1, 2. a) ¿Imataq pasakunqa amïguntsikpita imëpis parlashqa y pëman yarparashqaqa? (Rikäri kë yachatsikïpa qallananchö këkaq dibüjuta.) b) ¿Ima tapukïkunapa respuestantataq yachakushun?

PITAPIS kuyarnin pëpita allikunata imëpis parlanqantsikqa yanapamantsik mas kuyanakunapaqmi. Tsënöllam Jehoväwan amïgu kënintsikwampis pasakun. Davidpis üshakunata mitsir kanqan witsankunaqa, atska paqaskunapam qoyllurkunata rikaraq y tsëkunapa Kamaqninman yarpachakur pasaq. Kënömi nirqan: “Makikiwan ciëlu ruranqëkita, y killatawan qoyllurkunata churanqëkita rikarmi noqa tapukö, ¿imataq wanoq nuna pëta yarpänëkipaq, y nunapa wamran pëta rikänëkipaq?” (Sal. 8:3, 4). Ciëlupaq akrashqakunapaq awnikunqankunata Jehovä imanö cumplikanqanta rikarmi Pablupis kënö nirqan: “¡Diosqa imalaya allim, imalaya yachaqmi y imalaya allipa cäyicoqmi!” (Rom. 11:17-26, 33).

² Jehoväpita yachatsikurninqa pëmanmi yarpantsik y pëpitam yachatsikuntsik, y tsëta ruranqantsikqa alläpam yanapamantsik. Precursornö mëtsikaq yachatsikoqkunam cuentata qokuyashqa, mas yachatsikuyanqanqa Diosta mas kuyayänampaq yanapanqanta. Precursornö karnin o precursor këta munarninqa yarpë, Jehoväta llapan tiempuwan sirwirqa pëwan mas amïgu këman imanö chätsikunqanta. Precursor karninqa kënö tapukï: “¿Imaraq yanapamanqa imëpis kë shumaq yachatsikïchö sïguinäpaq?”. Y manaraq precursor karninqa kënö tapukï: “¿Imakunatataq alleq patsätsinä precursor kanäpaq?”. Këchömi yachakurishun precursor kanqantsik Jehoväwan mas amïgu kanapaq imanö yanapamanqantsikta.

3. ¿Imanötaq yanapamantsik Diospa Gobiernun bendicionkunata apamunampaq kaqpita yachatsikunqantsik?

³ Diospa Gobiernun bendicionkunata apamunampaq kaqpita yachatsikunqantsikmi, Jehoväwan mas amïgu tikratsimantsik. ¿Mëqan textukunapitataq yachatsikïta mas gustashunki? Itsa Salmu 37:10, 11, Daniel 2:44, Juan 5:28, 29 o Apocalipsis 21:3, 4 textukunapita. Kë awnikïkunapita cada parlarmi, kikintsik yarpantsik “imecapis qomanqantsic caqcunaqa” Diospita shamunqanta. Y tsëmi Diosman mas wititsimantsik (Sant. 1:17).

4. ¿Imata rikanqantsiktaq yanapamantsik Jehoväpa alli këninta mas kuyanapaq?

⁴ Diospa yachatsikïnimpita nunakuna waktsa cuenta këkäyanqanta rikarmi, alläpa agradecikuntsik rasumpa kaq yachatsikïpita. Nunakunapaqa manam ima yanapakïnimpis kantsu imatapis allita rurar kushikuyänampaq. Mëtsikaqmi shamoq tiempuchö imanö kayänampaq kaqpaq yarpachakuyan y manam ni ima awnikïpis pëkunapaqqa kantsu. Alli kawëtam procurayan, peru manam puëdiyantsu, hasta religiösu kaqkunam Biblia willakunqankunapitaqa alleqllaqa musyayantsu. “Derëcha ni izquierda makin jukläya kanqanta” mana musyaq ninivïtakunanömi kayan (Jon. 4:11). Diospita seguïdu yachatsikoq yarqurninmi cläru rikantsik, nunakuna Diospa kaqchö imanö këkäyanqanta y Diosta sirweq kaqkuna imanö këkäyanqanta (Is. 65:13). Tsëta rikarmi yarpantsik, markanchö kaqllapaq Jehovä mana yarparanqanta, sinöqa llapan nunakunata yachatsita munanqanta y awnikunqanta chaskiyänanta munanqanta (Apoc. 22:17).

5. ¿Imanötaq problëmantsikkunata rikantsik jukkunata Diospita yachatsirninqa?

