Siriapa reyninmi, Diospa profëtan Elisëuta wanutsita munar qatikacharqan. Tsëmi Dotan markachö këkanqanta mäkurir, paqasllapa mandarqan guërra kawallukunata, cärrukunata y mëtsikaq tröpakunata. Y tsë markaqa tröpakunawan entërumpa jirurushqam waräramurqan (2 Rey. 6:13, 14).

Elisëupa sirweqnin qoyalla shärikurirnam, rikëkurqan mëtsikaq chikeqninkunata, y alläpa mantsakarmi kënö nirqan: “¡Patronllä! ¿Kananqa imataraq rurashun?”. Elisëunam kënö contestarqan: “Ama mantsakëtsu, porqui noqantsikwanmi masqa këkäyan, pëkunawan kayanqampitapis”, y kënö nirmi mañakur qallëkurqan: “Oh Jehovä, nawinta kichëkullë rikärinampaq”. Y “tsëllanam Jehoväqa tsë sirweqpa nawinta kicharirqan, y pënam rikärirqan; entëru jirkachö, nina kawallukuna y nina cärrukuna Elisëupa entërumpa tumarëkäyaqta” (2 Rey. 6:15-17). ¿Elisëuta pasanqampita imatataq yachakuntsik?

Elisëuqa manam mantsapakurqantsu, sinöqa Jehovämanmi markäkurqan (yärakurqan) y rikarqanmi salvanampaq listu këkanqanta. Kanan witsanqa, juk milagruwan Jehovä salvamänataqa manam shuyarantsiktsu, peru rikantsikmi markanta imanö tsapanqanta. Juk parlakïchöqa noqantsiktapis entëruntsikpa “nina kawallukuna y nina cärrukuna” cuidekämaqnintsik cuentam. Tsëmi alleq markäkurqa ni imata mantsapakushuntsu, tsëpa rantinqa Jehoväpa bendicionninkunatam rikäshun (Sal. 4:8). Kananqa juk masta Elisëupita yachakurishun.

Juk kutim, Elisëu yapyakïkaptin profëta Elias chärir aqshunanta aqshurkatsirqan. Elisëuqa musyarqanmi sirweqnin kananta munar Elias tsëta rurëkanqanta, tsëmi teytampita y mamampita despedikur juk fiestata rurarqan, tsëpitanam Eliasta sirwinampaq ëwakurqan (1 Rey. 19:16, 19-21). Diosta sirwita munanqan y yanapakïta munanqanmi Elisëutaqa yanaparirqan alläpa alli yanapakoq tikrarinampaq, y tiempuwanqa Eliastam trukarirqan profëta këchö.

 Elisëuqa joqta watakunapanömi Eliaspa sirweqnin karqan. Tsë watakunachöqa Eliaspa ‘makinmanmi paqakuptin (awikuptin) yakuta jichapaq’ (2 Rey. 3:11). ¿Imanirtaq jichapaq? Tsë witsanqa, mikurnin manam cucharata utilisäyaqtsu, sinöqa makinkunawanmi mikuyaq. Tsëmi mikur ushariptin makinman yakun jichapoq. Rikanqantsiknömi Elisëuqa fäcil rurëkunallata ruraq, peru tsënö kaptimpis alläpa precisaqpaqmi churaq Eliasta sirwita.

Kanan witsampis atskaq cristiänukunam llapan tiempunkunawan Jehoväta sirwiyan shonqupita patsë munarnin. Wakinkunaqa Betelchö o Diospita yachatsikunapaq wayikuna rurëchö yanapakuyänanrëkurmi, familiankunata y amïgunkunata jaqirir karuta ëwakuyashqa, y tsëtaqa wakinkuna rikäyan mana precisaqtanömi. Kë rurëkunaqa alläpa precisaqmi, y kë trabäjukunaqa manam yanapakoqkuna mana precisaq kayanqantatsu rikätsikun. Y tsëpitapis mas precisaqqa Jehoväpa rikënimpaqmi alläpa valoryoq. ¿Manatsuraq noqantsikpis tsënö yanapakïkunata precisaqpaq churashwan? (Heb. 6:10.)

“Eliasta ciëlukunapa” manaraq Diosnintsik apakurninmi, Guilgalpita mandarqan Betelta ëwanampaq. Elisëu yanaqänanta Elias mana pensëkaptimpis, Elisëuqa kënömi nirqan: “Noqaqa manam jaqishqëkitsu”. Ëwarëkarnam Eliasqa Elisëuta ishkë kuti nirqan kutikunampaq (2 Rey. 2:1-6). Peru pëqa, Noemïta Rut mana jaqinqannömi, jaqirqantsu (Rut 1:8, 16, 17). Elisëuqa rasumpam, profëta Eliasta sirwinampaq Dios churanqanta alläpa valuraq.

¿Imanötaq Elisëu ruranqanta qatishwan? Jehoväpa markanchö yanapakunapaq ima cargullatapis chaskirqa alläpam valorashwan, y Jehoväta sirwïnöqa imapis mana kanqantam qonqanantsiktsu (Sal. 65:4; 84:10).

