Diospita yachatsikunqëkiqa kushitsishunkim. Porqui congregacionchöqa llapantsikmi yanapakuntsik alli shonquyoq nunakunata tarinapaq. Diospita yachakï munaqta mëqantsikllapis tarishqaqa llapantsikmi kushikuntsik. Brandon jutiyoq juk cristiänum 9 watapa precursornö yanapakurqan, Diospa Gobiernumpita wiyëta mana munayanqan markachö. Kënömi nin: “Diospa Gobiernumpita yachatsikïqa gustamanmi, porqui Jehovämi tsënö ruranapaq nimantsik. Colegiuta usharirllam precursor tikrarirqä. Alläpam kushikü congregacionchö jövinkunata tsënölla rurayänampaq yanaparnin y poqu cristiänu këman chäyäqta rikarnin. Soltërukuna Bibliapita Yachakuyänampaq Escuëlaman ëwariptïnam, juk markapana mandayämarqan precursornö yanapakunäpaq. Tsëchöqa manam pitapis bautizakunampaq yanaparqötsu, peru wakin wawqikunaqa puëdiyashqam. Peru kushishqam sientikü llapan tiempüwan Diospita nunakunata yachatsinäpaq decidinqäpita” (Ecl. 11:6).

11. ¿Ima rurëkunachötaq mëtsika jövinkuna yanapakuyan?

¹¹ Jehovätaqa llapan tiempïkiwan juknöpapis sirwita puëdinkim. Mëtsikaq jövinkunam, Diosta adorana wayikunata rurëchö yanapakuyan. Diosta adorana wayikunataqa mëtsikatam wanantsik. Tsë rurëchö trabajarninqa Jehovätam alabanki y cristiänu mayikikunawan trabajarninmi kushishqa sientikunki. Diosta adoranapaq wayikunata rurëchö yanapakïqa yachatsishunki, kawënikita peligruman mana churashpa alli trabajëta y encargädukunawan shumaq yanapanakïtam.

12. ¿Precursor kaptikiqa ima rurëkunataq shuyaräshunki?

¹² Kevin jutiyoq juk cristiänum kënö nin: “Wamrallaraq këkarninmi llapan tiempüwan Jehoväta sirwita munarqä. 19 watayoq këkarmi precursor këman charqä. Y pullan junaqllam juk wawqiwan construccionchö trabajarqä. Wayikunata qatëta, ventänakunata y punkunkunata churëtam yachakurqö. Tiempuwanqa mantsakëpaq shukukï vientu pasariptinmi Diosta adoranapaq wayikunata y wawqikunapa wayinkunata altsëchö yanapakur ishkë watapa karqä. Y Sudafrica nacionchö Diosta adorana wayikunata rurëchö yanapakoqkunata wanayanqanta wiyarirmi, juk solicitüta qellqarqä y ëwanäpaqmi invitarayämarqan. Africachöqa, juk ishkë semänakunallam Diosta adorana wayita rurariyä y tsëpitaqa jukmannam pasariyä. Yanapakoq kaqkunaqa juk familianölla karmi juntu täräyä, Bibliapita yachakuyä y trabajayä. Jinamampis, cada semäna trabajayanqä sitiukunachö wawqikunawan yachatsikoq yarqïqa alläpam gustaman. Wamra kanqäpita ruranäpaq patsätsinqäkunata cumplinqäqa alläpam kushitsiman”.

13. Betelchö trabajëqa, ¿imanirtaq jövinkunata alläpa kushitsin?

¹³ Precursor këman chashqa mëtsika cristiänukunaqa, Betelchönam këkäyan. Betel wayichö sirwiqa alläpa kushikïpaqmi, porqui tsëchöqa imëkatapis rurantsik Jehovällapaqmi.  Jinamampis Betelchö trabajaqkunaqa yanapakuyan, Diospa yachatsikïninkunata llapantsik chaskinapaqmi. Dustin jutiyoq juk Betelïtam kënö nin: “9 watayoqlla këkarmi, llapan tiempüwan Jehoväta sirwita munarqä. Y colegiuta usharirllam precursornö yanapakur qallëkurqä. Juk wata pullan pasariptinllam Betelman invitarayämarqan. Tsëchöqa imprimina mäquinakunawan trabajëta y computadörakunata programëtam yachakurqö. Betelchö sirwiqa gustaman, entëru Patsachö Diospita yachatsikunqantsik imanö këkanqanta puntallatana willakayämunqanmi. Jina tsëchö trabajarnin nunakunata Jehoväwan amïgu kayänampaq yanapanqämi kushitsiman”.

