A Trip Down Market Street (Market cällipa pasyëkar) nishqan tïtuluyoq juk shumaq pelïculam rikätsikun San Franciscu (Estädus Unïdus) nacionchö 1900 watakuna qallanan witsan nunakuna imanö kawayanqanta. Kë pelïculata grabayänampaqqa, unë tiempu cämaratam trenpa puntanman churayarqan, y kë trennam Market nishqan cällikunapa pasar grabarqan. Kë pelïculachöqa rikakun shumaq cärrëtakuna, unë tiempu cärrukuna, periödicuta rantikoqkuna y rantipakoqkuna y imëka rurëninkunata rurëkaq nunakunam.

Kë llakinëpaq pelïculataqa, itsachi 1906 watachö abril killakuna grabayarqan, 18 de abrilchö manaraq alläpa patsa kuyïwan y kayakar tsë marka manaraq ushakaptin, y tsëchöqa mëtsika nunakunam wanuyarqan y tsë markaqa tsunyëkarmi quedarirqan. Tsë pelïculachö nunakunaqa manam musyayarqantsu juk ishkë junaqkunllachöna wanuriyänampaq kaqta. Tsë pelïculata ruraqkunapa juk kastan Scott Miles jutiyoq nunam kënö nin: “Tsë nunakuna sufriyänampaq kaqta mana musyayanqanta rikëqa alläpa llakipëpaqmi”.

Noqantsikpis tsënöllam alläpa llakipantsik täranqantsik markachö nunakunata. Më tsëchö imëkapis imanö patsätsishqa këkanqampa y imanö kawakïkäyanqampa ushakënin këllachöna këkanqanta manam musyarmi, imëka rurëninkunachö ocupädu kakïkäyan. Mana musyanqantsik höram patsa kuyïqa karamun, peru Jehoväpa piñakïnin junaq kanampaq kaqtaqa nuna mayintsik willëta puëdintsikmi. Itsachi cada semäna wayin wayin yachatsikoq ëwanantsikpaq tiemputa rakishqantsik, peru ¿nuna mayintsikta mas yachatsinantsikpaq kallpachakushwanku?

Awmi, llapan tarinakunqanwanmi Jesusqa parlarqan, pasëkarnin juk impuestu cobraqta rikärirmi parlapärirqan, jina pullan junaq jamanampaq höra këkaptimpis, pösupita yakuta jorqëkaq warmiwampis parlarqanmi (Lüc. 19:1-5; Juan 4:5-10, 21-24). Jamanampaq tiemputa rakishqana këkarpis, nunakunata yachatsinanrëkurqa jamëtapis jaqireqmi. Manam ichikta ruranqanllawantsu kushishqa karqan, nunakunata llakiparninmi rurëta puëdinqampitapis masta rurarqan (Mar. 6:30-34). ¿Imanötaq Jesus ruranqanta mëtsikaq qatiyan?

Mëlikaqa alläpa segurashqa edificiupa juk cuartunchömi täran. Cäsi llapan vecïnunkunam juk  nacionpita shamushqa estudiantikuna kayan, jutinkunapis manam yurintsu edificiuta rikaqpa listanchö, jinamampis celularninkunapa nümirumpis manam yurintsu pimampis qayakuyaptin. Pëqa alläpam gustan vecïnunkunawan tsë edificiupa alarninchö Diospita parlëta o ascensor nishqanchöpis. Mëlikam nin: “Yachatsikunapaq territoriötanömi rikä”. Atska idiömachö publicacionkunata puritsirmi, jaqishqa mëtsika tratädukunata y revistakunatapis. Jinamampis rikätsinmi Internetchö jw.org päginantsiktapis. Mëlikaqa atskaqtam Bibliapita yachatsirnin qallashqa.

Soniapis llapan puedinqankunatam yachatsishqa. Juk clïnicachömi pëqa trabajan y llapan trabajaq mayinkunata yachatsinampaqmi churapakashqa. Puntataqa rikashqa imata wanayanqanta y imakunata musyëta munayanqantam. Tsëpitanam almuersu höra Diospita yachatsinampaq jukllëllapayan ashishqa. Tsënöpam Soniaqa ishkaqta Bibliapita yachëkätsin. Kananqa munan jamanqan höra, doctorta shuyarëkaqkunawan parlëtam.

1906 watachö terremötuta kawëkar pasaq nunam nin: “Manam ni mëqan markapis tsënöpaqa pasashqatsu”. Peru tsënö desgraciakuna pasakunqampitapis mas jatun kaq Jehoväpa piñakïninqa chäramunqanam pëta “mana reqeqkunapaq” (2 Tes. 1:8, NM). Jehoväqa alläpam munan nunakuna cambiayänanta y Testïgunkuna yachatsikuyanqanta chaskikuyänantapis (2 Pëd. 3:9; Apoc. 14:6, 7).

Alläpa mana alli tiempukunachö kawëkäyanqanta cuentata qokuyänampaq y munëninkunata jaqiyänampaq y Jehoväta ashiyänampaq yachatsinantsikpaqmi cristiänukunataqa mandamarquntsik (Sof. 2:2, 3). ¿Trabajaq mayintsikkunata, vecïnuntsikkunata y wakin imëkata rurëkarnimpis nunakunata yachatsinantsikpaq listuku këkantsik? ¿Mastsuraq kallpachakushwan yachatsinantsikpaq?