“COVID-19 qeshyapaq emergencia internacional niyanqan ushashqana kaptimpis, tsë qeshyaqa kananyaqpis alläpa peligrösuran. […] Tsënö qeshyakuna yapë yurimunanqa musyënam, tsëmi ima qeshyapis yapë yurimunanta listu këkänantsik” (Organización Mundial de la Salud niyanqanchö director general Tedros Adhanom Ghebreyesus, 22 de mäyu 2023).

 COVID-19 qeshya kanqampitaqa pïmë nunakunam yamënatsu kawakuyan, y manam sänuqa kayannatsu. Tsënö qeshya yapë kaptinqa, ¿puëdiyanqatsuraq gobiernukuna y hospitalkunachö doctorkuna nunakunata atiendita? O, kanan witsan këkaq imëka qeshyakunata, ¿imëllapis ushakätsita puëdiyanqatsuraq?

 Bibliachömi nin Teyta Diosnintsik ‘juk gobiernuta churamunampaq’ kaqta, y llapan qeshyakunata tsë Gobiernu ushakätsinampaq kaqta (Daniel 2:44). Tsë Gobiernu gobernamuptinqa Bibliachö ninqannömi “ni pï nunapis, ‘qeshyëkämi’ ninqanatsu” (Isaïas 33:24). Llapan nunakunam sänu y kallpayoq kayanqa (Job 33:25).