Casädopaq y soltëropaq alli consëjokuna

“Que llapanta[m] willapäriyaq [...]. Porqui Diosnintsic munashqanno cawacuyänequitam munä; y munä Diosllatana llapan shonqiquicunawan sirwiyänequitam.” (1 COR. 7:35.)

1, 2. ¿Imanirtaq alli yachakunantsik soltero këpaq o casado këpaq Biblia yachatsikunqampita?

PITAPIS kuyëqa alläpa kushikïmanmi warmikunata y ollqukunatapis chätsin, hina yarpachakïman y llakishqa këmampis. Pero cristiänokunaqa Jehová Diospa yanapakïnintam ashiyänan casakïta munar o mana munarpis. Pero manam tsërëkurllatsu Kamakoq Teytankunataqa ashiyänan. Höraqa soltërokuna kushishqa hapallankunalla kawakïkäyaptinmi, kastankuna y amïgonkuna majankuna ashiyänampaq imëpis parlapäyan. Wakinkunanam casakïta munayan, pero munayanqan majataqa tariyantsu. Y noviona këkaqkunanam, alistakuyänampaq atska consëjokunata wanayan, tsënöpa casakurirnin alli kawakuyänampaq. Hinamampis, casado karnin o soltero karnimpis llapantsikmi imëka mana alliman chäkurishwan y limpio kawakïnintsiktapis oqrarishwan.

² Soltero kar o casado karpis kushishqa këtam munantsik y masqa Jehoväwan alli këtam. Tsëmi corintiokunaman punta kaq cartampa 7 kaq capïtulonchö apóstol Pablu casado këpaq o soltero këpaq parlanqampita alli yachakunantsik. Kikin ninqannöpis tsëtaqa qellqarqan “Diosnintsic munashqanno cawa[cunata]” munar y ‘Diosllatana llapan shonquntsicwan sirwinantsicta’ munarmi (1 Cor. 7:35). Kë yachatsikïkunata leirnin pensashun soltero kar o casado karpis Jehoväta alli servinapaq.

Kikintsikmi akranantsik

3, 4. a) ¿Imaraq pasanman huk kastan o amïgon soltero kakuptin pipis alläpa yarpachakuptin? b) ¿Imanötaq apóstol Pablu ninqan yanapamantsik pitapis casakunampaq o soltero kakunampaq mana obliganapaq?

³ Unë witsan judïokunapaqqa casakï alläpam precisaq. Y tsënöllam kanan witsan wakin markakunachöpis: pipis edäninchöna këkar mana casakuptinqa, kastankuna y amïgonkunam pëpaq yarpachakuyan y imëkanöpis casatsita tïrayan. Höraqa majan ashinampaqmi niyan o hasta “pëmi o talmi qampaqqa alli kanman” niyanmi. Höranäqa casatsiyänanrëkurmi piwampis imëkanöpa reqinakatsita tïrayan. Pero tsëkunata rurëqa soltërokunata penqakatsin, amigo këninkunata ushakätsin y llakinätsinmi.

⁴ Pabluqa manam ni imëpis ni pita obligarqantsu casakunampaq ni soltero kakunampaq (1 Cor. 7:7). Jehová Diosta warminnaqlla kushishqa servirnimpis, wakinkuna casakuyänantaqa manam michaqtsu. Casakunampaq o soltero kakunampaqpis, cada cristiänom kikin akrakunan y manam pipis obliganmantsu.

¿Imanötaq soltero këninkunata alli provechayanman?

5, 6. ¿Imanirtaq Pabluqa nirqan soltero kë alläpa alli kanqanta?

⁵ Corinto congregacionman cartakurninmi, soltero kë Diospa kaqchö alläpa yanapakunqanta Pabluqa rikätsikurqan (lei 1 Corintios  7:8). Mana casado karnimpis, manam cristiänotukoq religionkunata pushaqkunanöqa warminnaq kanqampita allitukurqantsu. Sinöqa rikätsikurqan Diospita yachatsikïchö soltero kë alläpa yanapakunqantam. ¿Imanötaq yanapakun?

⁶ Soltero kaqkunaqa casakushqakunapitapis más cargokunatam chaskita puëdeyan. Tsënöllam Pabluwampis pasakurqan, pëqa apóstol karmi tukï nacionkunachö yachatsikurqan (Rom. 11:13). Hechos libropa 13-20 kaq capïtulonkunata leirninmi rikantsik nunakunata yachatsinanrëkur misionëronö viajanqanta, y tsëmi tukï markakunaman charqan y mushoq congregacionkunatapis patsätsirqan. Diosta servinqanchöqa noqantsik mana pasanqantsik tukï pruëbakunatam pëqa pasarqan (2 Cor. 11:23-27, 32, 33). Pero nunakunata yanapëqa alläpam kushitseq y tsërëkurmi imëkatapis haqirqan (1 Tes. 1:2-7, 9; 2:19). ¿Tsëkunata rurëta puëdenmantsuraq karqan warmiyoq y tsuriyoq karninqa? Itsachi mana.

