Bibliam willamantsik espïritukuna kawayänan imanö kanqantapis

ÑUKIRKUR ciëlota rikë y wiyëta tïrë: mëläya munarpis manam ni ima espïrituta rikankitsu ni parlaqta wiyankitsu. Pero rasun kaqchöqa, tsëchömi këkäyan, y alli yachaq y puëdeq espïritukunam kayan, hina shutinkunapis kanmi y llapampapis imanö këninkunaqa hukläya hukläyam. Wakinkunam alli kayan y wakinkunanam mana alli kayan. Y llapanmi imata ruranqantsiktapis rikëkäyämun.

Bibliaqa yachatsikun Diospis espíritu kanqanta y shutinqa Jehová kanqantam, tsë shutinmi rikätsikun mana rasumpa kaq dioskunapita hukläya kanqanta (Salmo 83:18; Juan 4:24). Bibliaqa kënömi nin: “Jehoväqa hatunmi y pëllam más alabashqa kanan. Llapan dioskunapitapis pëllam más mantsëpaq. Porque llapan markakunapa diosninkunaqa manam ni imapaqpis välintsu, pero Jehová Diosqa, kikinmi ciëlota rurashqa. Limpio y chipapaq këqa pëpa nöpanchömi këkan; kallpa y shumaq këpis wayinchömi këkan” (Salmo 96:4-6).

Espïritukuna kayänan sitiota visionkunachö rikäyanqan

Biblia ninqannöpis, “manam pipis ni ime Diosta ricashqatsu” (Juan 1:18). Imanömi wisku yurikushqa nuna colorkunata reqintsu, tsënölla ni pipis käyintsu o mayantsu Diospa hatun kënin ni chipapaq kënin imanö kanqanta. Tsëmi Jehoväqa alli yachatsikoq kar, nawintsikwan mana rikëta puëdenqantsik espïritukuna kayanqan sitio imanö kanqantapis, reqinqantsik cösaskunallawan entiendetsimantsik. Palabran Bibliachömi atska visionkunapaq willakun, y tsëwanmi sirveqninkunata rikätsirqan espïritukuna kayänan sitio imanö kanqanta y tsë espïritukuna noqantsikwan imanö kayanqantapis. Rikärishun tsë wakin visionkunata.

Huk kutim profeta Ezequiel Jehoväpa glorianta visionchö rikarqan. Tsë rikanqanta willakurmi zafïronö, turmanyënö, ninanö kanqanta y alläpa shumaq chipapanqanta nirqan. Y apóstol Juannam trönonchö Jehová tëkaqta huk visionchö rikarqan, y willakurqan Diosqa ‘imeca jaspi y rubi nishqan shumaq rumino’ kanqanta, y “tse tronutaqa arcurëcarqan juc tormanyemi. Tse tormanyeqa chipapäquicarqan allapa shumaq esmeralda ruminomi” nirqanmi. ¿Imatataq tsë rikäyanqankuna musyatsimantsik? Jehová këkanqanchöqa yamë kë kanqanta, y llapampis alli patsätsishqa y shumaq kanqantam (Apocalipsis 4:2, 3; Ezequiel 1:26-28).

 Hina profeta Danieltapis Diosmi huk visionta rikätsirqan. Tsëchömi rikarqan “chunka waranqa kuti chunka waranqa [angelkuna Jehoväpa] nöpanchö shëkäyaqta” (Daniel 7:10). ¡Imanö espantëpaqraq tsëqa karqan! Imëka sueñichönö huk angel-llatapis rikëqa imanö mantsakëpaqraq këkunman. Kanan yarpakurkï, ¡imanöraq Daniel tikrarirqan tsëtsika millón angelkunata visionchö rikëkur!

Bibliachöqa casi kima pachak kutinömi angelkunapaq parlan. Kë espïritukunaqa kikinkunapura parlapänakïta puëdeyanmi, y unë tiempokunachöpis wakin nunakunata parlapäyarqanmi. Bibliachö “angel” nir traduciyanqanqa shamun hebrëochö y griëgochö “willakoq” ninan palabrapitam. Hinamampis, wakinkunaqa serafín o querubín cargoyoqmi kayan. Pero angelkunaqa manam Patsachö kawashqa nunakunatsu kayan. Bibliaqa yachatsikun punta nunatapis manaraq rurarnin llapan espïritukunata Jehová kamanqantam (Job 38:4-7).

Yapë parlarishun Daniel rikanqampaq. Tsë visionchö rikanqan angelkunaqa alläpa precisaq hunaqchömi ëllukashqa këkäyarqan: “nunapa tsurin rikoqmi” Jehoväpa trönonman witirirqan “y pëtam qorqan mandakïta, respetashqa këta y gobiernota, tsënöpa llapan markakuna, llapan nacionkuna y tukï idioma parlaqkuna pëta serviyänampaq” (Daniel 7:13, 14). ¿Pitaq tsë ‘nunapa tsurin rikoqqa’? Espïritukuna kayänan sitiochö más precisaq kaqmi: kawarimushqa Jesucristu, pëmi hinantin Patsaman gobernamunampaq autoridadta chaskirqan. Ichikllanam pishin Patsachö llapan gobiernokunapa rantin hinantinman gobernamunampaq, y chipyëpam ushakätsinqa mana alli rurëkunata, waktsa këta, alläpa hipakïkunata, qeshyakunata y wanïtapis (Daniel 2:44).

Jesus tsë cargota chaskiriptinqa Diosta sirveq angelkuna alläpam kushikuyarqan, pëkunaqa kuyamantsikmi y noqantsikpaq alli kaqtam munayan. Tsënö kaptimpis, manam llapan espïritukunatsu kushikuyarqan.

