Ichikllachönam shumaq kawë kanqa

“Ichik tiempollachönam mana allita ruraqkunaqa kayanqanatsu [...]. Pero manshukunapaqmi patsaqa kanqa, y tsëchömi yamë këta tarirnin kushishqa kawakuyanqa.” (SALMO 37:10, 11.)

¿KË PROFECÍA cumplikaqta rikëta munankimantsuraq? Llapantsikmi munantsik.

Qepa rikanqantsik yachatsikïkunaqa wakin profecïakunallapaqmi parlashqa y alleqmi rikätsimarquntsik ‘ushanan hunaqkunachöna’ kawëkanqantsikta (2 Timoteu 3:1-5). Biblia qellqaqkunatam Diosqa këkuna pasakunampaq kaqta willarqan, tsënöpa shamoq tiempochö alli kawakï kanampaq kaqman markäkunapaq (Romanos 15:4). Kë profecïakuna cumplikëkanqanqa rikätsimantsik kanan mana alli kawëkuna pasëkanqantsik ichikllachöna ushakärinantam.

¿Imaraq pasakunqa ushanan hunaqkuna ushariptin? Diospa Gobiernonmi llapan nunakunapa Mandakoqnin kanqa (Mateo 6:9, 10). Shamoq tiempo imanö kanampaq kaqta Biblia ninqanta rikäri:

● Manam mallaqë kanqatsu. “Patsachöqa alläpa atska gränom kanqa, hirkakunapa puntanchöpis sobrakunqam.” (Salmo 72:16.)

● Manam qeshyakuna kanqatsu. “Manam ni pï patsachö täraq: ‘Qeshyämi’ ninqanatsu.” (Isaías 33:24.)

● Patsam unë kanqanman kutikanqa. “Tsaki y mana ima heqanan allpakunam kushikuyanqa, hina tsaki pampakunam paqwë kushishqa kayanqa, y azafrán wëtanöraqmi wëtäyanqapis.” (Isaías 35:1.)

Bibliachö profecïakuna cumplikänampaq kaqkunataqa ichikllatam rikärirquntsik. Tsëmi huk Testigo shamoq tiempo más alli kawë kanampaq kaqman imanir markäkunqanta tapurinëkipaqmi niriyaq.