7. ¿Imanötaq ishkë precursörakuna llapan tiemponkunata utilicëkäyan Jehová Diospa Gobiernompita yachatsikuyänampaq?

⁷ Mëtsikaq soltero cristiänokunaman alli yanapakïkäyan Diospa Gobiernompita yachatsikïchö. Tsënömi rurëkäyan Boliviachö Särawan Limbania precursörakuna, pëkunaqa yanapakoq ëwayashqa mëtsika watapana mana yachatsikuyanqan takshalla markamanmi. Tsë markachö electricidad mana kaptimpis pëkunaqa manash llakikuyantsu, antis kënömi niyan: “Ni radio ni televisión mana kaptinmi nunakunaqa más kuyayanqan kaqta rurayan: leikuyan”. Hasta manana imprimiyämunqan unë kaq publicacionnintsikkunatapis wakin vecïnokunaqa leikäyanllaraqshi, y tsë publicacionkunatash panikunata rikätsiyänaq. Kë panikunaqa casi llapan wayikunachöshi wiyakoq nunakunata tariyan, tsënöpash atska tiempochöraq llapan territorionkunaman chäyan. Huk chakwan warmish kënö ninaq: “Jehoväpa testïgonkuna këyaq chämushqa këkäyaptinqa ¡këllachönachi ushakë hunaq këkan!”. Yachatsikuyanqanrëkurmi tsë markapita atskaq nunakuna congregacionchö reunionkunaman ëwëkäyan.

8, 9. a) ¿Imapaq yarpartaq Pabluqa nirqan soltero kë alläpa alli kanqanta? b) ¿Ima rurëtataq puëdeyan soltërokuna?

⁸ Awmi, casädokunapis allipam yanapakïkäyan mana wiyakïta munaq nunakunapa markankunachö yachatsikurnin. Pero soltero  këkaq precursorkunaqa más sasa cargokunatam chaskiyan, tsëtaqa manachi casado o wambrayoq cristiänoqa rurëta puëdeyanmantsu. Soltero kë alläpa alli kanqampaq Pablu parlarqa, Jehoväpa kaqchö tukï rurëkunamanmi yarpëkarqan. Pëpa munëninqa karqan pënölla kushishqa Diospita yachatsikurnin kayänanmi.

⁹ Estados Unidos nacionchömi huk precursora këta qellqarqan: “Wakinkunaqa pensayan casakurir-raq kushishqa kayänampaq kaqtam. Pero noqaqa rikarqö rasumpëpa kushishqa këtaqa Jehoväwan alli amigo karnin tarinqantsiktam y manam casakur-raqtsu. Musyëmi, soltero quedakïqa sasaraqmi, pero alli provechashqaqa, alläpa shumaq qarëmi”. Hina këtapis nirqanmi: “Kushishqa kawakunata tsapämänapa rantinqa, kushishqa kanapaqmi soltero këqa yanapakun. Jehoväqa soltero o casado kashqapis llapantsiktam kuyamantsik”. Kanan witsanqa kushishqam Diospita yachatsikoqkunata wanayanqan markachö yanapakïkan. Manaraq casakushqa kaqkunaqa kënömi tapukuyanman: “¿Puëdëmantsuraq soltero kënïta provechëta Diospita más yachatsikurnin?”. Itsa cuentata qokurinkiman, soltero këqa mana imawampis igualaq Diospa qarënin kanqanta.

Casakïta munaq soltërokuna

10, 11. ¿Imanötaq Jehová yanapan casakïta munarpis alli majata mana tareqkunata?

¹⁰ Huk tiempopa soltero karirninmi, wakin cristiänokunaqa casakïta munayan. Tsëmi Jehoväta mañakuyan yanapakïninwan alli majata tariyänampaq (lei 1 Corintios 7:36).

¹¹ Wakin cristiänokunaqa, llapan shonqunkunawan Jehoväta sirveq majatam tarita munayan. ¿Qamwampis tsënöku pasëkan? Tsënö karqa Jehoväta imëpis mañakï (Fili. 4:6, 7). Mëtsika tiempona shuyararpis ama llakikur qelanëtsu. Diosqa musyanmi imapa pasëkanqëkita y kuyëpam yanapashunki llakikïnikikunachö (Heb. 13:6).

12. ¿Imanirtaq casakunapaq manaraq awnikur alliraq pensashwan?