⁵ Diospita yachatsikunqantsikmi yanapamantsik problëmantsikkunaman mana yarparäkunapaq. Tsënö kanqantaqa alleq musyarirqan, teytankuna divorciakuriyaptin, Trisha jutiyoq precursöram. Porqui kawënïchöqa manam tsënö yarpachakushqatsu karqan. Juk junaqmi, llakishqa kar wayichö quedakïta munëkarpis, yachatsinampaq kimaq (kimsaq) wamrakunata watukaq ëwarqan, kë wamrakunaqa alläpa sasa problëmakunapam pasëkäyarqan. Wamrakunapa teytanqa jaqirirmi ëwakushqa kanaq y mayor kaq wawqinnam alläpa mana allipa trataq. Trisham willakun: “Alläpa problëmakunapa pasëkäyanqanqa, pasanqäpitapis masmi karqan. Yachakïkäyaptïmi, yachakïkäyanqampita kushikur asikarayämurqan. Kë wamrakuna noqapaqqa Jehoväpa qarëninmi karqan, y masqa tsë junaqmi”.

6, 7. a) ¿Imanötaq markäkïnintsik sinchiyan Bibliapita yachatsikushqa? b) ¿Imachötaq yanapamantsik Biblia ninqanmannö rurayaptin kawëninkuna altsakaqta rikanqantsik?

⁶ Yachatsikunqantsikqa markäkïnintsiktam sinchiyätsin. Apostul Pablu kawanqan witsanchö judïukuna yachatsikuyanqannö mana kawayaptinmi, Pablu nirqan: “Tseno yachatsicoq quecar ¿manacu quiquiquicunaraq puntata tse leycunata cumpliyanquiman!” (Rom. 2:21). Peru tiempuntsikchö precursorkunaqa yachatsikuyanqannömi kawayan. Imë höra karpis yachätsikïkäyanllam. Cada yachatsiyänampaq y tapukïninkunata contestayänampaqmi alleq preparakuyan. Janeen precursöram nin: “Bibliapita cada yachatsikurninmi mäkö tsë yachatsikunqäkunaqa peqäman y shonqöman mas chanqanta, y tsëmi yanapaman markäkïnï mas sinchi kanampaq y punta yachakunqakunallawan quedakunäpa rantin mas poqunapaq”.

⁷ Biblia ninqanmannö rurayaptin kawëninkuna mas alliyaqta rikëmi, Jehoväpa yachatsikïninta mas kuyanapaq yanapamantsik (Is. 48:17, 18). Jina yanapamantsikmi Biblia ninqanmannö kawar sïguinapaq. Adrianna precursöram willakun: “Nunakuna kikinkunallaman markäkuyaptinqa kawëninkuna  mana allichömi usharinman, peru Jehoväpa yachatsikïninkunaman markäkur qallayaptinqa kawëninkuna rasmi altsakäramun”. Phil jutiyoq precursornam kënö nin: “Kikinkunapa kallpankunallawan cambiëta mana puëdiyanqan nunakunatam, Jehoväpa yanapakïninwan cambiaqta cläru rikantsik”.

8. ¿Imanötaq yanapamantsik cristiänu mayintsikwan yachatsikunqantsik?

⁸ Cristiänu mayintsikwan yachatsikunqantsikmi yanapamantsik (Prov. 13:20). Precursorkunaqa cristiänu mayinkunawan yachatsikur atska tiempum pasayan, y tsëchömi yanapanakur animanakuyan (Rom. 1:12; leyi Proverbius 27:17 *). Lïsa jutiyoq precursöram willakun: “Trabäjuchöqa gananakurlla y chikipänakurllam kakuyan. Cada junaqmi wiyantsik wasa rimanakïta y mana alli palabrakunata. Imëkanöpapis mas carguyoq këtam munayan. Höraqa cristiänunö portakunqantsikpitam burlakuyan y penqakatsimantsik. Peru cristiänu mayintsikwan yachatsikurqa atska yanapakïtam tarintsik. Alläpa utishqa këkarnimpis yachatsikïta usharirninqa alläpa kushishqam wayïman kutirï”.

9. ¿Imanötaq casädu kawakïnintsikchö yanapamantsik majantsikwan precursor kanqantsik?

⁹ Majantsikwan precursor kanqantsikqa casädu kawakïnintsikchömi yanapamantsik (Ecl. 4:12). Madelineqa nunanwan ishkanmi precursor kayan, kënömi willakun: “Ishkämi parlakuriyä yachatsikuyanqächö imakuna pasayämanqanta o Bibliata leyirnin imakunata tariyanqäta y yachatsikuyanqächö imanö yanapayämänampaq kaqta. Cada wata pasaptinmi mas kuyanakuyä”. Y tsënöllam Trisha jutiyoq precursörapis nin:  “Ishkäkunam pipapis jaqan mana yëkuyänäpaq acuerdu kayä, tsëmi qellë asuntupaqqa piñatsinakuyätsu. Juntum yachatsikoq yarquyä, y estudiükunamampis yanaqänakuyämi, tsënöpam kushishqa kayä y Diospa kaqchöpis igual poquyä”.

