Wakinkunawan shumaq pasakïta tïrashun

“Imanopapis allita rureta tïrashun shumaq pasacunantsicpaq.” (ROM. 14:19.)

1, 2. ¿Imanirtaq Jehoväpa testïgonkunaqa shumaq pasakïchö y huknölla kawakuyan?

KË MUNDOCHÖQA manam pipis wakinkunawan shumaq pasakïchö kawakuyanllatsu. Tsë nacionllachö y tsë idiömallata parlaqkunapis religionninkunarëkur, polïticarëkur y grüponkuna hukläya kanqanrëkurmi huknöllaqa kawakuyantsu. Pero, ¡imanö hukläyam Jehoväpa markanqa! “Jinantin nasionpita tuquilaya nunacuna y tuqui idioma parlaq” karpis shumaq pasakïchömi y huknöllam kawakuyan (Apo. 7:9).

² Pero manam kikinkunallapitatsu tsënöqa kawakuyan. ¿Imanirtaq Jehoväpa markanqa huknölla kawakuyan? Puntataqa, ‘allitanona Diosnintsic ricanqampitam’ y Jesusman markäkuyanqanrëkur hutsankunapita perdonashqa kayanqampita (Rom. 5:1; Efe. 1:7). Ishkë  kaqqa, pëllata serviyaptin Jehová santo espïritunta qoptinmi, tsëmi yanapan shumaq pasakïchö kawakuyänampaq (Gal. 5:22). Y kima kaqnam kë ‘mundupa mana karnin’ (Juan 15:19, KQW). Manam imëpis política cösaskunaman ni nacionninchö o huk nacionkunawan guërrakunaman mëtikuyantsu, “espädankunatam takllapa puntanman tikratsiya[shqa]” (Isa. 2:4).

3. ¿Imata ruranapaqtaq yanapamantsik shumaq pasakïchö kawakunqantsik y kë yachatsikïchö imatataq rikäshun?

³ Hina shumaq pasakïchö kawakunqantsikqa manam cristiano mayintsikkunata mana hipatsinallapaqtsu yanapamantsik. Sinöqa ima kasta y ima costumbreyoq kayaptimpis shonqupita patsë kuyanapaqmi (Juan 15:17). Awmi, yanapamantsik “nuna mayintsiccunata yanapa[napaqmi]. Peru masqa [...] Teyta Jesusman marcäcoq mayintsiccunata” yanapëkunapaqmi (Gal. 6:10). Noqantsikqa huk paraíso cuentachönam kawëkantsik y tsëtaqa alläpam kuyanantsik y cuidanantsik. Tsëmi alläpa precisan shumaq kawakïta congregacionchö imëkanöpapis ashinantsikqa.

Cristiänopura piñatsinakur

4. ¿Imatataq rurashun pitapis piñatsishqa karqa?

⁴ Santiägum kënö qellqarqan: “Llapantsicmi imanopapis mana allicunata rurecantsic. Sitsun meqan nunapis lluta parlecunapita shiminta sujetaconqa, tse nunaqa imachopis alli cabal” nunam (Sant. 3:2). Këwanmi rikantsik imë hora karpis cristiano mayintsikwan piñatsinakurinqantsikta (Fili. 4:2, 3). Pero, ¿altsarishwantsuraq congregacionchö shumaq pasakïchö kawakïta mana ushakätsishllapa? Awmi. Pitapis piñatsishqa karqa, imanö altsanapaqpis Bibliaqa willamantsikmi (lei Mateo 5:23, 24).

5. Cristiano mayintsik piñatsimashqa, ¿imanötaq altsëta tïrantsik?

⁵ Pero, ¿pipis piñatsimashqantsik kaptinqa? ¿“Pë piñatsimashqa këkarninqa, pëmi perdonta mañamänan” nishpatsuraq kakushwan? Manam. Yarpänantsikmi rasumpëpa kuyakïqa piñatsiyanqanta mana yarparäkunqanta (1 Cor. 13:5). Ichik cosaskunallachö piñatsimashqantsik kaptinqa manam yarparäkunantsiktsu, perdonëkushwanmi (lei Colosenses 3:13). Kënö rurashqaqa, pëkunawan y kikintsikwampis kushishqam kashun. Rasuntam Bibliaqa nin “piñatsiyanqankunaman mana yarparanqanqa, alläpa shumaqmi” (Pro. 19:11).

