JESUS kawarimunqanqa manam unë lluta noqantsikpaq mana precisaq pasakunqantsu kashqa. Apóstol Pabluqa kënömi nirqan: “[Jesucristuqa] llapanpa puntantam cawarimushqa. Tsemi creyintsic llapan nunacunapis wanurir cawariyämunanta. Diosta Adan mana cäsonqanrecurmi Diosnintsic permitïcorqan llapan nunacuna wanuyänanpaq. Y canannam Teyta Jesucristu cawarimonqanrecur permitïcushqa noqantsicpis wanurir cawarimunapaq. Tsemi awiluntsic Adanpa jutsanrecur wanuntsic, y Teyta Jesucristurecurnam wiñepa cawanapaq cawarimushun” (1 Corintios 15:20-22).

Jesusqa kawarimurqan 33 wata 16 de nisán killam. Tsë junaqchömi Judïokunaqa muruyanqampita llapampa puntan wayoqta Jerusalenchö këkaq Jehoväpa templonman apayaq. Jesuspaq ‘llapanpa puntan’ Pablu nirninqa, rikätsikïkarqan más nunakuna kawariyämunampaq kaqtam.

Qateqnin kaq palabrakunam yachatsimantsik Jesus kawarimunqan imata logranqanta: “Diosta Adan mana cäsonqanrecurmi Diosnintsic permitïcorqan llapan nunacuna wanuyänanpaq. Y canannam Teyta Jesucristu cawarimonqanrecur permitïcushqa noqantsicpis wanurir cawarimunapaq”. Adanpa jutsanrëkurmi llapantsik wanuntsik. Pero rescatamänantsikrëkur jutsannaq kawëninta Jesus qonqanmi, jutsapa y wanïpa esclävonnö kanqantsikpita libramarquntsik. Romanos 6:23 (NM) textochömi Pablu këta nin: “Jutsa rurëpa pägonqa wanïmi, Diospa qarëninqa wiñeypaq kawëmi Señornintsik Jesucristurëkur”.

Kikin Jesusmi willakurqan wanunqan y kawarimunqan noqantsikpaq alläpa precisanqanta. Kikimpaq parlarmi yachatsikurqan kawarimunampaq kaqta y “pipis peman marcäcoqqa wiñe caweyoq ca[nampaq caqta]. ‘Porqui que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq[‘]” (Juan 3:14-16).

Yarpakurkï, ¡mana sufrishpam imëyaqpis kawakushun! (Apocalipsis 21:3, 4.) ¡Tsëtam Diosqa awnimantsik! Juk estudiösom nirqan: “Kawë raslla kanqantam panteonkunaqa yarpätsimantsik y kawarimïnam wanï raslla kanqanta yarpätsimantsik”. Pasëpa segürom këkantsik Jesus kawarimunqanqa kawëta apamunampaq kaqta.