¹² Casakïta munëkaq wakin cristiänokunataqa Diospa kaqchö mana sinchikïkaqkuna y mana Testïgokunam casakuyänampaq niyan. Tsëmi tsë cristiänokunapaq hapallankuna kayanqan sasaraq o ajarä kaptimpis, yarpäyänan mana alli majata akrarninqa hipayänampaq o ñakayänampä kaqta. Y allipaq o mana allipaq kaptimpis casakuyanqan hunaq “awmi, munämi” nirirqa, manam qepaman kutita puëdeyannatsu (1 Cor. 7:27). Tsëmi casakïta munarllaqa lluta akrashwantsu. Itsa mana alli majata akrëkurqa llapan kawënintsikchö llakikurlla kawakushwan (lei 1 Corintios 7:39).

¿Imanöraq alistakushwan casado kawakïpaq?

13-15. ¿Casakuriyaptin imakuna pasanantataq novio kayanqan witsanllana parlayanman?

¹³ Rikanqantsiknöpis, Pabluqa nirqan soltero kë alläpa alli kanqantam, tsënö kaptimpis, casakïta munaqkunapaqqa manam mana allita parlarqantsu. Tsëpa rantinqa santo espíritu yanapaptinmi casädokuna alli y mana rakikar kawakuyänampaq alli consëjokunata qellqarqan.

¹⁴ Rasumpa kaqchöqa, wakin novio këkaqkunaqa alliraqmi rikäyänan casakurir imakunapa pasayänampaq kaqta. Novio kayanqan witsanqa itsa pensayanman pipitapis más kuyanakuyanqanta, y tsënölla imëpis kawakuyänampaq kaqta. Tsëmi casakuriyan imëka cuentochöno imëpis kushishqalla kawakuyänampaq kaqman pensar. Pero alli yarparqa cuentata qokuriyanmanmi imëkanöpapis problema kanampaq kaqta, y wëllunakuyanqanwan y kuyanakuyanqanllawanqa mana altsayänampaq kaqta (lei 1 Corintios 7:28). *

¹⁵ Atskaq tsëraq casakushqakunam mantsakäkuyan o llakikuyan precisaq asuntokunachö majankunawan mana igual-lla pensar.  Itsa tsënö karnin pleitoyanman qellëpaq, kushikuyänan rurëkunapaq, mëchö täräyänampaq o familiankunata imë watukayänampaq kaqta parlar. Y itsa novio kayanqan witsanqa costumbrenkunata y mäñankunata cuentapaq churayaqtsu, pero casakuriyaptinqa tsë rurëninkunam alläpa piñatsin y yamë kawakuyänampaq yanapakuntsu. Tsëmi más alliqa kanman novio kayanqan witsankunallana tsëkunapaq parlayanqan.

16. ¿Imanirtaq casädokunaqa shumaq parlayanman ima problema kaptimpis imanö altsayänampaq kaqta?

¹⁶ Casado kawakïninkuna alli kanampaq y kushishqa kawakuyänampaqqa ishkankunam ima problëmatapis altsëta tïrayänan. Ishkankunam parlayanman wambrankunata estudiatsiyänampaq y edäyashqa teytankunata rikäyänampaq, pero manam haqiyanmantsu problëmankuna rakiyänantaqa. Biblia ninqanta wiyakurqa, puëdeyanqam problëmankunata altsëta, y hina mana altsëta puëderpis tsarakuyanqam y mana rakikashpam kushishqa kawakuyanqa (1 Cor. 7:10, 11).

17. ¿Imakunapaqtaq casädokunaqa yarpachakuyan?

¹⁷ 1 Corintios 7:32-34 (lei) textochömi Pabluqa willakun casado kawakïchö ima maskuna pasanampaq kaqta. Kënömi nirqan: “Warmiyoq caqcunaqa warminta que patsacho imecawanpis cushitsiyänanllapaqmi mas yarparäcuyan”, tsëta nirqa parlëkarqan mikïpaq, röpapaq, wayipaq y maskunapaqmi. ¿Imanirtaq tsëkunapaq alläpa yarpachakuyan? Warminta cuidanan y kushishqata katsinan kaptinmi. Soltero karnin llapan tiemponwan Diospita yachatsikïta puëdeshqa karpis, casakurirqa warmimpaqnam kallpanta y tiemponta más rakinan. Y tsënöllam warmimpis ruranan. ¡Imanö kushikïpaqmi Teytantsik Jehová tsëkunata cuentaman churanqanqa! Pëqa musyanmi casädokuna junto kayänanrëkur sinchikuyänan precisanqanta, y tsëpaqqa Diospita yachatsikur puriyanqampitam tiempota y kallpata rakiyänan.

18. ¿Imakunachötaq casakushqakunaqa hukläyana kayänan soltero kayanqampita?