6. Piñatsimanqantsikta qonqëta mana puëderqa, ¿imatataq rurashwan?

⁶ ¿Piñatsimanqantsikta qonqëta mana puëderqa? ¿Piñakurtsuraq llapanta willakur qallëkushwan? Tsënö rurarqa congregacionchö shumaq pasakïchö kawakïnintsiktam ushakäratsishwan. Mateo 18:15 textom willamantsik piñatsinakushqa kar imanöpis altsanantsikpaq, kënömi nin: “Sitsun creyicoq mayiqui imatapis mana allita rurashunqui, japallanwan parlar, shumaq cäyipecatsï imacho ofendishonqequita. Wiyashuptiqueqa, pewan amishtë. Tseta rurarqa, yanapecorqonqui yape alli cawacunanpaqmi”. Awmi, këchöqa sinchipa piñatsinakushqapaqmi parlëkan (versïculokuna 15 a 17). Tsënö kaptimpis 15 kaq versïculoqa shumaq consëjotam qomantsik: piñatsimaqnintsiktam hapallanllata respëtowan tsë problëmata altsëta tïrar parlapänantsik. *

7. ¿Imanirtaq alläpa precisan imatapis piñatsinakurqa raslla altsarinantsik?

⁷ Apóstol Pablum kënö qellqarqan: “Piñacurpis, ama jutsa ruremanqa ishquiyëtsu. Ama inti jeqanqanyaqqa piñashqallaqa cacuyëtsu. Ama diablupa muneninta rurayëtsu” (Efe. 4:26, 27). Y Jesusnam nirqan: “Sitsun pipis demandashurniqui juesman apatsiyäshunqui, manaraq juespa puncunman char aregleta tïrayë” (Mat. 5:25). Kë ishkan textochöpis rikantsik piñatsinakurqa, manaraq masman chaptin raslla altsarinantsikpaq kaqtam. Ama permitishuntsu allitukoq kë, chikikoq kë o mallaqäkoq kë imatapis piñatsinakunqantsik raslla altsarinapaq kaqta tsapämänata (Sant. 4:1-6).

 Piñatsimaqnintsikkuna atskaq kayaptin

8, 9. a) ¿Römachö cristiänokunawan imataq pasakurqan? b) ¿Ima nishpataq Pablu consejarqan?

⁸ Piñatsimaqnintsikkuna atskaq kayanqanman pensarishun. Tsëmi pasakurqan Römachö cristiänokunata, wakinkunam judío kastapita kayarqan y wakinkunaqa manam. Itsa tsë problëmaqa karqan wakinkuna concienciankunachö débil kar kikinkunapaq imatapis rurayänampaq decidiyaptin wakin kaqkuna rimayanqan. ¿Imatataq Pablu consejakurqan Jehová yanapaptin? (Rom. 14:1-6.)

