Yolandaca: “Huaquin compañerocunaca escuelamanca librocuna illajmi chayancuna. Chayashpapish profesorta uyanapaj randica musicatami uyashpa tiyacuncuna. Chashna rurashpaca maitataj alli notacunataca llujchingacunari. Cutin ñucapish shujtaj compañerocunapish estudiangapaj achcata esforzarishpapish examenta cuna horasca sinchimi can. Tuta horascama estudiashpapish mana alli notacunata llujchinaca llaquimi can” ninmi.

 ¿Canpish Yolanda shina sintirishcanguichu? De seguromi mana alli notacunata llujchishpaca llaquilla sintirishcangui.

 Maijan jovencunaca notacunata mejoranapaj randica ña mana estudiasha nincunachu. ¿Canpish chashnachu sintirishcangui? Ama chashna sintirichunca cai catij yuyaicunami ayudai tucun.

•  ¿Imatataj rurana cangui?

•  ¿Shujtaj jovencunaca imatataj nincuna?

•   Escuelamanca mana faltanachu cangui. Escuelaman cada rato faltashpaca alli notacunataca mana llujchinguichu.

   Mateoca: “Escuelaman faltajcunaca alli notacunata llujchingapajca mana preocuparijcunachu carca. Chaimantami mana alli notacunata llujchijcuna carca” ninmi.

   Gálatas 6:7-pica: “Maijan imata tarpujca, chaillatatajmi tandanga” ninmi.

•   Escuelapi atencionta churai. Escuelaman rishpallaca alli notacunataca mana llujchinguichu. Chaipaj randica ima yachachishcacunata anotai, profesor yachachicujpipish atencionta churai, pudishpaca mana intindishcacunatapish tapui.

   Oliviaca: “Ñucaca escuelapica achca tapuicunatami rurani. Profesorca estudiantecuna mana alli intindijta ricushpaca alli intindichingapajmi esforzarin” ninmi.

   Lucas 8:18-pica: ‘Ima shina uyashcataca yuyaipi charichij’ ninmi.

•   Ama copiaichu. Copianaca mana allichu can. Chaita ruranaca llullacuj shinami can. Copiashpaca imata mana yachanguichu.

   Jonatanca: “Ima tapuipaj respuestata mana yachashpaca cambaj compañerocunapaj respuestacunataca ama copiaichu. Canllataj estudiangapaj mana esforzarishpaca shujtajcuna siempre ayudachunmi shuyangui” ninmi.

   Gálatas 6:4-pica: ‘Ima shina ruracushcataca, cada quiquin alli ricurichun. Chashna quiquin ima shina rurashcallahuan cushi caichijlla’ ninmi.

•   Debertaraj rurai. Manaraj imata rurashpa debercunata rurai. a Debercunata rurashpaca tranquilomi pugllai tucungui.

   Calvinca: “Ñucapajca debercunata ruranami importante carca. Chaimantami alli notacunata charircani. Huasiman chayashpaca ashata samarinata o musicata uyanatami munaj carcani. Pero manaraj chaita rurashpami puntaca debertaraj ruraj carcani” ninmi.

   Filipenses 1:10-pica: “Imapish alli cajllata agllaichij” ninmi.

•   Notacunata mejorangapaj shujtajcunapaj ayudata mashcai. Cambaj yaya mamata, cambaj profesorcunata ama pingashpa ayudachun mañai. Mana cashpaca shuj profesortami contratai tucungui.

   Davidca: “Ima materiata mana alli intindishpaca cambaj profesor ayudachunmi mañai tucungui. Can imapi mejorasha nishcata yachashpaca de seguromi ayudanga” ninmi.

   Proverbios 15:22-pica: “Imapish alli cachunca taucapura yuyarinacushpami callarina” ninmi.

•   Tucui oportunidadcunata alli aprovechai. Huaquin llajtacunapica notacunata mejorangapajmi examencunapica shujtaj tapuicuna tiyan. Chai tapuicunatami contestai tucungui. Shinallataj shujtaj trabajota rurangapaj o cutin examenta cungapajmi mañai tucungui.

   Mackenzieca: “Alli notacunata llujchingapajca ñucallatajmi esforzarina cani. Notacunata mejorangapajca ñuca profesorcunatami ¿shujtaj trabajocunata rurai tucunichu? nishpa tapuni” ninmi.

   Proverbios 14:23-pica: “Tucui yuyaihuan imatapish rurajpica, japinapish tiyanmi” ninmi.