Wanïqa imëka chikimaqnintsik nunanömi, y llapantsikmi vencita munantsik. Peru kuyashqa kastantsikkuna wanuriptinqa, manam wanuyanqanta creintsiktsu. Y jövin karninqa itsa mana wanunapaq kaqta pensantsik, peru tsënö creishqapis wanïqa imëkanöpapis chäramunmi.

Egiptupa mandakoqninkunaqa wanïman alläpam yarpachakuyarqan, y wallkaq nunakunallam tsënöqa yarpachakuyashqa. Pëkunaqa imëkata rurarmi wanïta vencita munayarqan, y tsënöllam mëtsika sirweqninkunapis rurayarqan. Pirämidi nishqankunata rurayanqanmi, imëkata rurayanqanta y wanïta vencita mana puëdiyanqanta rikätsikun.

Chïna nacionchö precisaq mandakoqkunapis, wanïpaq jampita ashirmi imëyaqpis kawakïta procurayarqan. Tantiyarinapaq, Qin Shi Huang mandakoqmi doctorninkunata mandarqan wanïpaq jampita ashiyänampaq. Peru tsë jampikunamanqa imëkatam winayaq, y itsachi tsëkunata upunqan wanïman chäratsirqan.

1500 watakuna witsannam, Juan Ponce de Leon më tsë markakunapa wanïpaq jampita ashirnin rikapakur purirqan. Tsënö purinqanchömi kanan witsan Florïda (Estädus Unïdus) nir reqiyanqan markata taririrqan. Tsëpita juk ishkë watakunatanam, Estädus Unïdus chunchukunawan pelyayanqanchö, wanïpaq jampita manaraq tarir wanurirqan.

Egiptuchö mandakoqkuna, Chïna nacionchö precisaq mandakoqkuna y hasta rikapakur pureqkunam wanïta vencita procurayarqan. Tsëta lograyänampaq rurayanqanwan mana acuerdu karnimpis, entiendintsikmi imanir tsëta rurayanqanta. Porqui llapantsikmi mana wanushpa kawakïtaqa munantsik.

¿Imanirtaq nunakunaqa wanïta munayantsu? Kamakoqnintsik Jehoväpaq parlarmi Bibliaqa kënö nir willakun: “Llapantam tiempunchö shumaq rurashqa. Hasta mana wanushpa kawakï munëtam shonqunkunaman  churashqa” (Eclesiastes 3:11). * Tsërëkurmi 80 watakuna kawanantsikpa rantin, shumaq patsachö mana wanushpa kawakïta munantsik (Salmu 90:10). Tsënö kawakïtam shonquntsikpis munan.

¿Imanirtaq mana wanushpa kawakï munëta Dios shonquntsikman churashqa? ¿Llakikunantsikrëkurku? Manam. Diosqa awnikun wanïta ushakäratsinampaqmi. Y Bibliachöqa kutin kutinmi wanï ushakänampaq y Dios awnikushqan mana wanushpa kawakïpaq willakun. ( “Wanïqa ichikllachönam ushakärinqa” neq recuadruta rikäri.)

Jesucristuqa clärum kënö nir willakurqan: “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa” (Juan 17:3). Wanïwan pelyachönö kanqantsikqa ichikllachönam usharinqa. Peru Jesus ninqannöpis, wanïta vencinapaqqa Diospa yanapakïnintam wanantsik.