Causaimantaca chꞌican chꞌican yuyaicunami tiyan. Chaimantami huaquincunaca cashna tapurishcacuna: ¿Imapajtaj caipi canchij? ¿Ñucanchij causaihuanca imatataj rurana canchij? Bibliapica Diospaj amigos cangapaj rurashcami canchij ninmi. Caita alli intindingapajca, Bibliapi tiyaj huaquin yuyaicunata ricushun.

•   Yayitu Diosca ñucanchijta rurajmi can. Chaimantami Bibliapica: “Diosmari ñucanchijtaca rurarca. Mana ñucanchijllataj rurarircanchijchu” ninmi (Salmo 100:3; Apocalipsis 4:11).

•   Jehová Diosca mana yangamantachu tucuita rurarca (Isaías 45:18).

•   Yayitu Diosca ñucanchijtaca paimanta yachana munaiyujtami rurarca. Paimanta yachashpami ñucanchij causaitaca valishcata ricushun (Mateo 5:3). Shinaca Diospaj munaita rurashpaca contentomi sintirishun (Salmo 145:16).

•   Yayitu Diosta rijsingapaj, paipaj amigo tucungapaj esforzarishpami Diosmanta yachana munaitaca pajtachishun. Caita ruranaca mana sinchichu can. Ashtahuanpish Bibliapica: “Diosman cꞌuchuyaichij, paipish cancunapajman cꞌuchuyangami” ninmi (Santiago 4:8; 2:23).

•   Diospaj munaita pajtachingapajmi rurashca canchij. Diospaj munaita pajtachishpami paipaj amigo tucushun. Bibliapimi maijan paipaj munai cashcataca intindichin. Eclesiastés 12:13-pica: “Diostaca manchashpa cazungui, pai mandashcacunatapish pajtachingui. Cai pachapi causajcunapajca, tucuimanta yalli allica chaimi” ninmi.

•   Diosca shamuj punllacunapica tucui llaquicunatami tucuchinga. Chaimi tucui shunguhuan sirvij paipaj amigocunaca huiñaita causangacuna. Chashnami Diospaj munaica libre pajtaringa (Salmo 37:10, 11).