Kanan witsan Jehoväpa testïgunkuna Teyta Diospita yachakuyänampaqmi, Internetman imëka yachatsikuykunata churëkäyämun. Tsënö kaptimpis, Internet alläpa chaniyoq kaptinmi wakin markakunachöqa kayäpuntsu. Y wakin markakunamanqa manam Internet alläpa chantsu y wakinchöqa manam ichikllapis kantsu.

 Tsënö kaptimpis, tsë markakunachö wawqi panikunaqa Internetman llapan churayanqampitam kananqa yachakuyan. ¿Imatan yanapan?

 JW Box cajïtatan tsë markachö täraq wawqi panikunaman apatsiyashqa. Tsë cajïtataqa rantiyashqam, y Betelchö yanapakoq wawqikunam jw.org päginachö llapan tarinqantsikkunata tsëman churayan. Tsëmi kananqa wawqi panintsikkuna, videukuna rikäkuyta y imëkata leyikuyta puëdiyan. Y JW Boxqa, 250 sölisnömi cuestan.

 Juntakänantsik wayikunachömi wawqi panintsikkunaqa, JW Box cajïtapita videukunata, librukunata, revistakunata y masta mana chaniyoq celularninkuna o tablëtankuna kaptimpis jorqayan. Peru juntakäyanqan wayichö Internet mana kaptinqa, ¿imanötan jw.org päginantsikman tsëllaraq churayämunqanta katsiyan? Tsëllaraq yarqamoq yachatsikuykunata juk USB-man churarkurmi, Estädus Unïdus Betelpita apatsiyan. Tsënömi mana Internet kanqan markakunachö wawqi panikunaqa, tsëllaraq yarqamoq yachatsikuykunapita yachakuyan. Y tsë USB 13 sölisnömi cuestan.

 ¿Imanötan JW Box wawqi panikunata yanapashqa? Republica Democrätica del Congupita wawqi Nathan Adruandram nin: “‘Jehovällä, qammanmi chipyëpa markäkamü’ y Yarpäyë Lotpa warminta ima pasanqanta neq videukunatam unëpitana jorqëta munarqä, y mana puëdirmi llakikurqä. Peru kananqa celularnïchömi katsï, y tsëwanmi wamräkunata mas alli yachatsï”.

 JW Box cajïtata churar yanapakoq Nigeriapita wawqim kënö nin: “Teyta Jehoväpa juk qarënintanömi, tsë markakunapita wawqi panikunaqa JW Boxta rikäyan. Yachatsikunapaq utilizanqantsikta jipita puëdirmi, alläpa kushishqa këkäyan”.

 Africapa, Oceanïapa y Sudamëricapa markankunamanqa, mëtsikatanam (1.700) JW Boxta wawqi panikunapaq apatsiyashqa. Y mas markakunaman apatsiyänampaqmi previnikäyan. Tsëkunata rurayänampaqqa, ¿mëpitatan qellëta jipiyan? Churakunqantsik qellëpitam, y tsëtaqa donate.ps8318.com päginapam churakuyta puëdintsik. Tsënö churakuyanqëkipitam agradecikuyaq.