Traducción del Nuevo Mundo Bibliapica Levítico 19:28-pimi shuj cutinlla tatuajecunamantaca parlan. Chaipica: “Cancunapaj cuerpopipish ama tatuajecunata ruranguichij” ninmi. Diosca israelitacunamanca paicunapaj cꞌuchullapi causaj pueblocuna shina paicunapaj aichapi shuticunata, yanga dioscunapaj simbolocunatapish ama churarichunmi chashna mandarca (Deuteronomio 14:2). Jesusta catijcunaca israelitacunaman Dios cushca leyta mana pajtachina cashpapish, cai mandashcapi ima nishcatami alli ricuna can.

¿Jesusta catijcunapajca tatuajecunata rurarinaca allichu can?

 Tatuajecunata rurarina cashcata o mana rurarina cashcata yachangapajca huaquin versocunata ricushun:

•   ‘Huarmicunapish ama pinganayajta maipish cachun churarichun’ (1 Timoteo 2:9). Cai consejoca mana huarmicunapajllachu can, cꞌaricunapajpishmi can. Tatuajecunata rurarijpica maijancunaca ricurashpami saquiringacuna. Shujtajcunacarin mana allimi sintiringacuna.

•   Maijancunaca pi cashcata ricuchingapaj, libres cashcata ricuchingapaj, paicunapaj cuerpopaj dueño cashcata ricuchingapajmi tatuajecunata rurarincuna. Shinapish Bibliapica Jesusta catijcunataca: “Cancunapaj cuerpocunataca, ima jucha illajllata, causaj sacrificiota Diosman cuichij. Chashna cashpami Dios munashca shina paita yuyarijcunataj canguichij” nishpami mandan (Romanos 12:1). Alli yuyanami tatuajeta imamanta rurana cashcata intindichun ayudanga. Por ejemplo, maijancunaca a la moda causashpa catingapaj o shuj grupopi cashcata ricuchingapajmi chaita rurarincuna. Chaimantami: “¿Tatuaje ña mana a la moda cajpica imatataj rurasha? ¿Qꞌuipamanca arrepintirishachu?” nishpa tapurina can. Imamanta tatuajecunata rurarina cashcata ricushpami alli decisionta agllai tucun (Proverbios 4:7).

•   “Imatapish alli yuyarishpa chai yuyai trabajaj runaca causaipaj charintajmi. Ashtahuanpish yuyarishcahuan ucui jahua imatapish rurajcunaca, ashtahuan huajchayashpami catincuna” (Proverbios 21:5). Maijancunaca mana alli yuyarishcahuanmi tatuajecunataca rurarincuna. Pero chashna rurashcamantami llaquita apancuna. Shujtajcunahuanpish ña mana alli apanacui tucuncunachu. Trabajotapish mana jahualla japi tucuncunachu. Ashtahuanpish tatuajecunata anchuchinaca achca cullquimi valin, achcatami nanachin. Chaimantami achca gentecunaca tatuajecunata rurachishcamanta qꞌuipamanca arrepintirincuna. Tatuajecunata anchuchina negociocunapish ashtahuanmi mirarishca.