14. ¿Imanötaq preparakunkiman llapan tiempïkiwan Jehoväta sirwinëkipaq?

¹⁴ Llapan tiempïkiwan Jehoväta sirwinëkipaq, ¿imataraq rurankiman? Masqa, Jehovä munanqannö portakïta yachakï, tsëmi yanapashunki Jehoväta mas alli sirwinëkipaq. Tsëpaqqa imëpis Diospa Palabrampitam yachakunëki, tsëchö ninqanmanmi alleq pensanëki y reunionkunachö parlakurnin markäkïnikita rikätsikunëkipaqmi kallpachakunëki. Colegiullachöraq këkarqa, Diospita alli yachatsikoq kanëkipaqmi yachakïta puëdinki. Nunakunaman yarpachakunqëkita rikätsikï imatapis pensayanqanta respëtuwan tapurnin y parlakayämunqanta shumaq wiyarnin. Jina Diosta adoranapaq wayita limpiëchö y altsapakïchö yanapakï. Porqui, yanapakuyänampaq listu këkaqkunata y humildi kaqkunatam Jehoväqa utilizan markanchö yanapakuyänampaq (leyi Salmus 110:3 *; Hëch. 6:1-3). Apostol Pablupis Timoteupita cristiänukuna allita parlayaptinmi, misionërunö yanapakunampaq invitarqan (Hëch. 16:1-5).

15. ¿Imataraq rurankiman wananqëkikunata tarinëkipaq?

¹⁵ Llapan tiempunkunawan Diosta sirweqkunaqa, wanayanqankunata tariyänampaqqa trabajayänanmi (Hëch. 18:2, 3). Täranqëki sitiuchö pullan junaqlla trabäjuta tarinëkipaqqa, itsa qampis imallatapis ichik tiempulla estudiarinkiman. Precursornö sirwinëkipaq ima trabäju mas alli kanqanta, wakin precursorkunata y congregacionkunata watukaq wawqita tapuri. Y Bibliachö ninqannöpis, “rurënikikunata Jehoväpa makinman churë, tsëqa rurëta pensanqëkikunaqa allim yarqunqa” (Prov. 16:3; 20:18).

16. Jövin kënikichö llapan tiempïkiwan Jehoväta sirwinqëkiqa, ¿imapaqraq yanapashunki?

¹⁶ Kushishqa kawakunëkitam Jehoväqa munan (leyi 1 Timoteu 6:18, 19). Precursor karninqa, llapan tiempunkunawan Jehoväta sirweq cristiänukunawanmi mas tiemputa pasanki, tsëmi yanapashunki poqu cristiänu kanëkipaq. Mëtsikaqmi rikäyashqa jövin kayanqampita llapan tiempunkunawan Jehoväta sirwiyanqanqa casädu kawëninkunachöpis yanapanqanta. Manaraq casakurnin precursor kaqkunaqa, casakurirpis ishkannam precursornö sirwir sïguiyan (Rom. 16:3, 4).

17, 18. ¿Imatapis rurëta munëkanqëkiqa imatataq rikätsikun?

¹⁷ Imatapis rurëta munanqantsikqa, shonquntsikchö ima kanqantam rikätsikun. Salmus 20:4 textuqa Jehoväpitam kënö nin: “Shonqïkichö munanqëkikunata qoshï, y rurëta pensanqëkikunata llapanta rurakätsitsun”. Tsëmi alleq pensanëki kawënikichö imata rurëta munanqëkiman, kanan Jehovä imata rurëkanqanman y imanö sirwinëkipaq kaqman. Tsëpitana churapakë Jehoväta kushitsinqan kaqkunata ruranëkipaq.

¹⁸ Llapan tiempïkiwan Jehoväta sirwinqëkiqa alläpam kushitsishunki, porqui pëta alabanëkipaqmi kawënikita utilicëkanki. Awmi, “Jehovärëkur imëpis kushishqa kë, y pëqa shonqïki mañakunqankunatam qoshunki” (Sal. 37:4).