⁹ Pabluqa ishkan grüpopaqmi parlarqan. Huk kaq grüpom unë Ley wiyakunan manana precisanqanta alleq mana musyar wakin mikïkunataqa melanäyaq, pero huknin kaq grüpoqa alleqnam musyaq, tsëmi Pabluqa pëkunata consejarqan alleq manaraq musyaq grüpopita más alli kayanqanta mana pensayänampaq (Rom. 14:2, 10). Kë cristiänokunata despreciarqa mana allikunamanmi ishkiratsiyanman karqan. Tsëmi Pablu nirqan: “Ama tse miquicuna asuntu Diospa alli rurenincunata ushacätsiyëtsu. [...] Tserecur etsatapis micuyëtsu, ni binutapis upyayëtsu, ni imatapis mana allitaqa rurayëtsu creyicoq mayiquicunata jutsaman mana ishquitsiyänequipaq” (Rom. 14:14, 15, 20, 21). Y concienciankunachö debil këkaqkunatam nirqan wakin kaqkuna huknöpa pensayanqanta mana rimayänampaq (Rom. 14:13). Hinamampis këtam consejakushqana karqan: “Ama ni meqequicunapis musyaq tucur cayëtsu, antis imatapis marcäquiniquicuna y yacheniquicuna Dios qoyashunqequimanno manijacuyë” (Rom. 12:3). Kanannam këta rurayänampaq consejarqan: “Tsemi imanopapis allita rureta tïrashun shumaq pasacunantsicpaq. Y jucnintsic jucnintsicpis yanapanaquicushun Teyta Jesusman mas creyicur patsacänantsicpaq” (Rom. 14:19).

10. Römachö cristiänokunanö, ¿imatataq rurashwan ima problëmatapis altsanapaq?

¹⁰ ¿Römachö cristiänokuna Pablu consejakunqanta wiyakuyarqanku? Awmi, wiyakurmi huknöpana portakuyarqan. Kanan witsan cristiänokunapis tsënöllam rurayänan ima problëmapis kaptinqa. Tsë problëmakunapaq Biblia ninqantam rikäyänan, hina kuyakïwan y humildadwanmi yachakuyanqanmannö  rurayänan. Clärom këkan, ‘jucnimpis jucnimpis shumaq cawacuyanampaqqa’ Römachö cristiänokunanö huknöpana llapampis portakuyänan (Mar. 9:50).

Anciänokuna yanapakuyaptin

11. ¿Imatataq anciänokuna rurayanman huk cristiano huk cristiänowan problëman kanqanta willariptinqa?

¹¹ Këman pensarishun, itsa huk cristiano familianchö o congregacionchö piwampis piñatsinakunqanta huk anciänota willarinman. ¿Imataraq kë anciano ruranqa? Puntataqa shumaqmi wiyanan y kë consëjotam yarpänan: “Huk waktsa [...] mañakunqanta pipis mana wiyaptinqa, tsëqa, [...] qayakuptimpis manam wiyashqatsu kanqa” (Pro. 21:13). Hina manam quejakoq nunapa biennintsu raslla yarqunan, huk proverbiom këta nin: “Punta quejakoq nunam alli ruraq nunanö rikakun, pero huknin chäramurnam huknöpa kanqanta niramun” (Pro. 18:17). Y quejakoq kaqta wiyarirninqa, tapurinanmi huk kaq cristiänowan parlashqana kanqanta o manapis. Hina Bibliawanmi rikätsinan tsë problëmata shumaq altsanampaq imanö ruranampaq kaqtapis.

12. ¿Ima willakïkunataq rikätsimantsik alliraq mana musyarqa imatapis mana decidinapaq?

¹² Alliraq mana musyapakurnin huk ninqanllata creiqa pasëpa mana allin kanman. Tsënö kanqantam Bibliachö qellqarëkaq rikätsikun. Huk kaqqa Potifarmi karqan, pëmi warminta creirirqan Josëmi violamëta munashqa nir willariptin. Alläpa piñakurmi hinan hora carcelman llawiratsirqan (Gén. 39:19, 20). Huk kaqnam rey David karqan. Mefibösetpa sirveqnin Zibämi Davidta ulipar nirqan reypa contran patronnin churakanqanta, y Davidqa manaraq alli musyarmi piñakurqan. Tsëmi Zibäta nirqan: “¡Rikë! Mefibösetpa kaqqa qamllapaq llapan katsun” (2 Sam. 16:4; 19:25-27). Kima kaqnam Persiapa reynin Artajerjes ruranqan. Huk kutin Judïokunapaq huk cartata chaskirirqan y tsëchömi nirqan Jerusalenpa perqankunata rurëkäyanqanta y pëpa contran churakäyashqa kayanqanta. Tsënö niyanqanqa manam rasumpatsu karqan, pero reyqa creirmi trabäjota haqiriyänampaq mandakurqan. Tsënöpam Jehoväpa templon altsëta haqiriyarqan (Esd. 4:11-13, 23, 24). Kë willakïkunaqa alläpam precisan anciano kaqkunapaq: pëkunaqa imatapis manaraq decidirmi alliraq musyayänan, y Pablu consejakunqannömi más kuyayanqan kaqllapa bienninqa yarquyänantsu (lei 1 Timoteu 5:21).