Nänipa ëwarëkarnam Elisëuta Elias kënö nirqan: “Qampaq imata ruramunätataq munanqi, mañamëlla”. Salomonnö kaqpis, Elisëuqa manam kapoqyoq këtatsu mañakurqan. Sinöqa mañakurqan, Elias chaskinqampitapis juk kuti masta espïrituta chaskinampaqmi (1 Rey. 3:5, 9; 2 Rey. 2:9). Unë witsanqa Diospa Leyninqa mandakoq, teytakuna mayor kaq wamranta herenciata qorninqa wakinkunata qonqampita juk kuti masta qonampaq kaqtam (Deut. 21:15-17). Tsëmi Elisëu tsënö mañakurqa mañakïkarqan, Eliaspa rantin profëta kanampaq. Itsa pëpis Eliasnö “Jehoväpaq alläpa celösu” këta munarqan (1 Rey. 19:13, 14).

Eliasnam kënö nirqan: “Sasa rurëtam mañakurqunki. Qampita ëwakunqäta rikämaptikiqa, rurakanqam, peru mana rikämaptikiqa manam rurakanqatsu” (2 Rey. 2:10). Kënö ninqanqa ishkë cösasta rikätseqnömi karqan: mañakunqantaqa Jehovälla qoyta puedinqanta, y chaskita munarqa ushananyaq Eliaswan juntu quedakunan precisanqanta.

¿Elisëu mañakunqanta Dios aprobarqanku? Bibliam kënö willakun: “Parlar parlar ëwarëkäyaptinnam, yuririrqan juk nina cärru y nina kawallukuna, y pëkunatam rakikäratsirqan; y Eliasnam ciëluta ëwakurqan vientuchö. Tsë llapan pasakunqantam Elisëuqa rikëkarqan”. * Awmi, Jehoväqa Elisëu mañakunqanta qorqanmi, porqui rikarqanmi Elias ëwakunqanta, tsënöpam mañakunqan espirïtuta chaskirirqan, y Eliaspa rantin profëta tikrarirqan (2 Rey. 2:11-14).

Elisëuqa Eliaspa shikwanqan aqshunanta ëllurirmi yakakurirqan. Y tsëta yakarëkaqta nunakuna rikarqa, clärum musyariyänan karqan Diospa profëtanna kanqanta. ¿Peru Jehoväqa chaskirqanku? Awmi. Porqui pëpa poderninwanmi, tsimpanampaq Jordan mayuta kicharirqan.

Vientuchö Elias ëwakunqanta y nina cärrukunata y nina kawallukunata rikanqantaqa manachi imëpis Elisëu qonqarqantsu, porqui tsënötaqa manam imëpis rikantsiktsu. Tsëwanmi mañakunqanta Jehovä contestëkanqanta rikarqan. Kanan witsankunaqa, mañakïnintsikkunata manam tsënötsu Jehoväqa contestamunqa, peru munënin rurakänampaq imanö yanapakïkanqantaqa rikëta puëdintsikmi. Kë  Patsachö markanta imanö bendecïkanqantaqa clärum rikëta puëdintsik y tsënöpam cärrun imanö kuyïkanqanta rikantsik (Ezeq. 10:9-13).

Imëkakunata rikanqanmi Elisëutaqa yanaparqan Jehoväpa poderninman mas markäkunampaq. Jehoväpa espïritun yanapaptinmi 16 milagrukunata rurarqan, Elïas ruranqampitapis masta. * Nina kawallukunata y nina cärrukunata yapëqa Elisëu rikarqan Dotan markachö këkarmi, kë qallanan yachatsikïchö yachakunqantsiknö.

Elisëuqa manam mantsakarqantsu Dotan markata chikeqninkuna jirurushqa këkäyaptimpis. ¿Imataq yanaparqan? Jehoväman alläpa markäkunqanmi. Noqantsikpis tsënö markäkïyoq këtam wanantsik. Tsëmi mañakunantsik santu espïritunta Jehovä qomänapaq, tsënöpa markäkïyoq y Dios munanqannö nuna kanqantsikta rikätsikunapaq (Lüc. 11:13; Gäl. 5:22, 23).

Jina Dotanchö rikanqanqa Elisëuta yanaparqan Jehoväman y tröpankunaman markäkunampaqmi. Profëtaqa rikarqan, Dotan markata y chikeqnin tröpakunata Diospa angelninkuna jirurushqatam. Y tsë chikeqninkunata Jehovä wisku tikraratsiptinmi Elisëuwan sirweqninqa salvakuyarqan (2 Rey. 6:17-23). Chikëqninkuna wanutsiyänampaq juntapushqa këkäyaptinmi, Elisëuqa imëpis ruranqannö, Jehoväman alläpa markäkurqan.

Elisëunö Jehoväman markäkushun (Prov. 3:5, 6). Tsënö rurashqaqa, “kikin Diosmi yanapamäshun y bendecimäshun” (Sal. 67:1). Rasumpa nina cärrukuna y nina kawallukuna cuidëkämanqantsikta mana rikashqapis, Jehoväqa tsapëkanmi kanan witsan markanta y “jatun sufrimientu” witsanchöpis tsënöllam tsapanqa (Mat. 24:21, NM; Apoc. 7:9, 14). Tsë junaq chämunqanyaqqa, Jehovälla ‘tsapämaqnintsik’ kanqanta imëpis yarparäshun (Sal. 62:8).