WAKINKUNA IMANIR MANA CREIYANQAN: Mëtsikaq nunakunam markäkuyan Diosman, peru creiyan alläpa karuchö këkanqantam. Llapan junaq iglesianman ëwaq Christina warmim kënö nin: “Musyarqämi imëkatapis Dios kamashqanta, peru manam reqirqätsu. Karuchö këkanqantam imëpis sienteq kä”.

¿IMATATAQ BIBLIA YACHATSIKUN? Itsa sientintsik Diosqa karuchöraq këkanqanta, peru pëqa manam imëpis jaqimantsiktsu. Dios imanö cuidamanqantsikpaq parlarmi, Jesus juk igualatsikïchö kënö nirqan: ‘Masqui juc nunapa caputsun juc pachac üshancuna. Y jucnin caqta oqrecutsun; ¿tranquilutsuraq cacunman? ¡Manam! Antis isqon chunca isqon üshanta mitsiconqancho jaqirïcurmi, tse oqracashqa üshan asheq ewanqa’. ¿Ima ninantaq? Jesusmi kënö nirqan: ‘Sielucho quecaq Dios Yayapis manam munantsu ni juc qollmi shonqullapis oqracänanta’ (Mateu 18:12-14).

Diosqa precisaqpaqmi churan ‘qollmi shonqucunata’. ¿Imanötaq “oqracashqa” üshakunata ashin? Kë yachatsikïpa qallananchö textu ninqannömi shonqunkunachö entienditsirnin.

Alli shonquyoq nunakunatam Diosqa entienditsin. Apostulkuna kawayanqan witsanmi Felïpita mandarqan Etiopïa markapita autoridäyoq nuna carrëtachö ëwëkaqta taripänampaq y leyikanqan profecïa ima ninan kanqanta entienditsinampaq (Hëchus 8:26-39). Juk kutinam, apostul Pëdruta pusharqan Corneliupa wayinman, pëqa mañakïkarqan y kallpachakïkarqan Diosta sirwirmi (Hëchus 10:1-48). Jina Diosqa pusharqanmi Pabluta y yanaqinkunata Filïpus markapa juk mayunyaq. Tsëchömi reqiriyarqan ‘unepita Diosta adoraq’ Lidia jutiyoq warmita, pëpa ‘shonquntam Dios yatecorqan Pablu willapäcushqanta cäyiquicunanpaq’ (Hëchus 16:9-15).

Tsë pasakunqankunachömi, Jehoväqa segurakurqan asheqnin kaq nunakuna pëta reqiyänanta. Y kanan witsanqa, ¿pikunataq nunakunapa wayinman chäyan o cällikunachöpis pëkunaman witirir Diospita parlapäriyan? Jehoväpa testïgunkunam. Kënö tapukï: “¿Pëkunatatsuraq Dios utilisëkan pëpita yachakunäpaq?”. Diosta mañakï pëman witinëkipaq invitashunqëkita chaskikunëkipaq. *