13, 14. a) ¿Ishkaq cristiänokuna piñatsinakushqa kaptinqa imatataq yarpänantsik? b) ¿Anciänokunapaqa ima yanapakïninkunataq kan pitapis juzgayänampaq?

¹³ Huk problema kaptin, ¿ishkan piñatsinakoqllatatsuraq wiyariyanman? Manam, mastaraqmi rurayänan, Bibliam kënö nin: “Sitsun meqequipis yachaq cayanqequicunata galacur caquicayanqui; tseno carqa, manaran rasonpa yacheyoqraqtsu cayanqui” (1 Cor. 8:2). Itsa alleqllaqa musyantsiktsu tsë problëmakuna piñatsinakushqakunawan imanö qallanqanta. Tsë problëmakunata anciänokuna rikarqa manam cuento puritseqkunata ni ulikuyanqankunata o llullakuyanqankunata creiyänantsu. Yarpäyänanmi Diosnintsik churanqan juez Jesucristu imëpis alli kaqllata ruranqanta, pëqa profecïakuna ninqannömi “ni wiyanqanllapitatsu ni hanampa rikanqanllapitatsu juzganqa” (Isa. 11:3, 4). Y Jesucristuqa imë hörapis Jehová ninqannöllam ruran, y tsënöllam anciänokunapis rurayänan.

¹⁴ Tsëmi pitapis manaraq juzgarnin Jehoväpa santo espïrituntaraq mañakuyanman y ‘mäcoq, mäcoq, cumplidu sirweq’ ninqantaraq publicacionkunachö ashiyanman (Mat. 24:45).

Shumaq pasakïchö kawakïpita más precisaq kaq

15. ¿Imëraq anciänokunata willashwan cristiano mayintsik hutsata ruranqampita?

¹⁵ Rasunmi, cristiänokunaqa shumaq pasakïchö kawakïtam imëpis ashiyanman. Tsënö kaptimpis Bibliaqa këtam nin: “Diospita shamoq alli yacheqa quenomi: tsuya yacuno limpiu quemi, nuna mayintsicwan mana liryaquimi” (Sant. 3:17). Rikanqantsiknömi, Jehoväpaqqa más precisan alli portakunqantsik. Tsëmi huk cristiano mayintsik hutsata rurashqa  kanqanta musyarirqa shumaq parlapänantsik anciänokunata willaq ëwanampaq (1 Cor. 6:9, 10; Sant. 5:14-16). Pero willaq mana ëwaptinqa noqantsikmi willakunantsik. Alläpa hutsachi kanman shumaq pasakïchö kawakïta munarlla upälla kakïqa. Tsënö rurashqaqa hutsa ruraqtachi tsapëkashwan (Lev. 5:1; lei Proverbios 29:24 *).

16. ¿Imatataq yachatsimantsik Jehüpaq y rey Jehorampaq Biblia parlanqan?