10. ¿Imanötaq markäkïnintsikta yanapan Diospa kaqta puntaman churanqantsik y yanapamanqantsikta rikanqantsik?

¹⁰ Diospa Gobiernunta puntaman churashqa, Jehovä imanö yanapamanqantsikta y mañakïnintsikta contestamunqanta rikanqantsikmi yanapamantsik pëman mas markäkunapaq. Tsënö kanqantaqa llapan shonqunkunawan sirweq cristiänukunapis alleqmi musyayan. Peru precursorkunaqa alleqmi rikäyan sïguiyänampaq Jehoväman markäkuyanqan imanö yanapanqanta (leyi Mateu 6:30-34). Curt jutiyoq wawqiqa warminwanmi precursor kayan, y congregacionkunata watukaq wawqitam höraqa yanapan. Juk kutim, juk congregacionta watukanampaq awnikurirqan, y tsëmanqa wayimpita ishkë höra pullanraqmi cärrunwan ëwanan karqan. Ëwayänanllapaqmi gasolïnankunaqa tinkurqan y trabäjumpita pagayänampaqqa juk semänaraqmi pishirqan. Curtmi nin alleq mana pensar awnikushqa kayanqanta. Peru tsënö kaptimpis, Jehoväman mañakurir y yanapanampaq kaqman markäkurmi ëwayänampaq listu këkäyarqan. Yarquyänampaq këkäyaptinnam juk pani qayarirqan y pëkunapaq juk qarëta katsinqanta nirirqan. ¿Imataq karqan? Qellëmi kanaq, kutiyämunampaq tinku. Curtmi kënö nin: “Kutin kutin tsënö pasakunqankunata rikarqa, clärum musyantsik Jehovä yanapëkämanqantsikta”.

11. ¿Ima bendicionkunatataq precursorkuna chaskiyan?

¹¹ Rasumpam, precursornö Jehoväta mas sirweqkaqkunaqa pëmanmi mas witiyan, y rikäyashqam imëkanöpa bendicinqanta (Deut. 28:2). Tsënö kaptimpis precursor këqa manam fäciltsu. Manam ni mëqantsik libritsu kantsik Adan jutsata ruranqanrëkur imëka problëmakunapita. Peru juk tiempupa precursor këta jaqiyänan kaptimpis, problëmakunaman mana ishkiyänampaq y shumaq altsayänampaqqa imëpis tsarakïkäyashqallam. Peru ¿imataq yanapanqa tsë shumaq rurëninkunata precursorkuna mana jaqiyänampaq?

12, 13. a) ¿Imatataq juk precursor ruranman hörankunata mana cumplikanqanta rikarqa? b) ¿Imanirtaq alläpa precisan Bibliata leyiyänampaq, estudiayänampaq y yachakuyanqanman yarpachakuyänampaq tiemputa rakiyänanqa?

¹² Mëtsikaq precursorkunam imëkata rurayänan. Y llapanta rurayänampaqqa sasaraqmi (ajaraqmi), y tsëmi imata rurayänampaq kaqtapis shumaq patsätsiyänan (1 Cor. 14:33, 40). Juk precursor höranta mana cumplikanqanta rikarqa, alläpam precisan tiempunta imakunachö utilisëkanqanta rikänan (Efes. 5:15, 16). Kënömi tapukunan: “¿Ëka hörataq pasä kushikunäpaq rurëkunachö? ¿Tantiyakunä precisanku? ¿Trabajanqä hörata shumaq patsätsinä precisanku?”. Höraqa mana precisaq cösaskunatam rurar qallëkuntsik. Tsëmi alläpa precisan precursorkunaqa imanö këkäyanqanta seguïdu rikäyänan y pensayanqannö rurar qallayänan.

