1 Timoteo 3:1-16
3 Cai shimicunaca ciertomi: maijan runapish anciano* cangapaj esforzaricushpaca alli ruraita chasquingapajmi esforzaricun.
2 Chaimantami shuj ancianoca mana juchachipaj, shujlla huarmipaj cusa, tucuipi jarcarij, alli yuyaiyuj, mana maipishcachun causaj, cꞌuyaihuan chasquij, alli yachachij cana can.
3 Paica mana machaj, mana macaj,* ashtahuanpish intindijmi cana can. Chashnallataj mana shujtajcunahuan pꞌiñanacuj, mana cullquillapi yuyajchu cana can.
4 Paipaj familiatapish alli pushaj, cazuj huahuacunata, alli comportarij huahuacunatami charina can.
5 (Shuj runa paipaj quiquin familiata mana pushanata yachashpaca, ¿ima shinataj Diospaj congregaciontacarin cuidangayari?).
6 Paica Cristota cunanlla cati callarijca mana cana canchu. Ñataj jatun tucunman, Diablo chasquishca juiciota paipish chasquinman.
7 Shinallataj canllapi caj gentecunapurapica alli nishcami cana can. Chashnami imamantapish mana juchachishca canga. Diablopaj trampapipish mana urmanga.
8 Siervo ministerialcunapish alli pajtachijcuna,* caita chaita nishpa mana parlajcuna, vinotapish mana yalli ubyajcunami cana can. Mana allita rurashpa imata japina munaitapish mana charinachu can.
9 Chaipaj randica chuya shunguhuanmi pi mana yachai tucushcapi catina can. Chaica feta charinami.
10 Shinapish puntapica cai trabajota paicuna alli pajtachi tucushcatami ricuna can. Chashnami paicunaca mana juchachipaj cashcamanta siervo ministerialcuna shina sirvi tucungacuna.
11 Huarmicunapish alli comportarij,* mana yangamanta juchachishpa parlaj, tucuipi jarcarij, Diosta tucuipi cazushcata ricuchijcunami cana can.
12 Siervo ministerialcunaca shujlla huarmipaj cusa, paicunapaj huahuacunatapish, paicunapaj familiatapish alli pushajcunami cana can.
13 Paicunaman mingashcata alli pajtachij runacunaca alli nishcami cangacuna. Cristo Jesuspi feta charinamantapish mana pingashpami huillangacuna.
14 Canta ñalla ricunaman risha nishpapish caicunatami canman quillcani.
15 Ñuca uniyajpica Diospaj familia ucupi canpish shuj miembro cashcamanta ima shina comportarina cashcata yachachunmi caitaca quillcani. Chai familiaca causaj Diospaj congregacionmi can. Congregacionmi pilar shina mana llullataca sinchita chariracun, cuidacunpish.
16 Tucui shunguhuan Diosta adoranamanta pi mana yachai tucushcaca valishcami: ‘Jesusca aichayuj tulluyujmi ricurirca. Espiritupica cashcata ruraj nishcami carca. Angelcunamanmi ricurirca. Chꞌican chꞌican llajtacunapimi paimantaca huillarcacuna. Gentecunaca paipimi crircacuna. Jahua pachapipish chasquishcami carca, jatunyachishcami carca’.
Notacuna
^ O “superintendente”. “Anciano” shimita huasha diccionariopi ricui.
^ O “rimashpa mana llaquichij”.
^ O “alli comportarijcuna”.
^ O “alli pajtachij”.