¹⁶ Jehú ruranqanmi rikätsikun shumaq pasakïchö kawëpitapis, alli rurëkuna más precisanqanta. Jehovämi Jehüta mandarqan rey Acabta familiantawan ushakätsinampaq. Acabpa y Jezabelpa wambran mana alli rey Jehorammi, Jehüta taripaqnin yarqaramurmi nirqan: “¿Shumaq pasakïchö kawakïtaku apamunki Jehú?”. Tsënam Jehüqa claro nirqan: “¿Ima shumaq pasakïchö kawakïraq kanman mamëki Jezabel hukwan hukwan punukur y brujerïakunata rurar kakïkaptinqa?” (2 Rey. 9:22). Tsëta nirirllanam Jehüqa shonqunchö flechëkurqan. ¿Këpita imatataq yachakuyanman anciänokuna? Pipis hutsata rurarir mana arrepentikuptinqa, manam shumaq pasakïchö kawakïta ashirninqa katsikuyänantsu. Rasmi qarquriyänan, tsënöpam congregacionchö kaqkuna Diosnintsikwan shumaq pasakïchö kawakuyanqa (1 Cor. 5:1, 2, 11-13).

17. ¿Imanötaq yanapakuntsik congregacionnintsik imëka achachëchö alalaq yakunö kanampaq?

¹⁷ Tsënö kaptimpis cristiänopura piñatsinakuyanqanqa manam pasëpa mana alli hutsakunapitatsu, sinöqa ichisaq cösaskunallapitam, y tsëkunataqa manam anciänokunaraqtsu rikäyänan. Tsënö kaptinqa kuyakoq kanqantsikmi yanapamäshun piñatsimanqantsikkunaman mana yarparäkunapaq. Bibliam kënö nimantsik: “Pipis hutsata qonqareq kaqqa kuyakïtam ashin, y piñatsinakuyanqampita imëpis parlakïkaq kaqqa kuyanakoqkunatam rakikäratsin” (Pro. 17:9). Cristiano mayintsikkuna piñatsimanqantsikta qonqarishqaqa, congregacionnintsikqa imëka achachëchö alalaq yakunömi kanqa. Hina tsëpitapis más precisaqqa, Jehoväwanmi alli pasakïchö kawakushun (Mat. 6:14, 15).

Shumaq pasakïchö këta tïranqantsikpita bendicionkuna

18, 19. ¿Ima bendicionkunatataq chaskishun alli pasakïchö kawëta tïrarqa?

¹⁸ ‘Shumaq pasaquichö’ kawëta tïraq cristiänoqa atska bendicionkunatam chaskinqa. Këtaqa nintsik, Jehová imanöpis kanqanta qatirninqa, pëwanmi alli amigo kayanqa y wakinkunapis huknölla y kushishqa kanan witsampis kawakuyänampaqmi yanapakunqa. Hinamampis congregacionchö kaqkunawan alli pasakïchömi kawakunqa, tsëmi “alli willaquita” willakoq ëwaptin nunakuna mana allipa tratayaptimpis alli shimimpa contestanqa (Efe. 6:15). Tsënöpam llapanta ‘cuyanqa y pasensiacurmi’ pipis mana alli parlapaptinqa pleitor kakunqatsu (2 Tim. 2:24).

¹⁹ Hinamampis, “alli ruraqtapis y mana alli ruraqtapis Teyta Dios cawaritsinanpaq” kaq awnikïtam cumplikaqta rikanqa (Hech. 24:15). Tsë awnikï cumplikaptinmi tukïläya nunakuna kawariyämunqa, kanan witsampita hasta ‘que patsa qallanqanyaq’ (Luc. 11:50, 51). Tsë tiempokunachö alli pasakïchö kawakïta yachatsikunantsik kaptinmi, alläpa precisan kanampitana alli pasakïchö kawakïta yachakunantsik.

[Päginapa ura kuchunchö willakïkuna]

Yarpärishun

• Pitapis piñatsirqa, ¿altsanapaq imatataq rurashwan?

• Huk cristiano mayintsik piñaratsimashqa, ¿imanötaq shumaq pasakïchö kawëta tïrashwan?

• ¿Imanirtaq hutsa kanman piwampis piñatsinakushqa kar willaramashqa huk kaqllata creiqa?

• Shumaq pasakïchö kawëpitapis, ¿imataq más precisaqqa?

[Yachakunapaq kaqpa tapukïninkuna]

[25 kaq päginachö dibüjukuna]

Jehoväqa alläpam kuyan imatapis perdonëkur qonqëkoqkunataqa