Bibliapica cashnami nin: “Causacujrajcunaca huañuna cashcallatapish yachanmi. Ashtahuanpish huañushcacunaca ña imata mana yachanchu. Pi ashtahuan mana yuyarinllapishchu” (Eclesiastés 9:5; Salmo 146:4). Shinaca pi huañushpaca chaipimi tucurin. Huañushcacunaca imata mana ruranchu, mana yuyanchu, mana sintincunapishchu.

“Ñutu allpallatajmi tucungui”

 Diosca punta runa Adanman pai mana cazushcamanta huañushpa ima tucunata huillarca. Diosca cashnami nirca: “Ñutu allpallamantataj cashcamantaca ñutu allpallatajmi tucungui” (Génesis 3:19). Dios ‘ñutu allpamanta manaraj rurajpica’ Adanca maipi mana tiyarcachu (Génesis 2:7). Huañushpaca allpa tucushpami chaipi chingarirca.

 Cunan punllacunapish shinallatajmi tucushpa caticun. Chaimantami gentecunamanta, animalcunamantaca Bibliaca cashna nin: “Tucuillataj allpamanta rurashcami. Tucuicunallatajmi chaillamantaj tigran” (Eclesiastés 3:19, 20).

¿Huañushpaca chaipichu tucui tucurin?

 Bibliapica huañuitaca huañui dormihuanmi chꞌimbapuran (Salmo 13:3; Juan 11:11-14; Hechos 7:60). Pipish huañuita dormicushpaca imata mana sintinchu. Shinallatajmi huañushcacunahuanpish tucun. Pero Bibliapica Diosca ñallami huañushcacunataca dormicujmanta shina rijchachishpa, tigra causachinga ninmi (Job 14:13-15). Shinaca huañushpaca mana chaipichu tucui tucurin. Diosca ñallami huañushcacunataca causachigrin.