¹³ Precursorkunaqa, cada junaq Biblia leyita, estudiëta y yachakuyanqanman yarpachakïtam puntaman churayänan. Tsëmi mas precisaq cösaskunapaq tiempu rakinqanta, alläpa mana precisaq rurëkunachö mana ushanampaq procuranman (Filip. 1:10). Juk junaq entëru yachatsikurir wayinman kutireq precursorman pensarishun. Tsë tardiqa shamoq reunionpaqmi yachakïta munan. Peru puntataqa, chaskinqan cartakunataran leyin. Tsëpitanam computadöranta prendirir mensäjikunata leyir y contestar qallëkun. Tsënö këkarnam, rantita munanqampa preciun bajanqanta o mana  bajanqanta musyëta munar juk direccionman yëkurin. Tsënö këkaptinmi ishkë hörana pasarishqa y manam cuentata qokushqatsu, y reunionpaqqa manam yachakïta qallashqaraqpistsu. ¿Imachötaq problëma këkan? Cörreq nunakunaqa alli larguta cörrita munarqa cuerpunkunatam alleq cuidayänan. Jina tsënöllam, precursorkunapis yanapakur sïguiyänampaqqa Diospa Palabranta alleq estudiayänampaq tiempunkunata alleq patsätsiyänan (1 Tim. 4:16).

14, 15. a) ¿Imanirtaq precursorkunaqa sencïllulla kawakuyanman? b) ¿Imatataq precursorkuna rurayanman ima problëmapapis pasarninqa?

¹⁴ Qateqninkunata Jesus ninqannömi, precursor këta mana dejaq cristiänukunaqa sencïllulla kawakuyan (Mat. 6:22). Jesuspis yachatsikunqanchö ni imapis mana pantatsinampaqmi sencïllulla kawarqan. Tsëmi nirqan: “Pishqucunapapis qeshun canmi. Peru Diospita Shamushqa Nunapaqa manam ni iman cantsu jamarinanllapaqpis” (Mat. 8:20). Jesusta qatita munaq precursorqa, yarpänanmi imëkampis mas kaptinqa, tsëkunata rikänampaq mas tiemputa wananqanta.

¹⁵ Precursorkunaqa alleqmi musyayan, Dios alli kanqanrëkur pëpita tsë qarëta chaskishqa kayanqanta. Tsëmi precursor këchö imëyaqpis tsarakuyänampaqqa Jehoväman alleq markäkuyänan (Filip. 4:13, NM). Imëka problëmakunam kanqa (Sal. 34:19). Peru precursor këninkunata raslla jaqiriyänampa rantinmi, Jehoväpa yanapakïninta ashiyänan y yanapananta permitiyänan (leyi Salmu 37:5 *). Jehovä yanapanqanta mas rikarninmi pëpa lädunchö mas sientikuyanqa (Is. 41:10).

16. ¿Precursor këta munarqa imatataq rurashwan?

¹⁶ Qampis precursorkuna chaskiyanqan bendicionkunata chaskita munarqa, Jehoväta willë (1 Juan 5:14, 15). Precursorkunawan parlë. Precursor këman chänëkipaq imakunata ruranëkipaq kaqta rurar qallë. Tsëtam rurayarqan Keithwan Erika. Llapan tiempunkunawanmi trabajëkäyarqan y casakurirllam juk wayita y mushoq cärruta rantishqa kayarqan. Kënömi willakuyan: “Tsëkunata katsir kushishqa kawayänampaq kaqtam pensayarqä, peru manam tsënötsu karqan”. Keithta trabäjumpita qarquriyaptinmi precursor auxiliar karqan. Kënömi yarpan: “Precursor kanqämi yarpäratsimarqan yachatsikurninqa alläpa kushishqa sientikunqantsikta”. Casädu precursorkunapa amïgunkunam tikrariyarqan, y pëkunanam yanapayarqan sencïllulla kawakurnin y precursornö yanapakurninqa alläpa shumaq kawakuna kanqanta rikäyänampaq. ¿Imatataq rurayarqan Keithwan Ërikaqa? Diospa kaqchö imakunata rurayänampaq kaqta apuntarirmi cada cumpliyanqan kaqtana borrayaq. Y tiempuwanqa precursor këmanmi chäriyarqan.

17. ¿Imakunachöraq yanapamäshun precursor kanapaq trabäjuntsikta alleq patsätsinqantsik y sencïllulla kawakunqantsik?

¹⁷ ¿Qampis precursor këta puëdinkiku? Kanan höra mana puëdirqa, Jehoväpita mas yachatsikurnin pëman mas witita procurë. Y Diospa yanapakïninwan imanöpis këkanqëkita rikarninqa, itsa cuentata qokurinki precursor kanëkipaq trabäjïkita imanö patsätsinëkipaq kaqta. Precursor kaptikiqa, imëkata ruranqëkikunapitapis mastam kushikïta tarinki. Jinamampis, munënikikunapitapis Jehoväpa kaqta puntaman churanqëkipitam kushishqa sientikunki (Mat. 6:33). Jina jukkunata yanaparmi alläpa kushikunki. Peru tsëpitapis masqa, imë hörapis Jehovällamanmi yarparëkanki, pëpita parlarëkanki, pëman kuyakïniki mas miranqa y kushitsinkim.