 Mana alli kaq espïritukuna

Nunakuna kawar qallayanqan witsanmi huk angel mandakoq këta alläpa munarqan. Pëta adorayänanta paqwë munarmi Jehová Diospa contran revelakorqan, tsënöpam Satanás tikrarirqan, y tsë shutiqa “Chikikoq” o “Contrakoq” ninanmi. Pëmi imëka mana allikunata ruraq y kuyakoq Jehoväpa chikeqnin. Hinamampis wakin angelkunaqa Satanasmanmi qaqäyarqan. Pëkunapaqmi Bibliaqa demoniokuna nin, y alläpam nunakunata chikiyan. Pëkunam causayan tukï hipakïkunata, imëka mana allikunata, qeshyakunata, waktsayëkunata y guërrakunatapis.

Casi llapan iglesiakunachömi Satanaspaqqa parlayannatsu, pero Bibliaqa pëpaq parlanmi. Job librochömi rikätsikun Satanás imanö kanqantapis. Kënömi nin: “Diospa llapan wambrankuna Jehoväpa nöpanman ëllukäyänan [gorikäyänan] hunaqmi karirqan, y Satanaspis pëkuna këkäyanqanmanmi yëkurirqan”. Y, ¿imatataq tsëchö rurarqan? Mana penqakurmi Diosta nirqan bendeciptinlla Job sirvenqanta. Tsënö acusanqan rasumpa kanqanta rikätsikunanrëkurmi, Jobpa llapan wätankunata ushakätsirqan, chunka wambrankunata wanutsirqan y llapan cuerponchö mana kachakaq qeriwan qeshyatsirqan. Pero tsëkunata rurarpis, manam Jobtaqa Diospita rakirqantsu (Job 1:6-19; 2:7).

Jehoväqa alläpa musyaq karmi kananyaq Satanasta ushakätsinraqtsu, pero paqwëmi musyantsik ushakätsinampaq ichikllana pishinqanta. Apocalipsis librochö espïritukuna kayanqan sitiopaq parlanqanta leirmi, musyantsik Satanasta ushakätsinanrëkur Jehová imatana rurashqanta. ¿Imatataq Apocalipsis willakun? Kënömi nin: “Sielucho[mi] maqanaqui qallaquicorqan. Miguelmi [kawarimushqa Jesucristu] anjelnincunawan tse culebrata [Satanasta] maqayarqan. Tsenollam jina tse culebrapis anjelnincunawan ticrapuyarqan Miguelta. Peru ticrapurpis, manam bensitaqa puediyarqantsu. Tsenopam sielucho queta puediyarqannatsu. Antis tse culebrataqa que patsamanmi weqaparcayämorqan. [...] Petam qaqaqnin caq anjelnincunatawan sielupita weqaparcayämorqan” (Apocalipsis 12:7-9).

Satanás kë Patsaman qarpakämushqa karmi nunakunata paqwë ulipëta o llullapayta tïran. ¿Imanö? Tukïnöpam, mana alli religionkunapa yachatsikïninwanmi nunakunata Jehoväpita y Bibliapa rasumpa kaq yachatsikïnimpita rakin. Huk más hatun kaq ulikïninqa, espïritukuna kayanqanchö wanushqakuna kawëkäyanqanta creitsikunqanmi. Más tantiarinapaq, Africachö y Asiachömi pï më nunakuna creiyan wanurirqa espïritukuna kayänan sitiochö unë kastankunawan tinkuyänampaq kaqta. Y wakin markakunachönam pï më creiyan nunakuna rupayänan infiernoman y purgatorioman. Tsëkunam nunakunata creitsin wanushqakuna mëchöpis kawëkäyanqanta.

¿Llapan alli nunakunatsuraq ciëloman ëwayan?

Pï mëmi creiyan alli nunakuna ciëloman ëwakuyänampaq kaqta. Pero rasun kaqchöqa yupashqallam ciëlomanqa ëwayan, y llapan wanushqakunawan igualatsishqaqa, ewaqpaq kaqkunaqa wallkaqllam kayan. Bibliaqa willakun 144.000 nunakunalla ciëlochö kayänampaq Patsapita ‘acrashga’ kayanqantam. Y, ¿imatataq ciëlochöqa rurayanqa? ‘Patsacho nunacunatam mandayänqa’ y ‘saserdoticunanomi Diosnintsicta sirwiyänqa’ (Apocalipsis 5:9, 10; 14:1, 3, NTCN). Pëkunam profeta Daniel rikanqan “nunapa tsurin” Jesucristuwan ciëlopita gobernayämunqa Diospa Gobiernonchö. Tsë Gobiernom Satanastawan demonionkunata ushakätsinqa y kë Patsata huk paraïsoman tikratsimunqa. Hinamampis mëtsika wanushqa nunakunam kawariyämunqa y shumaq huertaman tikrashqa Patsachömi imëyaqpis kawakïta puëdeyanqa (Lucas 23:43).

Kë llapanchömi rikarquntsik mëtsika millón angelkuna kayänan sitio kanqanta. Llapanta Kamaq Jehovämi llapampa hanampa këkan. Pëwan juntom këkäyan mëtsika wiyakoq angelkuna. Pero Satanaswan demonionkunapis kanmi, y tsëkunaqa kayan Jehoväpita rakikashqa espïritukunam, y mana alliman apamënintsiktam tïrayan. Hina kayanmi, ciëlochö kayänampaq Patsapita ‘acrashga’ nunakuna. Pero kananqa këman pensarishun, llapan espïritukunapita, ¿mëqankunawantaq parlëta puëdentsik? ¿Imanötaq tsëta rurashwan? Rikärishun.