 ¹⁸ Pablu parlanqankunaqa huk yachatsikïkunatapis rikätsimantsikmi. Majanrëkur tiempota Jehoväpa kaqpita rakikarqa, ¿manatsuraq amïgonkunawan kanampaq kaqpitapis tiempota rakinman? Pensarishun: ¿imanöraq huk warmi sientekunman nunan soltero kanqan witsannölla amïgonkunawan mëtsika tiempo pukllar kakuptinqa? Y, ¿imanöraq huk nuna sientekunman warmin amïgankunawan mëtsika tiempopa parlakur kakuptinqa? Tsëqa mëraq pensayanman majankuna mana kuyanqanta y hinamampis hapallan y llakishqa sientekuyanman. Pero këqa manam pasakunqatsu ishkampis casado kawakïninkuna alli kananrëkur sinchikuyaptinqa (Efe. 5:31).

Jehoväqa limpio kawakunatam munan

19, 20. a) ¿Imanirtaq casakushqa këllaqa tsapäkuntsu pununakï hutsapita? b) ¿Ima mana allikunamantaq ishkiyanman majankunawan atska tiempopa rakikäkureqkunaqa?

¹⁹ Jehoväta sirveqkunaqa llapanmi musyayan mana majanwan pununakïqa hutsa kanqanta. Wakinkunaqa tsë hutsaman mana ishkiyänampaqmi casakuyan. Pero yarpänantsikmi, manam casakunqantsikllaqa tsë hutsapita tsapämäshuntsu. Unë tiempokunachöqa, hiruroq perqayoq marka rurinchö kaqkunallam imëka mana allikunapita salvakuyaq. Waqtata yarqoqkunataqa wanutsita, suwapëta o imëka mana allikunatam mana alli nunakuna rurëta puëdeyaq. Tsaq tsënöllam casädokunawampis pasakun, huk casädoqa majanllawanmi kanan Jehová Dios ninqannö, tsëmi yanapanqa hutsaman mana ishkinampaq.

²⁰ ¿Ima nintaq Dios casädokunata? Pablum tsëtaqa claro rikätsikurqan 1 Corintios 7:2-5 textochö. Huk casada warmiqa nunanllawanmi pununan, hina tsënöllam nunampis ruranan. Casädokunaqa manam “cuerpuncunata [...] michänacuyä[na]ntsu”. Pero llakikïpaqqa, wakin casädokuna trabäjonkunarëkur o vacacionninkunata separädopa horqayanqanrëkur atska tiempopa majankunapita rakikäyanqanmi, y tsënöpam ishkampis shumaqqa atiendenakuyantsu. ¡Imanö llakikïpaqraq këkunman tsënö haqinakuyanqanchö Diablupa engañonman ishkir “muneniquicunata mana awantar” hukwan punuyaptinqa! Jehová Diosqa alläpam bendicenqa ollqukuna familiankunata shumaq atiendeyaptin y casado kawëninkunata peligroman mana churayaptinqa (Sal. 37:25).

Biblia ninqanta wiyakïqa alläpa allipaqmi

21. a) ¿Imanirtaq casado o soltero kanapaq akranan sasaraq? b) ¿Imanötaq yanapamantsik corintiokunaman punta kaq cartapa 7 kaq capïtulon?

²¹ Soltero këta o casado këta akrananqa sasaraqmi. Llapantsikpis hutsa ruraqmi kantsik, y tsënö kanqantsikmi nuna mayintsikwan tukï problëmakunaman chätsimantsik. Tsëmi Diosta sirveqkunapis, casado o soltero karpis hora höraqa tukï problëmayoq kayan. Imanö kaptimpis, corintiokunaman punta kaq cartapa 7 kaq capïtulon ninqanta wiyakoqkunaqa, manam tukï llakikïkunaman chäyanqatsu, antis imëkatapis Diospa rikënimpaq “allim” rurayanqa, casado kar o soltero karpis (lei 1 Corintios 7:37, 38). Musyanqantsiknöpis, Jehoväpa rikënimpaq alli kënöqa manam imapis kantsu. Kuyëninchö karqa mana wanushpam mushoq Patsachö kawakushun, y tsëchöqa warmikunawan ollqukuna mananam ima problëmapapis pasayanqanatsu.

[Päginapa ura kuchunchö willakï]

¿Yarpankiku yachakunqantsikta?

• ¿Imanirtaq pitapis casakunampaq nishwantsu?

• ¿Imanötaq soltero cristiänokuna tiemponkunata alli provechayanman?

• ¿Imanötaq noviona këkaqkuna alistakuyanman casado kawëpaq?

• ¿Imanirtaq casakushqa këllaqa tsapäkuntsu hukwan pununakï hutsapita?

[Yachakunapaq kaqpa tapukïninkuna]

[16 kaq päginachö dibüjukuna]

Soltero cristiänokunaqa más kushishqa kayan Diospita yachatsikïchö más yanapakurmi

[18 kaq päginachö dibüju]

Casakushqakunaqa, ¿imakunachötaq hukläyana kayänan?