Diospaj Gobiernoca Jesusta catijcunapaj shungu ucupica mana canchu. a Cai Gobiernomanta parlashpaca Bibliapica: ‘Jahua pachamantami mandanga’ ninmi (Mateo 4:​17). Shinallataj cai Gobiernoca ñami jahua pachapi mandacun ninmi. ¿Imamantataj chashna ninchij? Ricushun.

•   Diospaj Gobiernopica mandajcuna, cai Gobiernota apoyajcuna, leycunapishmi tiyan. Cai Gobiernoca jahua pachapi, cai pachapi Diospaj munai pajtarichunmi ayudan (Mateo 6:​10; Apocalipsis 5:​10).

•   Diospaj Gobiernoca ‘tucui gentecunata, llajtacunata, chꞌican chꞌican rimaita rimajcunatami’ mandanga (Daniel 7:​13, 14). Cai Gobiernotaca gentecunaca mana agllashcachu. Diosmi cai Gobiernotaca agllashca. Chaimantami cai Gobiernoca gentecunata mandana autoridadta charin (Salmo 2:​4-6; Isaías 9:7).

•   Jesusca paipaj apostolcunataca, jahua pachapimi ñucahuan canguichij nircami. ¿Imapajtaj jahua pachaman ringacuna? ‘Mandana tiyarinapi tiyaringapajmi’ ringacuna. Paicunaca Jesushuanmi mandangacuna (Lucas 22:28, 30).

•   Diospaj Gobiernoca paipaj contracunatami tucuchinga (Salmo 2:​1, 2, 8, 9; 110:​1, 2; 1 Corintios 15:25, 26).

 Ima shinami ricushcanchij jahua pachapi tiyaj Gobiernoca mana ñucanchij shungupi can, ni ñucanchij shungupi mandai tucun. Bibliapica ‘Diospaj Gobiernomanta alli huillaicunaca’ shunguman chayashpa ñucanchij causaita cambiai tucushcatami yachachin (Mateo 13:19; 24:14).

Pero ¿imamantataj Jesusca “Diospaj Gobiernoca cancunapimi can” nirca?

 Huaquin Bibliacunapica Lucas 17:21-taca: “Diospaj Gobiernoca cancunapimi can” nishpami traducishcacuna (Biblia Americana San Jerónimo). Chaimantami gentecunaca Diospaj Gobierno paicunapaj shungupi cashcata yuyancuna. Shinapish cai versota ashtahuan intindingapajca Jesús picunaman caita nishcatami alli ricunaraj canchij.

 ¿Jesusca Lucas 17:21-pi nishca shimicunataca picunatataj nirca? Fariseocunatami nirca. Paicunaca Jesustami pꞌiñajcuna carca. Chaimantami Jesusta huañuchisha nircacuna (Mateo 12:14; Lucas 17:20). ¿Cai shimicunahuanca Jesusca fariseocunapish paicunapaj shungu ucupi Diospaj Gobiernota charishcatachu nisha nirca? Mana. Chaita mana nisha nircachu. Jesusllatajmi fariseocunataca: ‘Cancunapaj ucu shungupica jayaj, millaita ruranahuan jundami canguichij’ nirca (Mateo 23:27, 28).

 Shujtaj Bibliacunapica Lucas 17:21-pi ima nishcataca allimi yachachin. El Nuevo Testamento original Bibliapica: “Diospaj Gobiernoca cancunapaj ladopimi can” ninmi. Traducción del Nuevo Mundo de las Santas Escrituras (con referencias) nishca Bibliapipish: “Diospaj Gobiernoca cancunapurapimari” ninmi (notata ricui). ¿Cai versocunapica imamantataj Diospaj Gobiernoca fariseocunapaj ladopi o paicunapurapimi carca nin? Jesusca Diospaj Gobiernopimi rey can. Paica chai punllacunapica fariseocunapurapimi carca. Chaimantami cai Bibliacunapica Jesusca fariseocunapaj ladopi o paicunapurapimi carca nin (Lucas 1:​32, 33).