QARANCHÖ YACHATSIKÏPITA | ¿RASUMPAKU DIABLU KAN?
¿Mantsashwantsuraq Diabluta?
Diabluqa wanutsikoq gasnömi: rikakuntsu y alläpa peligrösu
Juk wanutsikoq gasmi kan y tsëqa mana rikakuntsu ni asyantsu, y manaraq cuentata qokuyaptinmi nunakunata wanuratsin. Mëtsikaqmi entëru Patsachö wanuyashqa tsë gaswan. Peru manam mantsashwantsu. Kanmi mäquinakuna tsë gas kanqanta musyanapaq y tsënöpa ras imatapis ruranapaq. Mëtsikaqmi tsë musyatsikoq mäquinakunata churayashqa y tsë musyatsikuriptinmi imata karpis raslla rurayan.
Tsë wanutsikoq gasnömi Diablupis: rikakuntsu, alläpa peligrösu y rurëninkunapis sasaran (ajaran) musyakänan. Peru manam mantsashwantsu, porqui Diosmi mëtsika yanapakïkunata änikun. Rikärishun wakinllata.
Akrëta puëdinqantsik. Santiägu 4:7 (MTCS) textum nin: ‘Satanasta ama cäsuyaytsu. Mana cäsupäyaptiquega aywacungam’. Satanas poderyoq karnimpis, manam obligamënintsikta puëdintsu mana munanqantsikta ruranapaqqa. Tsëtaqa kikintsikmi akrantsik. Markäkïnintsikchö sinchi kashqaqa, jaqiramäshunmi (1 Pëdru 5:9). Jesusqa alleqmi tsarakurqan kima kuti Satanas tentaptin, tsëmi Diabluqa ëwakurqan (Mateu 4:11). Tsënöllam noqantsikpis rurëta puëdintsik.
Amïgu kënintsik. Santiägu 4:8 (NTCN) textum nin Diosman “witiyay”. Kë textuqa invitëkämantsik Jehoväwan amïgu kanapaqmi. ¿Imanötaq pëwan amïgu këta puëdintsik? Pëpita Bibliachö yachakurninmi (Juan 17:3). Diospita mas yachakurninmi, mas kuyashun y mas kuyarqa, pëta sirwitam mas munashun (1 Juan 5:3). ¿Imanötaq kallpachakunqantsikta Dios rikan? Jina Santiägum kënö nin: ‘Paypis gamcunamanmi mas witimunga’.
Jehovämi tsapäkïninta änikun
Tsapäkïtam tarishun. Proverbius 18:10 textuchömi kënö nin: “Jehoväpa jutinqa mana juchoq törrinömi. Tsëmanmi alli nuna qeshpin, tsëchö imëkapitapis tsapashqa kanampaq”. Tsëqa, manam Jehovä jutita suertita qomänapaq utilisänapaq kaqtatsu nikan, sinöqa Diosta respetarnin tsapäkïninta asheqkunata yanapanampaq kaqtam.
Juk willakï. Hëchus 19:19 textuchömi tarintsik yanapamänapaq juk precisaq willakïta. Ëfesu markachö tsëllaraq cristiänuman tikrashqakuna imata rurayanqampitam willakun. Tsëchömi kënö nin: “Brujeria ruraq brujucunapis majia libruncunata apecur, nunacunapa nopancho limpu cayecuyarqan. Tse librucunapa chanintam calculariyarqan pitsqa chunca waranqa (50.000) qellepa chaninta”. * Alläpa chaniyoq kaptimpis, brujerïata rurayänampaq llapan kayäpunqantam tsë cristiänukunaqa ushakätsiyarqan. ¡Këqa juk precisaq yachatsikïmi noqantsikpaqpis! Kanan witsanqa entëru Patsachömi brujerïa mas mirakïkan. Tantiyarinapaq, jakawan pasatsikï, suertita qatitsikï y maskuna allinö rikakuptimpis, rasumpa kaqchöqa tsëkunachöqa demoniukunam këkäyan. Tsëmi precisan sasa kaptimpis tsëkunapita witikunantsik (Deuteronomiu 18:10-12).
Punta kaq yachatsikïchö parlanqantsik Rogelium, 50 watayoq këkar cuentata qokurirqan Diabluqa rasumpa kanqanta. ¿Imataq tsëta creinampaq yanaparqan? Pëmi nirqan Bibliata leyinqanshi Diablu rasumpa kanqanta creinampaq yanaparqan. Y tsë yachakunqanshi yanaparqan pëpita cuidakunampaq.
“Bibliata leyinqanshi Diablu rasumpa kanqanta creinampaq yanaparqan. Y tsë yachakunqanshi yanaparqan pëpita cuidakunampaq”
¿Imanöraq kawëniki kanman Diablupita kë Patsa librina kaptin? Tsëqa manam ardëllatsu. Bibliaqa willakun nunakunata engañaq Diablu, ichikllachöna “asufriwan rupaquicaq qochaman” jitashqa kanampaq kaqtam (Apocalipsis 20:10). Rupakïkaq qocha rasumpa kaptinqa, manam imananmantsu juk espïrituta. Tsëpa rantinqa, rikätsikun chipyëpa ushakëtam. Tsëmi, Diabluqa chipyëpa ushakanqa. ¡Diospa sirweqninkunapaqqa alläpa kushikïpaqchi kanqa!
Tsë junaq chämunqanyaqqa, Jehoväpita yachakïta sïgui. * Tsënö rurarqa, tsë junaq chämuptinmi següruna kënö nishun: “¡Diabluqa mananam kannatsu!”.
^ par. 8 Denariu nir reqiyanqan romänukunapa qellëninkuna kaptinqa, tsëqa alläpa valoryoqchi karqan. Juk nunaqa 50 mil junaqraqmi trabajanan karqan tsëta gananampaq.
^ par. 11 Brujerïapaq Dios pensanqampita y Diablupita maslla yachakïta munarqa, Rasumpëpaqa, ¿imatataq Biblia yachatsikun? librupa 10 kaq capïtulunta leyiri. Jehoväpa testïgunkunata mañakuri o www.ps8318.com/que nishqan päginachö leyiri.
